1 रहबाम शेकेम नगरे मां च़लो जेव, किजोकि सारे इस्राएली लोक तैस राज़ो बनानेरे लेई तैड़ी जेवरे थिये। 2 ज़ैखन नबातेरे मट्ठे यारोबामे एन शुनू, ज़ै तेइस तगर मिस्र मुल्खे मां रहतो थियो, किजोकि यारोबाम, सुलैमान राज़े करां डेरतां मिस्र मुल्खे मां रहतो थियो। 3 इस्राएलेरे किछ लोकेईं तै कुजव तैखन यारोबाम ते सारे इस्राएली लोक रहबामे कां गेइतां ज़ोने लगे। 4 "तेरे बाजे सुलैमाने असन पुड़ बड़ो बोझ छ़डोरो थियो, त तू हुनी अपने बाजेरी सखत सेवा छ़ेडतां, ते असन पुड़ेरां तै भारी बोझ, ज़ै तैनी असन पुड़ रखोरो थियो, तू इश्शे लेई किछ पोल्‍लो केर; तैखन असां तेरे अधीन भोल्हे।" 5 तैनी ज़ोवं, "हुन्ना तुस गाथ, ते ट्लेइ दिहाड़ना बाद फिरी मीं कां एज्जथ।" तैखन तैना लोक च़ले जे।

6 तैखन रहबाम राज़े तैन सियानन कां गेइतां ज़ैना तैसेरे बाजी सुलैमानेरी ज़िन्दगी भर तैसेरी सेवाई मां खड़े रहते थिये, तैन पुछ़ने जेव, "एन लोकन केन्च़रे जुवाब देनो ठीक भोल्हो, एस बारे मां तुसां मीं कुन सलाह देतथ?" 7 तैनेईं तैस ऐह जुवाब दित्तो, "अगर तू अज़्ज़ेरे दिहाड़े तैन सेइं इस्राएली लोकां केरो सेवकां केरो ज़ेरो पेश भोल्हो, ते तैन सेइं प्यारे सेइं गल्‍लां केरस, त तैना हमेशारे तेरे अधीन राले।" 8 पन रहबामे तैन सियांनां केरि सलाह न मन्नी, ते तैनी तैन जुवानन सेइं सलाह की, ज़ैना तैस सेइं साथी बेडोरे थिये, ते तैसेरे अधिकारी थिये। 9 तैनी तैन पुछ़ू, "अवं लोकन केन्च़रे सेइं जुवाब देईं? एस बारे मां तुसां मीं कुन सलाह देतथ? तैनेईं तैस ऐह जुवाब दित्तो, ‘ज़ै बोझ तेरे बाजे असन पुड़ रखोरोए एस किछ पोल्‍लो केर।’" 10 ज़ैना जुवान तैस सेइं साथी बेडोरे थिये तैनेईं तैस ऐह जुवाब दित्तो, "तैन लोकेईं तीं सेइं ज़ोवरूए, ‘तेरे बाजे इश्शे बोझ बधावरो थियो, पन तू इश्शे लेई किछ तैस पोल्‍लो केर; तू तैन सेइं ज़ोइयां, मेरी निकड़ी अंगलोइ भी मेरे बाजी केरे कमरी करां मोट्टीए। 11 मेरे ज़ोनेरो मतलब ई आहे कि मेरे बाजे तुसन पुड़ ज़ै भारी बोझ रखोरो थियो, तैस अवं होरो भी जादे भारी केरेलो; मेरो बाजी तुसन कोड़ेइं सेइं सज़ाह देतो थियो, पन अवं बिच़्च़न सेइं देइलो।’"

12 ट्लेइयोवं दिहाड़े ज़ैन राज़े ज़ोवरू थियूं, कि ट्लेइयोवं दिहाड़े फिरी मीं कां एज्जथ, तेन्च़रे यारोबाम ते तैस सेइं साथी सारे लोक रहबाम राज़े कां हाज़र भोए। 13 तैखन रहबाम राज़े लोकन सेइं बेड़ी सखत गल्‍लां की, 14 ते सियाने केरि दित्तोरी सलाह न मेनतां, जुवाना केरि सलाहरे मुताबिक तैनी ज़ोवं, "मेरे बाजे त तुश्शो बोझ भारी कियोरो थियो, पन अवं तैस करां भी जादे भारी केरेलो: मेरो बाजी तुसन कोड़न सेइं सज़ाह देतो थियो, पन अवं बिच़्च़न सेइं देइलो।" 15 एस तरीके सेइं राज़े लोकां केरि गल न मन्नी, एसेरी वजा ई आहे, कि ज़ैन वचन यहोवा शीलो नगरेरे रानेबाले अहिय्याहेरे ज़िरिये नबातेरे मट्ठे यारोबामे सेइं ज़ोवरू थियूं, तैस पूरे केरनेरे लेई तैने एन्च़रे कियोरू थियूं।✝

16 ज़ैखन सारे इस्राएली लोकेईं हेरू कि राज़ो इश्शी सलाह न मन्ने, तैखन तैना ज़ोने लगे,

"दाऊदे मां इश्शो कोई अंश नईं!

इश्शो त यिशैरे मट्ठे मां कोई हिस्सो नईं!

