2 शमूएल 22

दाऊदेरू अक भजन

1 ज़ैस वक्ते यहोवा दाऊद तैसेरे सारे दुश्मन्न ते शाऊलेरे हथ्थे करां बच़ावरो थियो, तैस मौके तैनी यहोवारे लेई इन गीत ज़ोवं:✝22:1 1 शमू. 23:7-14. 2 तैनी ज़ोवं,

"यहोवा मेरी चट्टान, ते मेरो गढ़, ते मेरो छुटानेबालोए,

3 मेरो परमेशर मेरी चट्टाने, ज़ेसेरी शरणी मां अवं एवरोईं।

मेरी ढाल, मेरो बच़ानेबालो शिंग, ते मेरो उच्‍चो गढ़, ते मेरी छ़पनेरी ठार,

हे मेरे मुक्ति देनेबाला, तू मीं ज़ुलमे करां बच़ातस।✝22:3 भज. 18:2;लूक. 1:69.

4 अवं यहोवा पुकारेलो ज़ै तारीफ़रे काबले,

ते अवं अपने दुश्मन्न करां बच़ाव गालो।

5 मौतरी छ़ेलहेईं अवं च़ेवरे पासना घेरोरोईं,

विनाशेरे सैलाभेईं अवं घबरावरोईं;

6 पातालेरी रेस्सी मेरे च़ेवरे पासन थी,

मौतरे फंदे मेरे सामने थिये।✝22:6 भज. 116:3.

7 पन मीं मुसीबती मां यहोवा कां प्राथना की;

ते अपने परमेशरेरे सामने चिन्डां मैरी।

तैनी मेरी गल अपने मन्दरे मरां शुनी,

ते मेरी फरियाद तैसेरे कन्ने तगर पुज़्ज़ी।

8 तैखन धरती हिल्‍ली जेई ते कम्बने लगी;

ते अम्बरेरी मुनीयाद थेरकतां बड़ी जादे हिलने लगी,

किजोकि परमेशर बड़ो क्रोधे थियो।

9 तैसेरे नक्‍के मरां तू निस्सो,

ते तैसेरे ऐशी मरां अग निस्तां फुकतां भस्म केरने लगी;

ज़ैस सेइं अंगारां भेखी जेआं।✝22:9 भज. 97:3.

10 ते तै अम्बरे झुकेइतां बुन अव;

ते तैसेरे पव्वन हैठ बड़ू अंधकार पेई जेव।

11 तै करूबे पुड़ सुवार भोइतां उडरो,

ते हवारे फंघन पुड़ च़ैढ़तां लेइहोव।

12 तैनी अपने च़ेवरे पासन आंधरू घनी बिदलारी,

ते अम्बरेरी काली बिदलार अपनो तेम्बु बनाव।

13 तैसेरे सामनेरे महिमा सेइं,

मूरां बलने लगां।

14 यहोवा अम्बरे मरां गरज़ो,

ते परमप्रधान परमेशरे अपनि आवाज़ शुनाई।

15 तैने तीर च़लेइ-च़ेलतां दुश्मन तितर-बितर भोए,

ते अम्बर गुड़ने लगू ते तैना पस्त भोइ जे।

16 तैखन सुमन्दरेरो थलो लेइहोने लगो,

ते दुनियारी बुनियादां खुल्‍ली जेई, इन त यहोवारे डांटी सेइं,

ते तैसेरे नक्‍केरे शाहे सेइं भोवं।

17 तैनी बां हथ अग्रोवं केरतां अवं ठम्मो,

ते अवं डुग्घे पैनी मरां खिचतां बेइर कढो।

18 तैनी अवं मेरे ताकतबर दुश्मने करां,

ते मीं सेइं बैर रखनेबालन सेइं, ज़ैना मीं करां जादे ताकतबर थिये, अवं छुटाव।

19 तैनेईं मेरे मुसीबतरे दिहाड़े मेरो सामनो त कियो;

पन यहोवा मेरो सहारो थियो।

20 तैनी अवं केढतां तैस ठैरी पुज़व ज़ैड़ी खतरो न भोए;

तैनी अवं छुटाव, किजोकि तै मीं पुड़ खुशी थियो।

21 यहोवा मेरी धार्मिकतारे मुताबिक मीं सेइं बर्ताव कियो;

ते मेरे शुद्ध कम्मां केरे मुताबिक तैनी मीं बदलो दित्तो।

22 किजोकि अवं यहोवारे बत्तन पुड़ च़लतो राव,

ते अपने परमेशरे करां तुत्तर फिरेइतां दुष्टी न बनो।

23 तैसेरे सारे नियम त मेरे सामने बनोरे राए,

ते अवं तैसेरे कानूने करां दूर न भोव।

24 अवं तैस सेइं साथी सच़्च़ो बनोरो राव,

ते अपनो आप अधर्मे करां बच़ेइतां रख्खो,

ज़ैस मां मेरे फसनेरो डर थियो।

25 एल्हेरेलेइ यहोवा मेरे धार्मिकतारे मुताबिक बदलो दित्तो,

मेरी तैस शुद्धतारे मुताबिक ज़ैस तै लहतो थियो।

26 वफादारे सेइं साथी तू अपने आपे वफादार हिरातस;

ते सच़्च़े मैन्हु सेइं साथी तू अपनो आप सच़्च़ो हिरातस;

27 शुद्ध मैन्हु सेइं साथी तू अपनो आप शुद्ध हिरातस;

ते टारे मैन्हु सेइं साथी तू टारो बनतस।

28 ते दीन लोकन त तू बच़ातस,

पन घमण्डी लोकन पुड़ नज़र देइतां तैन उन्ढे केरतस।✝22:28 लूक. 1:51-52.

