1 ज़ैखन दाऊद ज़ैतून पुड़ेरां थोड़ो ज़ेरो दूर अग्रोवं निस्सी जेवरो थियो, तैखन अचानक मपीबोशेतेरो सेवक सीबा अक जोड़ी, ज़ीन बेन्धतां गधे पुड़ दूई 200 रोट्टी, किशमिशेरी 100 टिकी, रितरे फलां केरि 100 टिकी, ते दाछ़रो रस अक मसक लद्दोरी थी। 2 दाऊद राज़े सीबा पुछ़ू, "इन सब तू किजो लगोरोस केरने?" सीबा जुवाब दित्तो, "गधे त राज़ेरे घरानेरी सुवेरारे लेई आन, ते रोट्टी त रितरे फल जुवाना केरे खानेरे लेई आन, ते दाछ़रो रस एल्हेरेलेइ आन कि ज़ै सुनसान ठैरी मां थेकी जेवरोए तै तैस पीए।" 3 दाऊद राज़े पुछ़ू, "फिरी तेरे मालिकेरू पोट्लड़ू मपीबोशेत कोड़िए?" सीबा राज़े जुवाब दित्तो, "तै त एन ज़ोइतां यरूशलेम नगरे मां राव, कि हुनी इस्राएलेरो घरानो मीं मेरे दादेरू राज़ वापस देलो।" 4 राज़े सीबा सेइं ज़ोवं, "ज़ैन किछ मपीबोशेतेरू थियूं तैन सब तीं मैल्ही जेवं।" सीबा झुकतां ज़ोवं, "हे मेरे मालिक, हे राज़ा, मीं पुड़ तेरी दयारी नज़र भोए।"

5 ज़ैखन दाऊद राज़ो बहूरीम नगरे तगर पुज़्ज़ो, तैखन शाऊलेरे खानदानेरो अक मैन्हु तैट्ठां निस्सो, तैन गेरारू मट्ठू शिमी थियूं; ते तै दाऊदे जो लानत देतो च़लो अव। 6 अंगरक्षक ते सारे लोक दाऊदेरे आसे पासे थिये। इसेरे बावजूद भी तै दाऊद राज़े पुड़, ते तैसेरे सारे अधिकैरन पुड़ जो घोड़ शारने लगो। 7 शिमी लानत देइतां इन ज़ोतो च़लो जेव, "दूर भो खूनी, दूर भो बुरे इन्सान, निस्सी गा, निस्सी गा! 8 यहोवा तीं करां शाऊलेरे घरानेरो पूरो बदलो घिनोरोए, ज़ेसेरी जगाई पुड़ तू राज़ो बनोरोस; यहोवा तेरू राज़ तेरे मट्ठे अबशालोमे दित्तोरूए। ते एल्हेरेलेइ कि तू खूनीस, तू एपनी बुराई मां एप्पु फेसी जेवरोस।"

9 तैखन सरूयाहेरे मट्ठे अबीशै राज़े सेइं ज़ोवं, "इन मरोरू कुतर मेरे मालिक राज़े किजो लानत दे? मीं गाने दे कि अवं एसेरी क्रोड़ी केट्टी।" 10 पन राज़े ज़ोवं, "सरूयाहेरे मट्ठव, मीं तीं सेइं कुन कम? तै ज़ै लानत देते, ते यहोवा ज़ैन तैस सेइं ज़ोवरूए, कि दाऊदे लानत दे, त तैस कौन पुछ़ी सकते, कि तीं एन किजो कियूं?" 11 फिरी दाऊदे अबीशै ते अपने अधिकैरन सेइं ज़ोवं, "ज़ैखन मेरू अपनु मट्ठू मीं मारनू चाते, त ई बिन्यामीनी हुनी एरू किजो न केरे? तैस राने देथ, ते लानत देने देथ; किजोकि यहोवा तैस सेइं एन केरनेरे लेई ज़ोवरूए। 12 भोइ सकते यहोवा इस ज़ुलमे पुड़, ज़ै मीं पुड़ भोइ राहोरीए, नज़र केरे अज़्ज़ेरी लानतरे बदले मीं सेइं भलियाई केरे।" 13 तैखन दाऊद अपने लोकन सने एपनी बत्तां च़लो जेव, ते शिमी तैसेरे सामने पहाड़ेरे बन्ने पुड़ेरां लानत देतो, ते तैस पुड़ घोड़ ते धूड़ शारते च़लो जेव। 14 राज़ो अपने सारे लोकन सने अपने ठारी पुड़ थकोरो पुज़्ज़ो; ते तैड़ी आराम कियो।

15 तैस दौरान अबशालोम ते सारे इस्राएली लोक यरूशलेम नगरे मां आए, ते तैस सेइं साथी अहीतोपेल भी अव। 16 ज़ैखन दाऊदेरो दोस्त एरेकी हूशै अबशालोमे कां पुज़्ज़ो, तैखन हूशै अबशालोमे सेइं ज़ोरे सेइं ज़ोवं, "राज़ेरी उमर लम्मी भोए! राज़ेरी उमर लम्मी भोए!" 17 अबशालोमे तैस सेइं ज़ोवं, "कुन ई तेरो प्यारे ज़ै तू अपने दोस्ते सेइं रखतस? तू अपने दोस्ते सेइं साथी कि नईं जेवरो?" 18 हूशै अबशालोमे जुवाब दित्तो, "एरू नईं; ज़ैस यहोवा ते सारे इस्राएली लोक चान, तैसेरो अवं आईं, ते तैस्से सेइं साथी अवं रालो। 19 ते फिरी अवं केसेरी सेवा केरीं? कुन तैसेरे मट्ठेरे यानी तेरे सामने रेइतां सेवा न केरीं? ज़ेरो अवं तेरे बाजी केरे सामने रेइतां सेवा केरतो थियो, तेरहो तेरे सामने रेइतां तेरी सेवा केरेलो।"

20 तैखन अबशालोमे अहीतोपेले सेइं ज़ोवं, "तू अपनि राई दे, कि कुन कियोरू लोड़े?" 21 अहीतोपेले अबशालोमे सेइं ज़ोवं, "ज़ैन रखैलां तेरो बाजी मेहलेरी निगरानी केरनेरे लेई छ़ेडतां जेवरोए, तैन सेइं साथी झ़ुल; ते ज़ैखन सारे इस्राएली इन शुनेले, कि अबशालोमेरो बाजी तैस सेइं नफरत केरते, तैखन तेरे सारे साथी हिम्मत केरेले।" 22 सेवकेईं अबशालोमेरे लेई मेहलेरे लाए पुड़ अक तेम्बु खड़ो कियो, ते अबशालोम सारे इस्राएली लोकां केरे हेरते अपने बाजी केरि रखैलन सेइं साथी झ़ुल्‍लो। 23 तैन दिहाड़न मां अहीतोपेलेरी हर सलाह एरी भोती थी कि ज़ेन्च़रे परमेशरे करां पुछ़ोरू भोए; अहीतोपेल चाए दाऊदे चाए अबशालोमे, ज़ै-ज़ै सलाह देतो थियो तै एरी भोती थी।