हे इस्राएली लोकव अपने-अपने डेरे जो च़ले गाथ:

हुनी हे दाऊद, अपने घरानेरी फिक्र केर।"

17 सारे इस्राएली लोक अपने-अपने डेरे जो च़ले जे। सिर्फ तैना लोक ज़ैना इस्राएली यहूदारे नगरन मां बस्सोरे थिये तैन पुड़ रहबाम राज़ केरने लगो। 18 तैखन रहबाम राज़े अदोराम भेज़ो ज़ै सब गुलाम मज़दूरन पुड़ अधिकारी थियो, ते सेभी इस्राएली लोकेईं तैस पुड़ पथराव कियो, ते तै मेरि जेव: तैखन रहबाम जल्दी केरतां अपने रथे पुड़ च़ैढ़तां यरूशलेम नगरे जो नेश्शी जेव। 19 एस्से वजाई सेइं इस्राएली लोक दाऊदेरे घराने करां खलाफ भोइ जे, ते अज़ तगर भी एन्च़रे आहे। 20 सारे इस्राएली लोकेईं एन शुन्तां कि यारोबाम मिस्रे मरां वापस एवरोए, तैखन तैस जो मेण्डली मां एजनेरे लेई समाद भेज़ो ते पूरे तरीके सेइं इस्राएली लोकन पुड़ राज़ो बनाव, ते यहूदारे गोट्लेरे अलावा दाऊदेरे घराने सेइं कोई मिलाप न राव। 21 ज़ैखन रहबाम यरूशलेम नगरे मां अव, तैखन तैनी यहूदारो सारो घरानो, ते बिन्यामीनेरू गोट्ल, ज़ैना कुल मिलेइतां 180000 जंग लड़नेबाले सिपाही थिये, अकोट्ठे किये, कि तैना इस्राएली लोकन सेइं लेड़तां सुलैमानेरे मट्ठे रहबामेरे कब्ज़े मां फिरी हुकूमत केरन। 22 तैखन परमेशरे शमायाह नेबी सेइं ज़ोवं, "यहूदारे राज़े सुलैमानेरे मट्ठे रहबामे सेइं, 23 ते यहूदारे ते बिन्यामीनेरे सारे घराने सेइं, ते सेभी लोकन सेइं ज़ो, ‘यहोवा इन ज़ोते, 24 कि अपने ढ्लान इस्राएली लोकन पुड़ चढ़ाई केरतां जंग न केरां; तुस अपने-अपने घरे जो च़ले गाथ, किजोकि ऐह गल मेरे तरफां भोवरीए।’" यहोवारू एन वचन मेनतां तैना तैसेरे मुताबिक वापस अपने-अपने घरे जो च़ले जे।

25 तैखन यारोबाम एप्रैमेरे पहाड़ी प्रदेशेरे शेकेम नगरेरी मरम्मत केरतां तैस मां राने लगो; फिरी तैट्ठां निस्तां पनूएल नगर भी मज़बूत कियूं। 26 एक्सां यारोबाम सोचने लगो, "हुनी राज़ दाऊदेरे घरानेरू भोइ गानूए। 27 अगर लोक यरूशलेम नगरे मां बलि देने जो गाले, त तैन केरो मन अपने मालिक यहूदारे राज़े रहबामेरे पासे फिरी गानोए, ते तैना मीं मैरतां यहूदारे राज़े रहबाम अपनो राज़ो मन्नेले।" 28 एल्हेरेलेइ राज़े सलाह केरतां सोन्नेरां दूई बछ़ड़ां बनां ते लोकन सेइं ज़ोवं, "यरूशलेम नगरे जो गानू तुश्शे लेई मुश्किले, एल्हेरेलेइ हे इस्राएली लोकव अपने देबते हेरा, ज़ैनेईं तुस मिस्र मुल्खे मरां केढतां आनोरेथ।" 29 तैनी अक बछ़ड़ेरी मूरती बेतेल नगरे मां, ते होरी दान नगरे मां खड़ी की। 30 ते लोक मूरती पूज़ा केरनेरे लेई दान नगरे तगर एजने लगे, ई अक बड़ो बड्डो पाप थियो। 31 ते तैनी उच्‍ची-उच्‍ची ठारन पुड़ मन्दरां बाना, ते हर किसमेरे लोकन मरां ज़ैना लेवी खानदाने मरां न थिये तैना याजक बनाए। 32 फिरी यारोबामे अठोवं महीनेरे परहनोवं दिहाड़े* यहूदारे एक्‍की तिहारेरू ज़ेरू अक तिहार रख्खू, ते वेदी पुड़ बलि च़ाढ़ने लगो; एस तरीके सेइं तैनी बेतेल नगरे मां अपने बनेवरे बछ़ड़ां केरि मूरती केरे लेई वेदी पुड़ बलि च़ाढ़ी, ते अपने बनेवरे उच्‍चे ठारां केरे मन्दरां केरे लेई याजक बेतेल नगरे मां रख्खे। 33 ज़ैस महीनेरे लेई यारोबामे अपने मने मां सोच विचार कियोरो थियो, मतलब अठोवं महीनेरे परहनोवं दिहाड़े तैनी इस्राएली लोकां केरे लेई अक तिहार रख्खू, ते तै बेतेल नगरे मां गुग्गल बालनेरे लेई वेदी कां च़ैढ़ी जेव।