1 दाऊदे ज़ैन कियोरू थियूं तैसेरे वजाई सेइं यहोवा नाराज़ थियो, तैखन यहोवा दाऊदे कां नातान नबी भेज़ो, तैनी दाऊदे कां एइतां ज़ोवं, "एक्‍की नगरे मां दूई मैन्हु रहते थिये, अक अमीर ते अक गरीब थियो। 2 अमीरे कां त बेड़ी जादे भैड्डां-छ़ेल्‍ली ते बेछ़ी दांत थिये; 3 पन गरीबे कां एक्‍की निकड़ी गेबड़रे अलावा होरू किछ भी न थियूं, ते तैनी तै मुल्‍ले घिन्तां पालोरी थी। तै तैसेरे बाल-बच्‍चन साथी बेडोरी थी; ते तै तैस सेइं साथी रोट्टी खाती थी, ते तैसेरे कुटोरे मां पीती थी ते तैसेरे कुम्मे मां झ़ुलती थी, ते तै तैसेरी कुइयरे ज़ेरि थी। 4 एक्सां अमीरेरे कां अक मुसाफर अव, ते तैनी तैस मुसाफरेरे लेई रोट्टी बनावानेरे लेई एपनी भैड्डां-छ़ेल्‍लन या दांत बेछ़न मरां किछ न आनू, पन तैस गरीब मैन्हेरी गबड़ी नेइतां तैस मैन्हेरे लेई, ज़ै तैसेरे कां एवरो थियो, रोट्टी बनावाई।" 5 ज़ैखन दाऊदे इन शुनू तैखन दाऊदे तैस मैन्हु पुड़ बड़ो क्रोध भड़को; ते तैनी नातान नेबी सेइं ज़ोवं, "यहोवारे ज़िन्दगरी कसम, ज़ैनी मैन्हें एन कम कियोरूए तै मौतरे सज़ारे काबले; 6 ते तैस मैन्हु तैस गेबड़रो च़ुगनो नुकसान भरनो पेलो, किजोकि तैनी एरू कम कियोरूए, ते तैस पुड़ दया न की।" 7 तैखन नातान नेबे दाऊदे सेइं ज़ोवं, "तै मैन्हु तू आस। इस्राएलेरो परमेशर यहोवा इन ज़ोते, ‘मीं तू शाऊलेरे हथ्थन करां बच़ाव ते मीं तेरू अभिषेक केरतां इस्राएलेरो राज़ो बनाव; 8 फिरी मीं तेरे मालिकेरो भवन त तैसेरी कौन्शां तीं दित्ती; ते मीं इस्राएल ते यहूदारो घरानो तीं दित्तोरोए; ते अगर इन थोड़ू थियूं, त अवं तीं बड़ू किछ देनेबालो थियो। 9 तीं यहोवारो हुक्म घटिया सेमझ़तां किजो तैन कम कियूं, ज़ैन तैसेरी नज़री मां बुरू थियूं? हित्ती ऊरिय्याह तीं तलवारी सेइं माराव, ते तैसेरी कौन्श अपनि कौन्श बनाई, ते ऊरिय्याह अम्मोनी केरि तलवारी सेइं माराव। 10 एल्हेरेलेइ हुनी तलवार तेरे घरे करां कधी दूर न भोल्ही, किजोकि तीं अवं घटिया सेमझ़तां हित्ती ऊरिय्याहेरी कौन्श अपनि कौन्श बनाई।’ 11 यहोवा इन ज़ोते, ‘शुन, अवं बुराई तेरे घरे मरां तेरे खलाफ पैदा केरेलो; ते तेरी कौन्शां तेरे सामने नेइतां तेरे पड़ोसी देइलो, ते तै भर दुपहरेईं तेरी कौन्शन सेइं कुकर्म केरेलो ते हर कोई हेरेलो। 12 तीं त तैन कम छ़ेपतां कियोरूए; पन अवं इन कम सारे इस्राएली केरे सामने भर दुपहरेईं करेइलो।’" 13 तैखन दाऊदे नातान नेबी सेइं ज़ोवं, "मीं यहोवारे खलाफ पाप कियोरोए।" नाताने दाऊदे सेइं ज़ोवं, "यहोवा तेरो पाप माफ़ कियोरोए; तू न मरेलो। 14 पन फिर भी तीं ज़ैस कम्मेरी वजाई सेइं यहोवारे दुश्मन्न इन कम केरनेरो मौको दित्तोरोए, एल्हेरेलेइ तेरू ज़ैन मट्ठू पैदा भोवरूए तैन ज़रूर मरेलू।"