29 हे यहोवा, तूए मेरो दीयो आस,

ते यहोवा मेरे आंधरे दूर केरतां लौ बनाते।

30 तेरी मद्दती सेइं अवं दुश्मन्न पुड़ हमलो केरताईं,

ते अपने परमेशरेरी मद्दती सेइं अवं शहरपनाही लंघतईं।

31 परमेशरेरी बत सिद्धे;

यहोवारू वचन तेवरूए;

तै तैन सेभी केरि ढाले ज़ैना तैस पुड़ भरोसो रखतन।

32 यहोवारे अलावा कुन कोई परमेशरे?

इश्शे परमेशरेरे अलावा कुन कोई होरि चट्टाने?

33 ई तैए परमेशरे, ज़ै मेरो मज़बूत क़िलो आहे,

तै सच़्च़े मैन्हु अपने बत्ती पुड़ नेइतां च़लाते।

34 तै मेरे पव्वन हिरनरे पव्वां केरे ज़ेरे दौड़ने बाले बनाते,

ते मीं उच्‍चे ठैरी पुड़ खड़ो केरते।

35 तै मीं जंग केरनी शिखालते,

इड़ी तगर कि मेरी पैखड़ी पितलरे धनुषे लेकतिन।

36 तीं त मीं अपने मुक्तरी ढाल दित्तोरीए,

ते तेरी दया मीं बद्धातीए।

37 तू मेरे पव्वां केरे लेई खुल्‍ली ठार बनातस,

ते मेरे पव न घिश्कन।

38 मीं अपने दुश्मना केरो पीछो केरतां तैन केरो सत्यानाश कियो,

ते ज़ांतगर तैन केरो खातमो न कियो तांतगर वापस न अव।

39 मीं तैन केरो खातमो कियो;

ते तैना एरे च़ीरे कि तैना उठी न सखन;

बल्के तैना त मेरे पव्वन हैठ बिछ़ड़ी जेवरेन।

40 तीं जंगरे लेई मेरू लख मज़बूत कियूं;

ते मेरी खलाफत केरनेबाले मेरे सामने पस्त केरतां छ़डे।

41 ते तीं मेरे दुश्मना केरि पिठ मीं हिराई,

ताके अवं अपने दुश्मन्न छ़िन्दी छ़ेडी।

42 तैनेईं इंतज़ार त कियो, पन कोई बच़ानेबालो न मैल्हो;

तैनेईं यहोवारो भी इंतज़ार कियो,

पन तैनी भी कोई जुवाब न दित्तो।

43 तैखन मीं तैना मेड्डी-मेड्डी तल्‍लेरी धूड़रे ज़ेरे केरि छ़डे,

मीं तैना सड़कां ते गेली केरे च़िकरारे ज़ेरे उछ़ड़ेइतां च़ेवरे पासन खिलारे।

44 फिरी तीं अवं अपने लोकां केरे झगड़न करां छुटेइतां गैर कौमां केरो प्रधान भोनेरे लेई मेरी हिफाज़त की;

ज़ैन लोकन अवं न थियो ज़ानतो तैना भी मेरे अधीन भोइ गाले।

45 परदेशी मेरी चापलूसी केरेले;

तैना मेरू नवं शुन्तां मेरे कैबू मां एज्जेले।

46 परदेशी हिम्मत हारेले,

ते अपने क़िले मरां थरकते निसेले।

47 यहोवा ज़ींतोए; मेरी चट्टान धने,

ते परमेशर ज़ै मेरी मुक्तरी चट्टाने, तैसेरी तारीफ़ भोए।

48 धने मेरो बदलो नेनेबालो परमेशर,

ज़ै मुल्खे-मुल्खेरे लोकन मेरे कब्ज़े मां केरते,

49 ते मीं मेरे दुश्मना केरे मझ़ाटेरां कढते;

हाँ, तू मीं मेरे मुखालफन करां उच्‍चो केरतस,

ते ज़ुलम केरनेबाले मैन्हु करां बच़ातस।

50 एल्हेरेलेइ हे यहोवा, अवं कौमां-कौमां केरे लोकां केरे सामने तेरू शुक्र केरेलो,

ते तेरे नंव्वेरू भजन ज़ोइलो।✝22:50 भज. 18:49.

51 तै अपने ठहरावरे राज़ेरो बड़ो छुटकारो केरते,

तै अपने अभिषिक्त दाऊद, ते तैसेरे खानदाने

पुड़ हमेशा दया केरतो रालो।"