1 तैन दिहाड़न मां अरामेरे राज़े बेन्हददे अपनि सारी सेना अकोट्ठी की, ते तैस सेइं साथी 32 राज़े ते घोड़े ते रथ थिये; तैना साथी नेइतां तैनी सामरिया नगरे पुड़ हमलो कियो, ते तैसेरे च़ेवरे पासन घेरो देइतां तैस सेइं लड़ने लगो। 2 ते तैनी नगरे मां इस्राएली केरे राज़े अहाबे कां एन ज़ोनेरे लेई मैन्हु भेज़े, "बेन्हदद तुसन सेइं एन ज़ोते, 3 ‘तेरी चाँदी ते सोन्नू सब मेरूए, ते तेरी कौन्शन मां ते बच्‍चन मां ज़ैना-ज़ैना रोड़ेन तैना सब मेरेन।’" 4 इस्राएलेरे राज़े तैस कांजो समाद भेज़ो, "हे मेरा मालिक! हे राज़ा! तेरे ज़ोने मुताबिक अवं ते मेरू ज़ैन किछ भी आहे, तैन तेरूए।" 5 तैन्ने मैन्हेइं एइतां ज़ोवं, "बेन्हदद तींजो एन ज़ोते, ‘मीं तीं कांजो ई समाद भेज़ोरो थियो तेरी चाँदी ते सोन्नू ते तेरी कौन्शां ते बच्‍चे तीं मींजो देने पेनेन। 6 पन अवं कालां इस्से मौके अपने अधिकारी तीं कां भेज़ेलो, ते तैना एइतां तेरे ते तेरे अधिकैरी केरे घरन मां तोप्पी-तोप्पी कढेले, ते ज़ैना कीमती चीज़ां मैल्हेली तैना एप्पु सेइं साथी इरां आनेले।’"

7 तैखन इस्राएलेरे राज़े अहाबे अपने मुल्खेरे सारे बुज़ुर्ग कुजेइतां ज़ोवं, "सलाह केरा, कि तै मैन्हु सिर्फ इश्शो नुकसान केरनो चाते; तैनी मीं करां मेरी कौन्शां, बच्‍चे, सोन्नू चाँदी मगने भेज़ोरेन, ते मीं इन्कार नईं कियोरो।" 8 तैखन सारे बुज़ुर्गेईं ते सारे आम लोकेईं ज़ोवं, "तैसेरी नईं शुन्नी; ते न मन्नी।" 9 तैखन अहाबे बेन्हददेरे मैन्हन सेइं ज़ोवं, "मेरे मालिक राज़े सेइं मेरी तरफां ज़ोथ, ‘ज़ैन किछ तीं अपने दासे करां पेइले चावरू थियूं तैन त अवं केरेलो, पन ई तेरी मांग अवं पूरी न केरि सेकी।’" तैखन बेन्हददेरे मैन्हेईं वापस गेइतां तैस ऐह जुवाब शुनेई दित्तो। 10 तैखन बेन्हददे अहाबे कांजो ऐह समाद भेज़ो, "अगर सामरिया नगरे मां एत्री धूड़ मैल्हे कि मीं पत्ती च़लनेबालां केरि मुठड़ी भेरोए त देबतो मीं सेइं सखते करां सखत सलूख केरे।" 11 इस्राएलेरे राज़े अहाबे तैन मैन्हन सेइं जुवाब देइतां ज़ोवं, "तैस सेइं ज़ोथ, ‘ज़ै हथियार बंधतो भोए, तै तैसेरो ज़ेरो घमण्डी न बने, बल्के तैसेरो ज़ेरो बने, ज़ै हथियार उसालतो भोए।’" 12 ज़ैखन बेन्हददे इनां गल्‍लां शुनी तैखन तै अपने बाकी राज़न सेइं साथी शराब पीने लगोरो थियो, तैखन तैनी अपने सेनापेतन सेइं ज़ोवं, "हमलो केरनेरे लेई तियारी केरा," तैखन तैनेईं सामरिया नगरेरे खलाफ हमलो केरनेरे लेई तियारी की।

