1 किछ दिहाड़ना बाद अबशालोमे रथ ते घोड़े, ते अपने अग्री-अग्री दौड़ने बाले 50 सिपाही तियार रख्खे। 2 अबशालोम झ़ेझ़ां उठतां फाटकेरे बत्तरे बन्ने पुड़ खड़ो भोतो रहतो थियो; ते ज़ैखन-ज़ैखन कोई मुद्देई राज़े कां न्यायेरे लेई एइतो लहतो थियो, तैखन-तैखन अबशालोम तैस हक देइतां पुछ़तो थियो, "तू कौस नगरेरां एवरोस?" ते तै जुवाब देतो थियो, "तेरो दास इस्राएलेरे फलाने-फलाने गोट्ले मरां आहे।" 3 तैखन अबशालोम तैस सेइं ज़ोतो थियो, "शुन, तेरो दावो त फैसलेरे लेई ठीके; पन राज़े कां तेरी तरफां शुन्ने बालो कोई नईं।" 4 फिरी अबशालोम इन भी ज़ोतो थियो, "रोड़ू भोथू कि अवं एस मुल्खे मां न्याय देनेबालो बनाव गाथो! तैखन ज़ेत्रे लोकन कां मुकदमो भोथो तैना सब मीं कां एज्जेथे, ते अवं तैन न्याय देथो।" 5 फिरी ज़ैखन कोई तैस कां झुकनेरे लेई नेड़े एइतो थियो, तैखन तै तैसेरो हथ ट्लेइतां फुम्मड़ी देतो थियो। 6 ज़ेत्रे इस्राएली लोक राज़े कां अपनो मुकदमो घिन्तां एंइते थिये तैन सेभन सेइं अबशालोम एरहो बर्ताव केरतो रहतो थियो; एन्च़रां सेइं अबशालोमे इस्राएली लोकां केरे दिल ज़ींते।

7 च़ेवर सालां केरे बीतनेरे बाद अबशालोमे राज़े सेइं ज़ोवं, "मीं हेब्रोन नगरे मां गेइतां एपनी तैस मिन्नत पूरी केरने दे, ज़ै मीं यहोवा जो मन्नोरी थी। 8 तेरो दास त ज़ैखन अरामेरे गशूर नगरे मां रहतो थियो, तैखन एन ज़ोइतां यहोवा कां मिन्नत मन्नोरी थी, कि अगर यहोवा मीं सच़्च़े यरूशलेम नगरे मां वापस ने, त अवं यहोवारी आराधना केरेलो।" 9 राज़े तैस सेइं ज़ोवं, "सुखे सेइं गा।" ते तै उठतां हेब्रोन नगरे जो च़लो जेव। 10 तैखन अबशालोमे इस्राएली लोकां केरे सारे गोट्लन मां एन ज़ोनेरे लेई जासूस भेज़े, "ज़ैखन तुस नरशिंगेरी आवाज़ शुनेले, तैखन ज़ोनू, ‘अबशालोम हेब्रोन नगरे मां राज़ो बनोरोए!’" 11 अबशालोमे सेइं साथी 200 मैन्हु यरूशलेम नगरेरां जेवरे थिये, तैना मेहमान थिये। तैना साफ दिले सेइं जेवरे थिये, तैन इस बारे मां किछ पतो न थियो। 12 फिरी ज़ैखन अबशालोम बलि च़ाढ़ने लगोरो थियो, तैखन तैनी गीलो नगरेरो रानेबालो अहीतोपेल, ज़ै दाऊदेरो मंत्री थियो, तैस जो धाम ज़ोई कि तै एज्जे। एस साज़िशी सेइं तैस मज़बूती मैल्ही, किजोकि अबशालोमेरे पासे लोक बद्धते जे।

13 तैखन केन्चे दाऊदे कां गेइतां ई खबर दित्ती, "इस्राएली लोकां केरे मन अबशालोमेरे पासे फिरोरोरेन।" 14 तैखन दाऊदे अपने सारे सेवकन सेइं ज़ोवं, ज़ैना यरूशलेम नगरे मां तैस सेइं साथी थिये, "एज्जा, अस नश्शम; नईं त असन मरां कोई भी अबशालोमे करां न बच़ेलो; एल्हेरेलेइ जल्दी केरतां च़लते च़लम, एरू न भोए कि तै जल्दी केरतां असन घेरे, ते इश्शो नुकसान केरे, ते एस नगरेरे लोकन तलवारी सेइं मारे।" 15 राज़ेरे सिपाहीयेइं तैस सेइं ज़ोवं, "ज़ेरू इश्शे मालिक राज़े रोड़ू लग्गे, तैन्ने तेरे दास केरनेरे लेई तियारन।" 16 तैखन राज़ो च़लो जेव, ते तैस पत्ती तैसेरो सारो घरानो च़लो। राज़े दश रखैलां मेहलेरी रखवाली केरनेरे लेई छ़ेडी। 17 तैखन राज़ो च़लो जेव, ते तैस पत्ती सारे लोक च़ले; ते तैना नगरेरे आखरी घरे कां रुके। 18 तैसेरे सब अधिकारी तैस करां अग्रोवं च़ले जे; ते सारे करेती, ते सारे पलेती, ते सारे गती, मतलब ज़ैना 600 सिपाही गत नगरेरां तैस पत्ती च़लोरे थिये तैना सारे राज़ेरे सामने अग्रोवं च़ले जे। 19 तैखन राज़े गत नगरेरे इत्तै पुछ़ू, "असन सेइं साथी तू किजो च़लोरोस? वापस गेइतां अपने नंव्वे राज़े अबशालोमे कां रा; किजोकि तू परदेशी ते अपने मुल्खे करां दूर आस, एल्हेरेलेइ अपने ठैरी जो वापस गा। 20 तू त हीजे एवरोस, कुन अवं अज़ तीं एप्पु सेइं साथी इरां-उरां हंठेइं? अवं त ज़ेरहां गेइ सकेलो त तरहां गेइलो। तू वापस गा, ते अपने लोकन भी वापस ने; परमेशरेरी महरबानी ते सच़्च़ाई तीं सेइं साथी राली।" 21 पन इत्तै, राज़े जुवाब दित्तो, "यहोवारे ज़िन्दगरी कसम, ते मेरे मालिक राज़ेरी ज़िन्दगरी कसम, ज़ैस कोन्ची ठारी पुड़ मेरो मालिक राज़ो रालो, चाहे मरनेरे लेई चाहे ज़ींनेरे लेई, तैस्से ठैरी तेरो दास भी रालो।" 22 तैखन दाऊदे इत्तै सेइं ज़ोवं, "पार च़ल।" ते गत नगरेरे इत्तै अपने सारे मैन्हु ते एप्पु सेइं साथी सारे बाल-बच्‍चे पार निये। 23 सब लोक ज़ोरे-ज़ोरे सेइं लेरां देने लगे; ते सारे लोक पार च़ले जे, ते राज़ो भी किद्रोन नव्वेंरी वादी पार केरतां च़लो जेव, ते सारे लोक नाले पार सुनसान ठारारे बत्तां पार जो च़ले।

