1 ज़ैखन सुलैमान राज़े यहोवारो भवन ते राज़ मेहल बनाव, ते ज़ैन तैनी केरनू चाव तैन सब कियूं। 2 तैखन यहोवा ज़ेन्च़रे गिबोन नगरे मां तैस दर्शन दित्तोरू थियूं, तेन्च़रे तैनी दूइयोवं फेरे भी सुपने मां तैस दर्शन दित्तू।✝ 3 ते यहोवाए तैस सेइं ज़ोवं, "मीं तेरी प्राथना शुनोरीए ज़ै तीं मीं कां छंदे केरतां कियोरी थी, ई ज़ै भवन तीं बनेवरोए, तैस मां मीं अपनु नवं हमेशारे लेई रेखतां तै पवित्र कियोरोए; ते मेरी एछ़्छ़ी ते मेरो मन तैड़ी हमेशा लगोरो रालो। 4 ते अगर तू अपने बाजी दाऊदेरो ज़ेरो ईमानदैरी सेइं ते सच़्च़े मने सेइं मेरे सामने च़लतो रालो, ते मेरे सब हुक्मां केरे मुताबिक केरस, ते मेरे विधि ते नियम मन्तो रास, त अवं तेरी हुकूमत इस्राएले पुड़ हमेशारे लेई कायम केरेलो; 5 ज़ेन्च़रे मीं तेरे बाजी दाऊदे सेइं वाधो कियोरो थियो कि, ‘तेरे खानदाने मां इस्राएलेरे तखते पुड़ बिशने बाले हमेशा बनोरे राले।’ 6 पन अगर तू या तेरे खानदानेरे लोक मीं पत्ती च़लनू शारन; ते मेरे तैन हुक्मन ते विधन ज़ैना मीं तुसन दित्तोरिन, तैन्न न मन्न, ते गेइतां होरि देबतां केरि पूज़ा केरन ते तैन कां मथ्थो टेकन 7 त अवं इस्राएली लोकन इस मुल्खे मरां कढेलो ज़ै मीं तैन दित्तोरोए, ते इस भवने ज़ै मीं अपने लेई पवित्र कियोरोए, एपनी नज़री करां दूर केरेलो; ते सब मुल्खां केरे लोकन मां इस्राएलेरू ऊपाम ते मसाल दित्ती गाली। 8 ते ई भवन मलबेरो ढेर भोल्हो, त ज़ै कोई इस भवने मेइं च़लेलो, तै हैरान भोल्हो, ते अफ़सोस केरतां तैना एक्‍की होरि पुछ़ेले, ‘यहोवा इस मुल्खे ते इस भवने सेइं एत्रो बुरो सलूख किजो कियोरोए;’✝ 9 तैखन लोक ज़ोले, ‘तैनेईं अपनो परमेशर यहोवा ज़ैनी तैन केरे दादे-पड़दादे मिस्र मुल्खे मरां केढतां आनोरे थिये। तैस शैरतां बखले देबतन पत्ती च़ले, ते तैन कां मथ्थो टेको ते तैन केरि पूज़ा की एल्हेरेलेइ यहोवाए एना सैरी मुसीबतां तैन पुड़ छ़ेडी।’" 10 सुलैमान राज़े त यहोवारो भवन ते अपनो मेहल बनावाने मां 20 साल* लगोरे थिये। 11 सुलैमाने सोर नगरेरे राज़े हीरामे ज़ैनी तैस मन मेर्ज़रे गैइड़ ते सनोवरेरी लकड़ी ते सोन्नू दित्तोरू थियूं, ते गलील प्रदेशेरे 20 नगर दित्ते। 12 ज़ैखन हीरामे सोर नगरे मरां गेइतां तैना नगर हेरे, ज़ैना सुलैमाने तैस दित्तोरे थिये, तैखन तैस तैना खुशी न आए। 13 तैखन तैनी ज़ोवं, "हे मेरे ढ्ला, एना केरहे नगर तीं मीं दित्तोरेन?" ते तैनी तैन केरू नवं कबूल* प्रदेश रख्खू। ते एन नवं अज़ तगर भी आहे। 14 फिरी हीराम राज़े सुलैमान राज़े कांजो लगभग 4000 किल्‍लो सोन्नू भेज़ोरू थियूं। 15 सुलैमान राज़े ज़ैना गुलाम मज़दूर रखोरे थिये, तैना एल्हेरेलेइ रखोरे थिये, कि यहोवारो भवन ते तैसेरो मेहल बनान, ते मिल्‍लो ते यरूशलेम नगरेरी दिवार ते हासोर, मगिद्दो, ते गेजेर नगरां केरि मरम्मत केरन। 16 गेजेर नगरे पुड़ त मिस्रेरे राज़े फ़िरौने हमलो केरतां कब्ज़ो कियोरो थियो ते अग लेइतां फुकू, ते तैस नगरे मां रानेबाले कनानी लोक मारे ते तैन नगर तैनी अपने कुइये, सुलैमानेरी रैनी जो दाज़ेरे रूपे मां दित्तू, 17 ते सुलैमाने गेजेर नगर ते बुनीयें पासे बेथोरोन नगर, 18 बालात ते तामार ज़ैना जंगले मां आन तैन सब नगरां केरि तैनी मरम्मत की, इना त प्रदेशे मां आन। 19 फिरी सुलैमानेरे ज़ेत्रे भी गुदामन बाले नगर थिये, ते तैसेरे रथां केरे ते सुवारां केरे नगर, तैना बल्के ज़ैन किछ सुलैमाने यरूशलेम, लबानोन नगरन ते अपने सारे रियासतां केरे प्रदेश मां बनानू चावं, तैन सब तैनी कियूं। 20 एमोरी, हित्ती, परिज्जी, हिब्बी ते यबूसी ज़ैना रेई जेवरे थिये, ज़ैना इस्राएली न थिये, 21 तैन केरू खानदान ज़ैना लोक तैन केरे बाद तैस मुल्खे मां रेई जेवरे थिये, ते तैन्न इस्राएली लोक नाश न केरि बटे, तैना लोक सुलैमाने गुलाम मज़दूर रखोरे थिये, ते अज़ तगर भी तैन केरि तैए हालते। 22 पन इस्राएली लोकन मरां सुलैमाने कोई भी गुलाम न बनाव; बल्के तैना त तैसेरे जंग लड़नेबाले सिपाही ते अधिकारी थिये, तैसेरे हाकिम ते सरदार, तैसेरे रथां केरे ते सुवारां केरे प्रधान थिये।