13 तैखन अक नबी इस्राएलेरे अहाब राज़े कां एइतां ज़ोने लगो, "यहोवा तीं सेइं एन ज़ोते, ‘ऐह बड़ी भीड़ ज़ै तीं लाहोरीए, तै सब अज़ अवं तेरे हथ्थे मां केरताईं, एस सेइं तीं पतो लग्गेलो, कि अवं यहोवा आईं।’" 14 अहाबे पुछ़ू, "केसेरे ज़िरिये?" नेबे जुवाब दित्तो, "यहोवा इन ज़ोते, कि प्रदेशां केरे हाकिमां केरे जुवान सिपेही केरे ज़िरिये!" फिरी तैनी पुछ़ू, "जंग कौन शुरू केरे?" तैनी जुवाब दित्तो, "तूए जंग शुरू केरेलो।" 15 तैखन तैनी प्रदेशां केरे हाकिमां केरे जुवान सिपेही केरि गिनती की, ते तैना 232 निस्से; ते तैसेरां बाद तैनी सारे इस्राएली सिपाही केरि गिनती की, ते तैना 7000 निस्से।

16 तैना दुपहरां केरे मौके निस्से, तैस मौके बेन्हदद अपने मद्दतगार 32 राज़न समेत डेरन मां शराब पीतां मतवालो भोइ राहोरो थियो। 17 प्रदेशां केरे हाकिमां केरे जुवान सिपेही पेइले निस्से। तैखन बेन्हददे मैन्हु भेज़े, ते तैनेईं तैस सेइं ज़ोवं, "सामरिया नगरे मरां किछ मैन्हु निसने लगोरेन।" 18 बेन्हददे हुक्म दित्तो, "चाहे तैना मेल मिलाप केरनेरे लेई कि न भोन एवरे, ते चाहे लड़नेरे लेई, फिरी भी तैना ज़ींते इरां आनां।" 19 प्रदेशां केरे हाकिमां केरे जुवान सिपाही ते तैन पत्पती सिपाही नगरे मरां निस्से। 20 ते तैना अपने-अपने सामनेबाले दुश्मन सिपाही मारने लगे; ते अरामी सिपाही नेश्शी जे, ते इस्राएली सेना तैन केरो पीछो कियो, ते अरामेरो राज़ो बेन्हदद, सुवारन सेइं साथी घोड़े पुड़ च़ढ़ो, ते नेशतां बेंच़ी जेव। 21 तैखन इस्राएलेरो राज़ो अहाब भी निस्तां घोड़न ते रथ्थन मारने लगो, ते अरामी सिपाही बड़े बुरे तरीके सेइं मारे।

22 तैखन तैनी नेबे इस्राएलेरे राज़े कां नेड़े गेइतां ज़ोवं, "गेइतां जंग केरनेरे लेई अपनो आप तियार केर, ते रोड़ेच़ारे सोच, कि कुन केरनूए, किजोकि नंव्वो साल शुरू भोंते अरामेरो राज़ो फिरी तीं पुड़ हमलो केरेलो।" 23 तैखन अरामेरे राज़ेरे अधिकैरेईं तैस सेइं ज़ोवं, "तैन लोकां केरो देबतो पहाड़ी देबतोए, एस वजाई सेइं तैना असन करां ज़ींते; एल्हेरेलेइ अस तैन सेइं चौरस ठैरी लड़म त अस पक्‍के ज़ींतमेले। 24 ते एन भी कम केर, सारे राज़ां केरो दर्जो वापस ने, ते तैन केरे ठारी पुड़ सेनापति ठहरा। 25 फिरी अक होरी सेना ज़ै तेरे बराबर भोए ते नष्ट भोवरी भोए, ते घोड़ेरे बदले घोड़ो, ते रथ्थेरे बदले रथ अपने लेई गेनि छ़ड; तैखन अस चौरस ठैरी मां तैन सेइं लड़मेले, ते पक्‍के अस तैन करां ज़ींतमेले।" तैन केरि ऐह सलाह मेनतां बेन्हदद राज़े एन्च़रे कियूं।

