1 दाऊद राज़ो अपने नंव्वे मेहले मां राने लगो। यहोवा तैसेरे च़ेवरे पासां केरे सारे दुश्मन करां आराम दित्तो। 2 एक्सां दाऊद राज़े नातान नेबी सेइं ज़ोवं, "हेर, अवं त गैइड़ेरी लेकड़ी सेइं बनोरे मेहले मां रहताईं, पन परमेशरेरो सन्दूख तेम्बु मां रहते।" 3 नातान नेबे दाऊद राज़े सेइं ज़ोवं, "ज़ैन किछ तेरे दिले मांए तैन्ने केर; किजोकि यहोवा तीं सेइं साथीए।"

4 पन तैस्से राती यहोवा नातान नेबी सेइं ज़ोवं, 5 "मेरे दास दाऊदे कां गेइतां ज़ो, ‘यहोवा एन ज़ोते, कि तू मेरे लेई भवन न बनेई सकस। 6 ज़ैस दिहाड़े मीं इस्राएली लोक मिस्र मुल्खे मरां केढतां आनोरे थिये अज़्ज़ेरे दिहाड़े तगर अवं कोन्ची घरे मां नईं राहोरो, तेम्बु मां एइतो-गातो रहताईं। 7 ज़ैड़ी-ज़ैड़ी अवं सारे इस्राएली लोकां केरे दरमियान फिरतो राव, कुन मीं कोन्ची इस्राएली केरे कोन्ची प्रधाने* सेइं, ज़ैना मीं अपने इस्राएली लोकां केरि पुहाली केरनेरे लेई रख्खे, एरी गल कोन्ची सेइं ज़ोई, कि तुस मेरे लेई गैइड़ेरी लेकड़रू घर बनाथ।’ 8 एल्हेरेलेइ हुनी तू मेरे सेवक दाऊदे सेइं एन्च़रे ज़ो, ‘सेनां केरो यहोवा इन ज़ोते, कि मीं त तू चरागा मरां, ते भैड्डां-छ़ेल्‍ली केरे पत्ती-पत्ती च़लने करां, एस इच्छाई सेइं कुजव कि तू मेरे इस्राएली लोकां केरो प्रधान भोस।✝ 9 ते ज़ैड़ी-ज़ैड़ी तू जेव, तैड़ी-तैड़ी अवं तीं सेइं साथी राव, ते तेरे बड़े दुश्मन तेरे सामनेरां नाश किये; फिरी अवं तेरू नवं धेरती पुड़ेरे बड्डे-बड्डे लोकां केरे नंव्वेरू ज़ेरू महान केरेलो। 10 ते अवं अपने इस्राएली लोकां केरे लेई अक ठार च़ुनेलो, अवं तैन्न तैड़ी बसेइलो ते तैना तैड़ी राले, ते तैना फिरी सताए न गाले। बुरे लोक तैन्न फिरी दुख न देइ बटेले, ज़ेन्च़रे पेइले देते थिये। 11 ज़ैखन मीं अपने इस्राएली लोकां केरे लेई न्यायी ठहरावरे थिये। अवं तीं तेरे सारे दुश्मन्न करां आराम देइलो। ते यहोवा इन भी ज़ोते कि यहोवा तेरू घर बनेइतां* रखेलो। 12 ज़ैखन तेरी उमर पूरी भोइ गाली, ते तू अपने दादे-पड़दादन सेइं साथी मिली गालो, तैखन अवं तेरे मट्ठन मरां एक्‍की खड़े केरतां तैसेरू राज़ कायम केरेलो। 13 तैए मेरे लेई भवन बनालो, ते अवं तैसेरो तखत हमेशा कायम रेखेलो।✝ 14 अवं तैसेरो बाजी भोल्हो, ते तैन मेरू मट्ठू भोल्हु। अगर तै अधर्म केरे, त अवं तैस मैन्हु केरे बराबर सज़ाह देइलो, ते मैन्हु केरि ज़ेरि नसीहत देइलो।✝ 15 पन मेरी दया तैस पुड़ेरां एन्च़रे न टलेली, ज़ेन्च़रे मीं शाऊले पुड़ेरां दूर कियोरी थी, ते तै तेरे सामनेरां दूर कियोरो थियो। 16 तेरो घरानो ते तेरू राज़ मेरे सामने हमेशा बनोरू रालू; तेरी राज़गद्दी हमेशा बनोरी राली।’"✝ 17 इन सब गल्‍लां ते एस दर्शनेरे मुताबिक नातान नेबे दाऊदे ज़ोवं।