24 तैखन कुन हेरने मां अव, कि सादोक भी ते तैस सेइं साथी सारे लेवी परमेशरेरे करारेरो सन्दूख छ़ुइतां च़लेवरोए; ते तैनेईं परमेशरेरो सन्दूख तल्‍ले छ़डो, तैखन एब्यातार याजक बलिदान च़ाढ़ने लगो, ते ज़ांतगर सारे लोक नगरे मरां न निस्से तांतगर तै बलिदान च़ाढ़तो राव। 25 तैखन राज़े सादोक याजके हुक्म दित्तो, "परमेशरेरो सन्दूख नगरे मां वापस ने। अगर यहोवारी अनुग्रहेरी नज़र मीं पुड़ भोए, त तै मीं वापस एन्हतां अपने भवने भी हरालो; 26 पन अगर तै मीं सेइं एन्च़रे ज़ोए ‘अवं तीं पुड़ खुशी नईं,’ फिरी भी अवं हाज़र आईं, ज़ेरू तैस रोड़ू लग्गे तेरहो मीं सेइं बर्ताव केरे।" 27 फिरी राज़े सादोक याजके सेइं ज़ोवं, "कुन तू दर्शी नईं? फिरी भी सुखे सेइं नगरे मां वापस गा, ते तेरू मट्ठू अहीमास, ते एब्यातारेरू मट्ठू योनातान, दूईये तुसन सेइं साथी गान। 28 शुना सुनसान ठारारे घाटे कां तुसन तांतगर बलगतो रेइलो, ज़ांतगर तुसन लोकन करां इस बारे मां खबर न मैल्हे।" 29 तैखन सादोक ते एब्यातार याजकेईं परमेशरेरो सन्दूख यरूशलेम नगरे मां वापस पुज़व; ते एप्पु भी तैट्ठी राए।

30 तैखन दाऊद ज़ैतून पहाड़ेरी चड़ैई पुड़ जो क्रोड़ी ढेकतां ते शुद्धे पांवेइं, ते लेरां देतो च़लोरो थियो; ते ज़ेत्रे लोक तैस सेइं साथी थिये, तैना भी क्रोड़ी ढेकतां लेरां देंते पहाड़े पुड़ जो च़ले जे। 31 तैखन दाऊदे ई खबर मैल्ही, "अबशालोमेरे साथी राजद्रोहिन सेइं साथी अहीतोपेल भी आहे।" दाऊदे प्राथना की, "हे यहोवा, अहीतोपेलेरी सलाह बेवकूफी मां बदल।" 32 ज़ैखन दाऊद तैस पहाड़े पुड़ पुज़्ज़ो, ज़ैड़ी परमेशरेरी आराधना की गाती थी, तैखन एरेकी हूशै दुख बांदो केरनेरे लेई अपनो चोगो छ़िंदतां ते अपने दोग्गे पुड़ मित्ती छ़ेडतां तैस सेइं मिलने अव। 33 दाऊदे तैस सेइं ज़ोवं, "अगर तू मीं सेइं साथी अग्रोवं च़लस, त मेरे लेई भार भोल्हो। 34 पन अगर तू नगरे मां वापस गेइतां अबशालोमे सेइं ज़ोस, ‘हे राज़ा, अवं तेरो सेवक बन्नो चाताईं; ज़ेरो अवं तेरे बाजी केरो सेवक राव, तेन्च़रे अवं हुनी तेरो रालो,’ ते तू मेरे लेई अहीतोपेलेरी योजना नाकाम केरि सकेलो। 35 ते कुन तैड़ी तीं सेइं साथी सादोक ते एब्यातार याजक न राले? एल्हेरेलेइ मेहले मरां ज़ै किछ तीं शुनोए, तैन सादोक ते एब्यातार याजकन सेइं ज़ोइयां। 36 तैन सेइं त तैन केरां दूई मट्ठां, मतलब सादोकेरू मट्ठू अहीमास, ते एब्यातारेरू मट्ठू योनातान, तैड़ी राले; ते ज़ै खबर तुसन मैल्हे तैस मीं कां तैन्ना केरे ज़िरिये पुज़ेइयथ।" 37 ज़ैखन दाऊदेरो दोस्ते, हूशै यरूशलेम नगरे मां पुज़्ज़ो त अबशालोम नगरे मां पुज़्ज़ी जेव।