26 ते नंव्वो साल लगते बेन्हददे अरामी सिपाही अकोट्ठे किये, ते इस्राएली लोकन सेइं लड़नेरे लेई अपेक नगरे जो जेव। 27 ते इस्राएली सेना भी अकोट्ठी कीजेई, ते तैन केरे खानेरो भी इंतज़ाम भोइ जेव; तैखन तैना तैन केरो मुकाबलो केरनेरे लेई निस्से, ते ज़ैखन इस्राएली सेना तैन केरे सामने डेरे लेवरे थिये त तैना ज़ेरां छ़ेल्‍ली केरां छ़ेड़ां दूई निक्‍कां झुण्डां लेइहोतां थियां, पन अरामी सेनाई सेइं तै मुल्ख भेरोई जेव। 28 तैखन परमेशरेरे तैन्ने नेबे इस्राएली केरे राज़े कां गेइतां ज़ोवं, "यहोवा इन ज़ोते, ‘अरामी सेना एन ज़ोवरूए, कि यहोवा पहाड़ी देबतोए, पन बुन्हीं ज़मीनरो नईं; एस्से वजाई सेइं अवं तैस बेड़ी भीड़ी तेरे हथ्थे मां देइलो, तैखन तुसन पतो लग्गेलो, कि अवं यहोवा आईं।’" 29 ते तैना सत दिहाड़े आमने-सामने डेरे लेइतां बिश्शोरे राए; तैखन सत्तोवं दिहाड़े जंग छ़िड़ी जेई; ते एक्‍की दिहाड़े मां इस्राएली लोकेईं अक लख अरामी सिपाही मारे। 30 ज़ैना बेंच़ी जे, तैना अपेक नगरे मां नेशतां छ़ेप्पी जे, तैड़ी तैन बच़ोरे सिपेहिन मरां 27000 मैन्हु नगरेरी दिवार डुलने सेइं देबोइतां मेरि जे ते बेन्हदद भी नेश्शी जेव ते तैस नगरे मां अन्तर अक कोठी थी तैस मां गेइतां छ़ेप्पी जेव।

31 तैखन तैसेरे अधिकैरेईं तैस सेइं ज़ोवं, "शुन असेईं त शुनेरूए, कि इस्राएल मुल्खेरे राज़े दया केरनेबाले भोतन, एल्हेरेलेइ असन लखे टाट बेन्धतां ते दोग्गे पुड़ रेस्सी बेन्धतां इस्राएलेरे राज़े कां गानेरो हुक्म दे, भोइ सकते कि तै तेरी जान बच़ाए।" 32 तैखन तैनेईं लखे टाट बेन्धतां ते दोग्गे पुड़ रेस्सी बेन्धतां इस्राएलेरे राज़े कां गेइतां ज़ोने लगे, "तेरो दास बेन्हदद तीं सेइं एन ज़ोते, ‘महरबानी केरतां मीं ज़ींते राने दे।’" राज़े जुवाब दित्तो, "कुन तै हेजू ज़ींतोए? तै त मेरे लेई ढ्लाएरो ज़ेरोए।" 33 ज़ैखन तैन अधिकैरेईं हेरू ई रोड़ो मौकोए, तैखन जल्दी तैनेईं तैसेरी गल्‍लां ट्लेइतां ज़ोवं, "हाँ बेन्हदद तेरे लेई ढ्लाएरो ज़ेरोए।" तैखन अहाब राज़े ज़ोवं, "गाथ तैस इरां आनां।" तैखन बेन्हदद तैस कां अव, ते तैनी तै अपने रथे पुड़ च़ैढ़तां आनो। 