1 बाशा राज़ेरे इस्राएले मुल्खे पुड़ राज़ केरनेरे दौरान, तैसेरे बारे मां यहोवारू एन वचन हनानी एरे मट्ठे येहू नबी कां पुज़्ज़ू, 2 "मीं तू मित्ती पुड़ेरां खड़ो केरतां अपने इस्राएली लोकां केरो प्रधान बनाव, पन तू यारोबामेरी ज़ेरि चाल च़लतो राव, ते मेरे इस्राएली लोकन करां भी पाप करातो राहोरोस, ज़ैन सेइं तैना मीं सरकातन। 3 एल्हेरेलेइ शुन, अवं बाशा ते तैसेरे घरानेरी पूरे तरीके सेइं सफाई केरि देइलो, ते तेरे घराने भी नबातेरे मट्ठे यारोबामेरे ज़ेरो केरेलो। 4 बाशारे घरानेरो ज़ै कोई नगरे मां मेरि गालो, तैस कुतरां खालां, ते तैसेरो कोई अगर मैइदाने मां मेरि गालो, तैस इल्‍लां-कंव्वां खालां।"

5 बाशारां तैना सारां कम्मां ज़ैना तैनी कियोरां थियां, ते तैसेरी बहादरी ज़ै तैनी कियोरी थी तै इस्राएलेरे राज़ां केरे इतिहासेरी किताबी मां लिखोरीए। 6 ज़ैखन बाशा अपने दादे-पड़दादां केरो ज़ेरो मेरि जेव, तै तिर्सा नगरे मां दब्बो जेव, ते तैसेरू मट्ठू एला तैसेरी जगाई पुड़ राज़ो बनू। 7 यहोवारू ज़ैन वचन हनानी एरे मट्ठे येहू नेबेरे ज़िरिये बाशा ते तैसेरे घरानेरे खलाफ अऊं, तैन न सिर्फ तैन बुरैई केरे ज़िरिये अऊं ज़ैना तैनी यारोबामेरे घरानेरे ज़ेरे भोइतां यहोवारी नज़री मां कियोरू थियूं, ते अपने कम्मन सेइं तै सरकावरो थियो, बल्के एस वजाई सेइं भी कि तैनी तै मारोरो थियो।

8 यहूदारे राज़े आसारे राज़ेरे शैबिहीयोवं साले मां बाशारू मट्ठू एला तिर्सा नगरे मां इस्राएल मुल्खे पुड़ राज़ो बनो, ते तैनी दूई साल राज़ कियूं। 9 ज़ैखन तै तिर्सा नगरे मां अर्सा नंव्वेरे एक्‍की भण्डारी मैन्हेरे घरे थियो, ते तै तिर्सा नगरेरे मेहलेरो प्रधान थियो, तै पीतां मसत भोव, तैखन जिम्री नंव्वेरे एक्‍की अधिकैरे ज़ै तैसेरे अध्धे रथां केरो प्रधान थियो, 10 बगावतरी साज़िश की ते अन्तर गेइतां मारो ते तैसेरे ठैरी पुड़ राज़ो बनो। इन यहूदा प्रदेशेरे आसारे राज़ केरनेरे सताइयोवं साले मां भोवं।

11 ते ज़ैखन तै राज़ केरने लगो, त तखते पुड़ बिशते तैनी बाशारू पूरू खानदान मैरी छ़डू, बल्के तैनी कोई भी मट्ठू तैसेरे खानदाने मरां ते तैसेरे दोस्तन मरां ज़ींतू न छ़डू। 12 एस वजाई सेइं यहोवारे तैस वचनेरे मुताबिक ज़ैन तैनी येहू नेबेरे ज़िरिये बाशारे खलाफ ज़ोवरू थियूं, जिम्रीए बाशारो सारो घरानो नाश कियो। 13 एसेरी ऐह वजा आहे कि बाशारे तैना सारे पाप ते तैसेरे मट्ठे एलारे भी पाप थिये, ज़ैना तैनेईं एप्पु भी केरतां ते इस्राएली लोकन करां भी करेइतां ते मूरती पूज़ा केरतां इस्राएलेरो यहोवा परमेशर सरकावरो थियो। 14 एला राज़ेरां बाकी तैना सारां कम्मां ज़ैना तैनी कियोरां थियां तैना इस्राएलेरे राज़ां केरे इतिहासेरी किताबी मां लिखोरन।

15 यहूदारे राज़े आसारे सताइयोवं साले मां जिम्री तिर्सा नगरे मां राज़ केरने लगो, ते तिर्सा मां सत दिहाड़े राज़ कियूं। तैस मौके लोकेईं पलिश्ती केरे मुल्ख गिब्बतोन नगरेरे खलाफ डेरे लेवरे थिये। 16 त ज़ैखन डेरे लेवरे लोकेईं एन शुनू, कि जिम्रीए राज़ेरे खलाफ बगावत केरतां राज़ो मारोरोए, त तैन्ने दिहाड़न मां सारे इस्राएली लोकेईं ओम्री नंव्वेरो प्रधान सेनापति थियो, डेरन मां इस्राएली लोकेईं तै राज़ो बनाव। 17 तैखन ओम्री गेइतां ते सारे इस्राएली लोक साथी नेइतां गिब्बतोन नगर छ़ेडतां तिर्सा नगरे घेरो दित्तो। 18 ज़ैखन जिम्रीए हेरू, नगरे पुड़ कब्ज़ो भोइ जेवरोए, तैखन तैनी मेहले मां गेइतां मेहले अग लाई ते एप्पु भी तैस्से मां फुकोइतां मेरि जेव। 19 एन तैसेरे पापां केरि वजाई सेइं भोवं किजोकि तैनी तैन कियूं ज़ैन यहोवारी नज़री मां बुरू थियूं, किजोकि तै यारोबामेरी चाली पुड़ च़लो ते एप्पु भी पाप केरतां ते इस्राएली लोकन करां भी करेइतां पाप केरतो च़लो। 20 जिम्री एरां बाकी कम्मां ते ज़ै तैनी राज़ेरे खलाफ बगावत की, एन सब इस्राएलेरे राज़ां केरे इतिहासेरी किताबी मां लिखेरूए।