18 तैखन दाऊद राज़ो तेम्बु मां अन्तर जेव, ते यहोवारे सामने बिश्शो। ते ज़ोने लगो, "हे प्रभु यहोवा, कुन ज़ोई, ते मेरो घरानेरो कुने, कि तीं अवं इड़ी तगर पुज़व? 19 फिरी भी, हे प्रभु यहोवा, ई तेरी नज़री मां निकड़ी ज़ेरि गल थी; किजोकि तीं अपने दासेरे घरानेरे बारे मां एजने बाले बड़े दिहाड़ां केरि चर्चा कियोरीए, हे प्रभु यहोवा, ई त मैन्हेरो नियमे। 20 दाऊद तीं सेइं होरू कुन ज़ोई सकते? हे प्रभु यहोवा, तू त अपने दासे ज़ानतस! 21 तीं अपने वचनेरे खातर ते अपने मनेरे मुताबिक, इन बड्डू कम कियोरूए, कि तेरे दासे पतो च़ले। 22 एस वजाई सेइं, हे यहोवा परमेशर, तू महानस; किजोकि ज़ैन किछ असेईं अपने कन्ने सेइं शुनेरूए, तैसेरे मुताबिक तेरो ज़ेरो कोई नईं, ते न तेरे अलावा होरो कोई परमेशरे। 23 फिरी तेरे इस्राएली लोकां केरो ज़ेरो भी कौने? तै त सैरी धेरती पुड़ अक्‍के कौमे ज़ैना परमेशरे अपने खास लोक बन्नेरे लेई छुटाए, एल्हेरेलेइ कि तै अपनु नवं केरे, (ते तुश्शे लेई बड्डां-बड्डां कम्मां केरे) ते तू अपने लोकां केरे सामने, ज़ैना तीं मिस्री केरि कौमां-कौमां केरे लोकन करां ते तैन केरे देबतन करां छुटेइतां आने, ते अपने मुल्खेरे लेई डरानेबालां कम्मां कियां। 24 ते तीं अपने इस्राएली लोक हमेशारे लेई अपने लोक भोनेरे लेई च़ुने। ते हे यहोवा, तू एप्पु तैन केरो परमेशरस। 25 हुनी हे यहोवा परमेशर, तीं ज़ै वाधो अपने दासे ते तैसेरे घरानेरे बारे मां कियोरोए, तैस हमेशारे लेई अटल केर, ते अपने वाधेरे मुताबिक केर; 26 ते इन ज़ोइतां कि लोक तेरे नव्वेंरी हमेशा महिमा केरते रान, कि सेना केरो यहोवा इस्राएले पुड़ परमेशरस; ते तेरे दास दाऊदेरो घरानो तेरे सामने अटल राए। 27 किजोकि, हे सेनां केरे यहोवा, हे इस्राएलेरे परमेशर, तीं एन ज़ोइतां अपने दासे पुड़ बांदू कियोरूए, कि अवं तेरू घर बनेइतां रखेलो; इस वजाई सेइं तेरे दासे तीं करां ई प्राथना केरनेरी हिम्मत भोवरीए। 28 हुनी हे प्रभु यहोवा, तूए परमेशरस, ते तेरू वचन सच़्च़ू आहे, ते तीं अपने दासे सेइं ई भलियाई केरनेरो वाधो कियोरोए 29 त हुनी खुशी भोइतां अपने दासेरे घराने पुड़ एरी बरकत दे, कि तै तेरे सामने हमेशा बनोरोए राए; किजोकि, हे प्रभु यहोवा, तीं एन्च़रे ज़ोवरूए, ते तेरे दासेरो घरानो तेरी बरकत मैलतां हमेशा धन राए।"