2 शमूएल 24

दाऊद लोकां केरि गिनती केरते

1 एक्‍की फेरे यहोवारी सरक इस्राएलन पुड़ फिरी भड़की, ते तैनी दाऊद तैन केरे नुक्सानेरे लेई एन ज़ोइतां उभारो, "कि इस्राएल ते यहूदारे लोकां केरि गिनती केर।" 2 एल्हेरेलेइ राज़े योआब सेनापति सेइं ज़ोवं ज़ै तैस कां थियो, "तू दान नगरे उत्तरे करां लेइतां बेर्शेबा नगरेरे दक्षिणे तगर रानेबाले सारे इस्राएली गोट्लन मां इरां-उरां हेंठतां, ते तैन लोकां केरि गिनती केर, ताके मीं पतो च़ले कि केत्रे लोक आन।" 3 पन योआबे राज़े सेइं ज़ोवं, "लोक ज़ेत्रे भी कि न भोन, तेरो परमेशर यहोवा तैन शौव गुणा बधाए, ते मेरो मालिक राज़ो एन अपनि एछ़्छ़न सेइं भी लाहे; पन, हे मेरे मालिक, हे राज़ा, ऐह गल तू किजो चातस?" 4 फिरी भी राज़ेरो हुक्म योआब ते सेनापेतन मन्नो पेव। योआब ते सेनापति राज़ेरे सामनेरां इस्राएली लोकां केरि गिनती केरनेरे लेई निस्सी जे। 5 तैनेईं यरदन दरियारे पार गेइतां अरोएर नगरेरे देइने पासे डेरे खड़े किये, ज़ै गादेरे*24:5 गादसारे गोट्लेरे लोकां केरे बारे मां इशारो केरते। वैदरे मझ़ाटे ते याजेर नगरेरे पासे। 6 तैखन तैना गिलाद प्रदेशे मां ते तहतीम्होदशी नंव्वेरे मुल्खे मां जे, फिरी दान्याने जो जे, ते चक्‍कर लेइतां सीदोन नगरे मां पुज़्ज़े; 7 तैखन तैना सोर नंव्वेरे मज़बूत क़िले, ते हिब्बी ते कनानी लोकां केरे सारे नगरन मां जे; ते तैनेईं यहूदा प्रदेशेरे दक्षिणे मां बेर्शेबा मां दौरो खतम कियो। 8 एन्च़रां सेइं सारे मुल्खे मां इरां-उरां हेंठतां फिरतां तैना नौ महीने ते बीह दिहाड़े बीतने पुड़ यरूशलेम नगरे जो वापस आए। 9 तैखन योआबे लोकां केरि गिनतरो जोड़ राज़े सेइं ज़ोव; ते तलवार च़लनेबाले बहादर इस्राएलेरे त अठ लख, ते यहूदारे पंच़ लख निस्से।

10 लोकां केरि गिनती केरनेरां पत्ती दाऊदेरो मन उदास भोव। ते दाऊदे यहोवा सेइं ज़ोवं, "इन कम ज़ैन मीं कियूं तै त महापापे। ते हुनी, हे यहोवा, अपने दासेरो पाप माफ़ केर; किजोकि मीं करां बड़ी बेवकूफी भोवरीए।" 11 झ़ेझ़ां ज़ैखन दाऊद उठो, तैखन यहोवाए गाद नेबी सेइं ज़ोवं ज़ै दाऊदेरो दर्शी थियो, 12 "गेइतां दाऊदे सेइं ज़ो, ‘यहोवा इन ज़ोते, कि अवं तीं ट्लाई आफतां हिराताईं; तैन मरां अक च़ुन, कि अवं तैस तीं पुड़ छ़ेडी।’" 13 गाद नेबे दाऊदे कां गेइतां एसेरी खबर दित्ती, ते तैस पुछ़ू, "कुन तेरे मुल्खे मां सत सालन तगर काल पे? या ट्लाई महीने तगर तेरे दुश्मन तेरो पीछो केरते रान ते तू तैन करां नशतो रास? या तेरे मुल्खे मां ट्लाई दिहाड़े महामारी फैलती राए? हुनी सोच विचार केर, कि अवं अपने भेज़ने बाले कुन जुवाब देईं।" 14 दाऊदे गाद नेबी सेइं ज़ोवं, "अवं बेड़ि मुश्किली मां आईं; असां यहोवारे हथ्थे मां गाम, किजोकि तैसेरी दया बड़ीए; पन मैन्हेरे हथ्थे मां अवं न पेइलो।"