15 तैखन नातान नबी अपने घरे जो च़लो जेव। ज़ैन मट्ठू ऊरिय्याहेरी कौन्शी दाऊदेरे ज़िरिये पैदा भोवरू थियूं, यहोवा तैन बड़ू बिमार कियूं। 16 एल्हेरेलेइ दाऊदे तैस मट्ठेरे लेई परमेशरे कां बड़ी मिन्नत की; ते अपने कमरे मां जेव ते बरत रख्खू, ते नेड़े गेइतां पूरी राती ज़मीनी पुड़ लेटोरो राव। 17 होरसां झ़ेझ़ां तैसेरे घरानेरे बुज़ुर्ग लोक उठतां तैस ज़मीनी पुड़ेरां खड़े केरने लेई तैस कां जे; पन तैनी न चाव, ते तैन सेइं साथी रोट्टी न खई। 18 बिमार भोनेरे सत्तोवं दिहाड़े बच्‍चो मेरि जेव, ते दाऊदेरे सेवक मट्ठेरे मरनेरी खबर देने करां डेरि जे; तैनेईं ज़ोवरू थियूं, "ज़ैखन तगर मट्ठू ज़ींतू थियूं, तैखन तगर तैनी इश्शे समझ़ाने पुड़ मन न लाव; ते अगर अस तैस सेइं मट्ठेरे मरनेरी खबर शुनामेले त तै हछो जादे परेशान भोनोए।" 19 पन अपने कम केरनेबाले एप्पु मांमेइं मिशकते हेरतां दाऊद सेमझ़ी जेव कि बच्‍चो मेरि जेवरूए; त दाऊदे अपने सेवकन पुछ़ू, "कुन मट्ठू मेरि जेवरूए?" तैनेईं जुवाब दित्तो, "हाँ, मट्ठू मेरि जेवरूए।" 20 तैखन दाऊद तल्‍ले मरां उठ्ठो, ते निहेइतां तेल लाव, ते लिगड़ां बदलां; तैखन यहोवारे भवने मां गेइतां आराधना की; फिरी अपने घरे अव; ते तैनी रोट्टरो हुक्म दित्तो ते तैस रोट्टी दित्ती, ते तैनी रोट्टी खाई। 21 तैखन तैसेरे सेवकेईं तैस पुछ़ू, "तीं एन कुन कम कियूं? ज़ांतगर बच्‍चो ज़ींतो थियो, तांतगर तू बरत रेखतां लेरां देंतो राव; पन ज़ेरो बच्‍चो मेरि जेव, तेरहो तू उठतां रोट्टी खाने लगो।" 22 तैनी जुवाब दित्तो, "ज़ांतगर बच्‍चो ज़ींतो थियो तांतगर अवं एन सोचतां बरत रेखतां लेरां देंतो राव, कि कुन पतोए कि यहोवा मीं पुड़ एरी दया केरे कि बच्‍चो बेंच़ी गाए। 23 पन हुनी तै बच्‍चो मेरि जेव, फिरी अवं बरत किजो रेखी? कुन अवं तैस वापस एन्हीं सकताईं? एक्‍की दिहाड़े अवं मेरतां तैस कां गेइलो, पन तै मीं कां वापस न एज्जेलो।"

24 तैखन दाऊदे एपनी कौन्शी बतशेबा तसल्‍ली दित्ती, ते तै तैस कां जेव; ते तैस अक होरू मट्ठू भोवं, ते तैनी तैसेरू नवं सुलैमान रख्खू। ते तैन यहोवारू ट्लारू भोवं।✝ 25 ते तैनी नातान नेबेरे ज़िरिये समाद भेज़ो; ते तैनी यहोवारे वजाई सेइं तैसेरू नवं यदिद्याह* रख्खू।

26 एसेरे दरमियाने मां योआबे अम्मोनी केरे रब्बाह नगरे सेइं जंग लेड़तां राज़ेरे क़िले पुड़ कब्ज़ो कियो। 27 तैखन योआबे दूत भेज़तां दाऊदे कांजो समाद भेज़ो, "मीं रब्बाह नगरे सेइं जंग लड़ी ते पैनी बाले नगरे पुड़ कब्ज़ो कियो। 28 एल्हेरेलेइ हुनी राहोरे लोकन अकोट्ठे केरतां नगरेरे खलाफ डेरे लेइतां तैस भी पुड़ भी कब्ज़ो केर; एरू न भोए कि अवं तैस पुड़ कब्ज़ो केरि, ते तैस नगरे जो मेरे नंव्वे सेइं ज़ोवं गाए।" 29 तैखन दाऊद सारे लोक अकोट्ठे केरतां रब्बाह नगरे जो जेव, ते तैनी जंग केरतां तैस पुड़ कब्ज़ो कियो। 30 तैखन तैनी तैन केरे राज़ेरू सोन्नेरू ताज तैसेरे क्रोड़ी पुड़ेरां नेव, ज़ेसेरो वज़न लगभग 35 किल्‍लो थियो, ते तैस मां मणि लेवरी थी, ते तैन दाऊदेरे दोग्गे पुड़ रख्खू। फिरी तैनी तैस नगरे मां बड़ी लूट पाट की। 31 तैनी रब्बाह नगरेरे रानेबाले केढतां ऐरी सेइं दूई-दूई टुक्ड़े कराए ते लोंहेरे हेंगे फैराने ते मैक्‍कन सेइं तैना कटाए, ते इट्टां केरे भेट्ठरे कम्मे पुड़ ठहरे। ते अम्मोनी केरे सारे नगरन सेइं भी तैनी एरहो सलूख कियो। तैखन दाऊद काही लोकन सेइं साथी यरूशलेम नगरे जो वापस जेव।