23 ज़ैना अधिकारी सुलैमानेरे कम्मन पुड़ रखोरे थिये, ते कम केरनेबालन पुड़ निगरानी केरते थिये, तैना 550 थिये।

24 ज़ैखन फ़िरौनेरी कुई दाऊदपुरे मरां अपने तैस मेहले मां जेई, ज़ै सुलैमाने तैसारे लेई बनेवरो थियो, तैखन तैनी मिल्‍लो* बनाई।

25 यहोवारे भवनेरू कम पूरू भोनेरे बाद सुलैमान तैस वेदी पुड़ ज़ै तैनी यहोवारे लेई बनेवरी थी, हर साल ट्लाई बार होमबलि ते मेलबलि च़ाढ़तो रहतो थियो, ते तैस सेइं साथी यहोवारे सामने गुग्गल बालतो थियो, एन्च़रे सेइं तैने तै भवन तियार कराव।

26 फिरी सुलैमान राज़े एस्योनगेबेर नगरे मां एदोम प्रदेशेरे लाल समुन्दरेरे बन्ने एलोत नगरेरे नेड़े, समुन्दरी ज़िहाज़ां बनां। 27 ते ज़िहाज़न मां हीरामे अपने माहिर ज़िहाज़ च़लनेबाले, ज़ैन्न समुन्दरेरी जानकारी थी, तैना सुलैमानेरे सेवकन सेइं साथी भेज़े। 28 तैनेईं ओपीर नगरे मां गेइतां तैट्ठां सुलैमान राज़ेरे लेई लगभग 14000 किल्‍लो सोन्नू आनू।