15 तैखन यहोवा इस्राएलन मां झ़ेझ़ां करां लेइतां ठहरावरे वक्ते तगर महामारी फैलातो राव; ते दाने करां लेइतां बेर्शेबा तगर रानेबाले लोकन मरां 70000 मड़द मेरि जे। 16 पन ज़ैखन दूते यरूशलेम नगरेरो नाश केरनेरे लेई अपनो हथ अग्रोवं कियो, तैखन यहोवा तै आफत छ़ेडतां पसताव, ते लोकन नाश केरनेबाले दूते सेइं ज़ोवं, "बस केर; हुनी अपनो हथ पत्रोवं केर।" यहोवारो दूत तैस वक्ते अरौना नंव्वेरे एक्‍की यबूसेरे खलाड़ी मां थियो। 17 ते ज़ैखन लोकन नाश केरनेबालो दूत दाऊदे लाव, तैखन तैनी यहोवा सेइं ज़ोवं, "हेर, पाप त मीं कियोरोए, ते बुराई भी मीएं कियोरीए; पन एन भैड्डेईं कुन कियोरूए? एल्हेरेलेइ तेरो हथ मेरे ते मेरे बाजी केरे घरानेरे खलाफ भोए।"

18 तैस्से दिहाड़े गाद नेबे दाऊदे कां एइतां तैस सेइं ज़ोवं, "गेइतां अरौना यबूसेरे खलाड़ी मां यहोवारे लेई अक वेदी बनावा।" 19 एल्हेरेलेइ दाऊदे यहोवारे हुक्मेरे मुताबिक गाद नेबेरी ई गल मेनतां तैड़ी जेव। 20 ज़ैखन अरौना हेरू कि दाऊद अपने सेवकन सने मेरे पासे एवरोए, तैखन अरौना निस्तां ज़मीनी पुड़ तुत्तरेरे भारे राज़े कां झुको। 21 ते अरौना ज़ोने लगो, "मेरो मालिक राज़ो अपने दासे कां किजो एवरोस?" दाऊदे ज़ोवं, "तीं करां ई खलाड़ घिन्नेरे लेई एवरोईं, कि यहोवारे लेई अक वेदी बनावेईं, एल्हेरेलेइ कि ई महामारी लोकन पुड़ेरां दूर की गाए।" 22 अरौना दाऊदे सेइं ज़ोवं, "मेरो मालिक राज़ो ज़ैन किछ तैस रोड़ू लगते तैस नेइतां च़ाढ़े; हेर, होमबलि देनेरे लेई त दांत भी आन, ते फसल मडनेरे लेई संदरां, ते दांतां केरू सामान अग बालनेरे कम्मे एज्जेलू।" 23 एन सब अरौनाने राज़े दित्तू। फिरी अरौना राज़े सेइं ज़ोवं, "तेरो परमेशर यहोवा तेरी च़ढ़तल कबूल केरे।" 24 पन राज़े अरौना सेइं ज़ोवं, "एरू नईं, अवं इना चीज़ां तीं करां ज़रूर कीमत देइतां नेइलो; अवं अपने परमेशर यहोवा जो मुफतेरी होमबलि न च़ेढ़ी।" तैखन दाऊदे तै खलाड़ ते दांतां केरि कीमत चैंदरे 50 सिक्‍के देइतां घिन्नी। 25 ते दाऊदे तैड़ी यहोवारे लेई अक वेदी बनावेइतां होमबलि ते मेलबलि च़ाढ़ी। ते यहोवाए मुल्खेरे लेई बिनती शुनी, तैखन तै महामारी इस्राएले पुड़ेरां दूर भोइ जेई।