34 तैखन बेन्हददे तैस सेइं ज़ोवं, "ज़ैना नगर मेरे बाजे तेरे बाजी करां नेवरे थिये, अवं तैना तीं वापस देइलो; ते ज़ेन्च़रे मेरे बाजे सामरिया नगरे मां सड़कां बनेवरी थी, तेन्च़रे तू भी दमिश्क नगरे मां सड़कां बनावेइयां।" अहाबे ज़ोवं, "अवं एस्से करारे पुड़ तीं छ़डताईं," तैखन तैनी बेन्हददे सेइं करार केरतां तै हथरां छ़डो। 35 तैसेरां बाद नेबी केरि टोली मरां एक्‍के यहोवारे ज़ोनेरे मुताबिक अपने सैथी सेइं ज़ोवं, "मीं झ़ुस," ज़ैखन तैनी मैन्हें तैस मारनेरे लेई इन्कार कियो, 36 तैखन तैनी तैस सेइं ज़ोवं, "तीं यहोवारो वचन नईं मन्नोरो, एस वजाई सेइं शुन, ज़ेरो तू मीं करां च़लो गालो, तेरहो अक शेर तीं मारेलो।" तैखन ज़ेरो तै तैस करां च़लो जेव, तेरहो तैस अक शेर मैल्हो, ते तैनी तै मारो। 37 फिरी तैस नेबी अक होरो मैन्हु मैल्हो, ते तैस सेइं भी तैनी ज़ोवं, "मीं झ़ुस।" ते तैनी तै एत्रो मड्डो कि तै ज़खमी भोइ जेव। 38 तैखन तै नबी च़ेलि जेव, ते तुत्तरे पुड़ साफेरू छ़ूँ छ़ेडतां राज़ेरे इंतज़ारे मां बत्ती मां खड़ो राव। 39 ज़ैखन राज़ो सामने च़लोरो थियो, तैखन तैने तैस कां बिनती केरतां ज़ोवं, "ज़ैखन तेरो दास जंगरे मैइदाने मां थियो तैखन कोई मैन्हु मेरे पासे मुड़तां कोन्ची मैन्हु मीं कां घिन्तां अव, ते मीं सेइं ज़ोवं, ‘इस मैन्हेरी निगरानी केर; अगर ई कोन्ची तरीके सेइं छुट्टी गाए, त तैसेरे प्राण इसेरे बदले तीं अपने प्राण देने पेनेन; नईं 35 किल्‍लो चाँदी देनी पेली।’ 40 तैसेरां बाद तेरो दास इरां उरां कम्मे मां फेसी जेव, फिरी तै मैन्हु न मैल्हो।" इस्राएलेरे राज़े अहाबे तैस सेइं ज़ोवं, "तीं एन्च़रे सज़ाह मैल्हेली; तीं त एप्पु अपनो न्याय कियोरोए।" 41 नेबे लूशी एपनी एछ़्छ़न पुड़ेरां साफेरू छ़ूँ खड़ू कियूं, लूशी अपने तुत्तरे पुड़ां साफो उसालो, तैखन इस्राएलेरे राज़े तै पिशानो कि तै कोई नबी आहे। 42 तैखन तैनी नेबे राज़े सेइं ज़ोवं, "यहोवा तींजो एन ज़ोते, ‘एल्हेरेलेइ कि तीं अपने हथ्थन मरां अक एरहो मैन्हु गाने दित्तो, ज़ै मीं सत्यानाश भोनेरे लेई ठहरेवरो थियो, तीं तैसेरे प्राणा केरे बदले अपने प्राण ते प्रजारे बदले अपनि प्रजा देनी पेली।’" 43 तैखन इस्राएलेरो राज़ो अहाब उदास ते नाराज़ भोइतां अपने घरेरे पासे च़लो, ते सामरिया नगरे जो च़लो जेव।