1 किछ दिहाड़ना बाद नाबोत नंव्वेरो एक्‍की मैन्हेरी दाछ़री बाग सामरियारे राज़े अहाबेरे मेहलेरे सामने यिज्रेल नगरे मां थी। 2 एक्सां अहाब राज़े नाबोते सेइं ज़ोवं, "तेरी दाछ़री बाग ज़ै मेरे मेहलेरे सामने, तू तैस मींजो दे कि अवं तैस मां शाग-सब्ज़ी लेइलो; ते अवं तैसेरे बदले मां तीं अक रोड़ी बाग देताईं, नईं त अगर तू चास त अवं तैसेरी कीमत देइलो।" 3 पन नाबोते अहाबे सेइं ज़ोवं, "यहोवा न केरे कि अवं अपने दादे-पड़दादां केरो हिस्सो तींजो देईं!" 4 यिज्रेली नाबोतेरी ई गल शुन्तां अहाब बड़ो परेशान भोव, ते तै उदास ते नाराज़ भोइतां घरे जो च़लो जेव, किजोकि तैनी ज़ोवरू थियूं, "अवं अपने दादे-पड़दादां केरो हिस्सो तींजो न देइलो!" अहाब अपने घरे बिछ़ाने पुड़ लेटतां सोचतो राव, ते खानू पीनू शारू।

5 तैखन तैसेरी कौन्श ईजेबेल तैस कां एइतां पुछ़ने लगी, "तेरो मन किजो एत्रो उदास भोवरोए कि रोट्टी न खास?" 6 अहाबे जुवाब दित्तो, "इसेरी वजा ईए, कि मीं यिज्रेली नाबोते सेइं ज़ोवं, ‘कीमत नेइतां मीं अपनि दाछ़री बाग दे, नईं त अगर तू चास त अवं तैसेरे बदले अक रोड़ी बाग देताईं।’ पन तैनी ज़ोवं, ‘अवं अपनि दाछ़री बाग तीं न देइलो।’" 7 तैसेरी कौन्श ईजेबेलां तैस सेइं ज़ोवं, "कुन तू इस्राएलेरो राज़ोस, खड़ो उठ ते रोट्टी खा; ते तेरो मन खुशी भोए; यिज्रेली नाबोतेरी दाछ़री बाग अवं तीं दुवाली।"

8 तैखन तैसां अहाब राज़ेरे नंव्वे पुड़ चिट्ठी लिखतां ते तैन पुड़ राज़ेरी एंवठरी मोहर लेइतां, बुज़ुर्ग ते रईस लोकन कांजो चिट्ठी भेज़ी, ज़ैना तैस नगरे मां ते नाबोतेरे आसे पासे मां रहते थिये। 9 तैस चिट्ठी मां तैसां एन लिखू, "बरत रखनेरे लेई प्रचार केरा, ते नाबोत लोकां केरे सामने खास ठैरी बिशालो। 10 तैखन दूई बुरे मैन्हु तैसेरे सामने बिशालने ज़ैना गवाही देइतां ज़ोन, ‘कि तीं परमेशरेरी ते राज़ेरी दूईयां केरि निन्दा कियोरीए।’ तैखन तुस लोक तैस बेइर नेइतां तैस पुड़ पथराव केरथ, कि तै मेरि गाए।" 11 ईजेबेलरे चिट्ठरे हुक्मेरे मुताबिक नगरेरे रानेबाले बुज़ुर्ग ते रईस लोकेईं बरत रखनेरो प्रचार कियो, 12 ते नाबोत, लोकेईं खास ठैरी पुड़ बिशालो। 13 तैखन दूई बुरे मैन्हु तैसेरे सामने एइतां बिश्शी जे; ते तैनेईं लोकां केरे सामने ऐह नाबोतेरे खलाफ गवाही दित्ती, "नाबोते परमेशरेरी ते राज़ेरी दूईयां केरि निन्दा कियोरीए।" इस गल्‍ली पुड़ तैनेईं यिज्रेल नगरे करां बेइर गेइतां तैस घोड़ेईं बैई ते तै मेरि जेव। 14 तैखन तैनेईं ईजेबेली कां ऐह समाद भेज़ो कि नाबोत पथराव केरतां मारोरोए।