21 तैखन इस्राएली लोक दूई हिस्सन मां बेन्टोई जे, अधे लोक तिब्नी नंव्वे गीनतेरू मट्ठू राज़ो बनानो चाते थिये, ते अधे ओम्री राज़ो बनाने चाते थिये। 22 आखरी मां ज़ैना लोक ओम्री राज़ो बनाने चाते थिये, तैना तैन करां ज़ींती जे ज़ैना गीनतेरे मट्ठे राज़ो बाने चाते थिये, तैखन तिब्नी मारो जेव एल्हेरेलेइ ओम्री राज़ो बेनि जेव। 23 यहूदारे राज़े आसा ईकतियोवं साले मां ओम्री इस्राएले पुड़ राज़ केरने लगो, ते तैनी 12 साल राज़ कियूं; तैनी शा साल तिर्सा नगरे मां राज़ कियूं। 24 ते तैनी शेमेरे करां सामरिया पहाड़ 70 किल्‍लो चाँदी देइतां घिन्तां तैस पुड़ अक नगर बसाव; ते तैस नगरेरू नवं पहाड़ेरे मालिक शेमेरे नंव्वे पुड़ सामरिया रख्खू।

25 पन ओम्रीए तैन्ने कियूं ज़ैन यहोवारी नज़री मां बुरू थियूं, बल्के ज़ैना तैस करां पेइले राज़े थिये तैन करां भी जादे बुराई की। 26 तै नबातेरे मट्ठे यारोबामेरी ज़ेरि चाली पुड़ च़लतो, ते तैसेरे सेभी पापां केरे मुताबिक ज़ैना तैनी इस्राएली लोकन करां भी करावरे थिये ज़ेसेरे वजाई सेइं इस्राएलेरे यहोवा परमेशर मूरती पुज़ा केरतां सरकावरो थियो। 27 ओम्री एरां बाकी सब कम्मां ज़ैना तैनी कियां, ते ज़ै बहादरी तैनी हिराई, एन सब इस्राएलेरे राज़ां केरे इतिहासेरी किताबी मां लिखेरूए। 28 ओम्री अपने दादे-पड़दादां केरो ज़ेरो मेरि जेव, ते सामरिया नगरे मां तै दब्बो जेव, ते तैसेरू मट्ठू अहाब तैसेरी जगाई पुड़ राज़ केरने लगू।

29 यहूदा प्रदेशेरे राज़े आसारे राज़ केरनेरे अठेतियोवं साले मां ओम्रीएरू मट्ठू अहाब इस्राएले पुड़ राज़ केरने लगू, ते इस्राएले पुड़ सामरिया नगरे मरां 22 सालन तगर राज़ केरतो राव। 30 ते ओम्री एरे मट्ठे अहाबे तैन सेभन करां जादे बुरू कम कियूं, ज़ैना तैस करां पेइले राज़े थिये, तैन करां भी जादे यहोवारी नज़री मां बुरू कियूं। 31 तैनी त नबातेरे मट्ठे यारोबामेरे पापन मां च़लनू त अक निकड़ी गल सेमझ़तां, सीदोनी केरे राज़ो एतबालेरी कुई ईजेबेल सेइं ड्लाह बनेइतां बाल देबतेरी पूज़ा की ते तैन कां मथ्थो टेको।✝ 32 तैनी बाल देबतेरू अक सामरिया नगरे मां मन्दर बनेइतां तैस मां बाल देबतेरे लेई अक वेदी बनाई। 33 ते अहाब राज़े अशेरा देबरी अक मूरती भी बनाई, सिर्फ एत्रू नईं बल्के तैनी तैन सब इस्राएली राज़न करां भी जादे बेद्धतां ज़ैना तैस करां भी पेइले थिये, इस्राएलेरे परमेशर यहोवा सरकानेरां कम्मां कियां। 34 तैसेरे राज़ केरनेरे दिहाड़न मां बेतेल नगरे मां रानेबाले हीएले यरीहो नगर फिरी बसावं; ज़ैखन तैनी तैसेरी मुनीयाद रख्खी तैखन तैसेरू बड्डू मट्ठू अबीराम मेरि जेवं, ते ज़ैखन तैनी तैसेरे फाटक खड़े किये तैखन तैसेरू निकड़ू मट्ठू सगूब मेरि जेवं, एन यहोवारे तैस वचनेरे मुताबिक भोवं, ज़ैन तैनी नूनेरे मट्ठे यहोशूएरे ज़िरिये ज़ुवावरू थियूं।✝