15 एन शुन्तां कि नाबोत घोड़ेईं देइतां मारोरोए, ईजेबेल अहाबे कां गेइतां ज़ोने लगी, "खड़ो उठतां यिज्रेली नाबोतेरी दाछ़री बाग ज़ै तैनी तींजो कीमत देइतां भी इन्कार कियोरो थियो, अपने कब्ज़े मां केर, किजोकि नाबोत हुनी ज़ींतो नईं बल्के तै मेरि जेवरोए।" 16 ते यिज्रेली नाबोतेरी मौतरी खबर शुनते अहाब तैसेरी दाछ़री बाग अपने कब्ज़े मां नेनेरे लेई खड़ो भोव।

17 तैखन यहोवा तिशबे नगरेरे रानेबाले एलिय्याह नेबी सेइं ज़ोवं, 18 "सामरिया नगरे मां रानेबाले इस्राएलेरे राज़े अहाबे सेइं मिलनेरे लेई गा; तै त नाबोतेरी दाछ़री बागी मांए, तै तैस अपने कब्ज़े मां केरनेरे लेई तैड़ी जेवरोए। 19 ते तैस सेइं एन ज़ोइयां, कि यहोवा एन ज़ोते, ‘तीं अक मैन्हु कत्ल केरतां तैसेरी ज़मीनी पुड़ कब्ज़ो भी कियो?’ ते फिरी तैस सेइं एन भी ज़ोइयां कि यहोवा एन ज़ोते, ‘तै जगाह, ज़ैस जगाई नाबोतेरो खून कुतरेईं च़टोरोए, तेन्च़रे कुतरां तेरो भी खून च़टेलां।’"

20 एलिय्याह लेइतां अहाब राज़ो ज़ोने लगो, "हे मेरा दुश्मना! कुन तीं मेरो पतो लग्गो?" तैनी ज़ोवं, "हाँ मीं पतो लग्गोरोए; एसेरी वजा ई आहे, कि ज़ैन यहोवा परमेशरेरी नज़री मां बुरूए, तैन कम केरनेरे लेई तीं अपनो आप बेच़ी छ़डोरोए। 21 अवं तीं पुड़ एरी मुसीबत छ़डेलो; कि अवं तीं पूरे तरीके सेइं मिटेई छ़डेलो; ते तेरे घरेरे एक्‍की-एक्‍की मट्ठे चाए तैन गुलाम भोए, चाए तैन आज़ाद भोए इस्राएले मरां हर एक्‍की रानेबाले नाश केरतां छ़डेलो। 22 ते अवं तेरे घराने नबातेरे मट्ठे यारोबाम, ते अहिय्याहेरे मट्ठे बाशारो ज़ेरो केरतां छ़डेलो; एल्हेरेलेइ कि तीं अवं सरकावरोईं, ते इस्राएली लोकन करां पाप करावरोए। 23 ते ईजेबेलरे बारे मां यहोवा एन ज़ोते, ‘यिज्रेल नगरेरे क़िले कां कुतरां ईजेबेली खेइ छ़डेलां।’ 24 अहाबेरो ज़ै कोई नगरे मां मेरि गालो तैस कुतरां खालां; ते ज़ै कोई मैइदाने मां मेरि गालो तैस इल्‍लां-कंव्वां खालां।"

25 सच़्च़े अहाबेरो ज़ेरो होरो कोई न थियो ज़ैनी अपनि कौन्श ईजेबेलरे ज़ोने पुड़ तैन कम केरनेरे लेई ज़ैन यहोवारी नज़री मां बुरू थियूं अपनो आप बेच़ो। 26 एनी त बड़ू बुरू कम कियूं कि एमोरी लोकां केरू ज़ेरू ज़ैना यहोवा इस्राएली लोकां केरे सामनेरां कढोरे थिये, तैना मूरती केरि पूज़ा केरते थिये।

27 एलिय्याहेरी एना गल्‍लां शुन्तां अहाबे अपना लिगड़ां छ़िंदां, ते दुख बांदो केरनेरे लेई एपनी जानी पुड़ टाट पलेटतां बरत रख्खू, ते टाट पलेटतां राने लगो, ते शरमरे मारे क्रोड़ी लेकतां च़लने लगो। 28 ते यहोवा तिशबे नगरेरे रानेबाले एलिय्याह सेइं ज़ोवं, 29 "कुन तीं लाहेरूए कि अहाब मेरे सामने हलीम बेनि जेवरोए? एस वजाई सेइं कि तै मेरे सामने हलीम बनोरोए ते अवं तै मुसीबत तैसेरे ज़ींते दम्में तैस पुड़ न छ़डेलो पन तैसेरे मट्ठां केरे दिहाड़न मां अवं तैसेरे घराने पुड़ तै मुसीबत भेज़ेलो।"