2 शमूएल 3

1 शाऊलेरे घराने ते दाऊदेरे घराने मां बड़े च़िरे तगर लड़ाई भोती राई; पन दाऊद मज़बूत भोतो जेव, ते शाऊलेरो घरानो कमज़ोर भोतो जेव।

दाऊदेरां मट्ठां

2 ते हेब्रोन नगरे मां दाऊदेरां इना मट्ठां पैदा भोआं; तैसेरू बड्डू मट्ठू अम्नोन थियूं, ज़ैन यिज्रेली अहीनोअमी सेइं पैदा भोवरू थियूं; 3 ते तैसेरू दूइयोवं मट्ठू किलाब थियूं, ज़ेसेरी अम्मा कर्मेली नाबालेरी कौन्श अबीगैल थी; ते ट्लेइयोवं मट्ठू अबशालोम, ज़ैन गशूर*3:3 गशूर गशूर अक सीरियारी निकड़ी रियासत थी ज़ै गलील झीलरे दक्षिणेरे पासे थी। ज़ैना लोक गशूर रियासती मां रहते थिये तैना लोक, तैना गशूरी लोक न थी ज़ैन केरो ज़िक्र 1 शमू. 27:8 मां आहे। नगरेरे राज़े तल्मैरी कुइये माका सेइं पैदा भोवरू थियूं। 4 च़ेवरोवं मट्ठू अदोनिय्याह, ज़ैन हग्गीतरू मट्ठू थियूं। पंच़ोंव मट्ठू शपत्याह, ज़ेसेरी अम्मा अबीतल थी; 5 शेइयोवं मट्ठू यित्राम, ज़ैन एग्ला नव्वेंरी दाऊदेरी कौन्शी सेइं पैदा भोवरू थियूं। हेब्रोन नगरे मां दाऊदेरी ईए औलाद पैदा भोइ।

अब्नेरेरू दाऊदेरे हक्‍के मां एजनू

6 ज़ैखन शाऊलेरे ते दाऊदेरे दूईयां केरे घराने मां लड़ाई भोइ राहोरी थी, तैखन अब्नेर शाऊलेरे घरानेरी मद्दती सेइं ताकतबर भोतो जेव। 7 शाऊलेरी अक रखैल थी ज़ैसारू नवं रिस्पा थियूं, तैसेरी अम्मरू नवं अय्या थियूं; ते ईशबोशेते अब्नेरे पुछ़ू ते दोष लव, "तू मेरे बाजी केरि रखैली कां किजो जेव?" 8 ईशबोशेतेरी गल्‍लां केरि वजाई सेइं अब्नेर बड़ो सेरकोइतां ज़ोने लगो, "कुन अवं यहूदारे कुतरेरी क्रोड़ी आईं? अज़ तगर अवं तेरे बाजी शाऊलेरे घराने ते तैसेरे ढ्लान ते दोस्तन प्यार हिरातो एवरोईं, ते तू दाऊदेरे हथ्थे च़ढ़ने नईं दित्तोरो; ते फिरी तू हुनी मीं पुड़ तैस कौन्शरे बारे मां दोष लातस? 9 अगर अवं दाऊदे सेइं परमेशरेरी कसमरे मुताबिक बर्ताव न केरीं, त परमेशर अब्नेरे सेइं सखते करां सखत बर्ताव केरे; 10 मतलब अवं हुकूमत शाऊलेरे घराने करां थुसोड़ेलो, ते दाऊदेरे राज़ेरो तखत दान नगरे करां लेइतां बेर्शेबा नगरे तगर इस्राएल ते यहूदा पुड़ ठहरालो।" 11 ते तै अब्नेरे कोई जुवाब न देइ बटो, किजोकि तै तैस करां डरतो थियो।

12 तैखन अब्नेरे दाऊदे कां मैन्हु भेज़तां समाद भेज़ो, "ई मुल्ख केसेरोए?" ते ऐह भी समाद भेज़ो, "तू मीं सेइं करार केर, ते अवं तेरी मद्दत केरेलो ते बड़े इस्राएली केरो मन तेरे पासे बदलेलो।" 13 दाऊदे ज़ोवं, "ठीके, अवं तीं सेइं करार त केरताईं पन अवं अक गल तीं करां चाताईं; कि ज़ैखन तू मीं सेइं मिलने एजस, तैखन अगर तू पेइले शाऊलेरी कुई मीकल न आनस, त मीं सेइं मुलाकात न भोल्ही।" 14 फिरी दाऊदे शाऊलेरे मट्ठे ईशबोशेते कां मैन्हु भेज़तां ई समाद भेज़ो, "मेरी कौन्श मीकल, ज़ै मीं 100 पलिश्ती केरि खैड़ी देइतां अपनि कौन्श बनेवरी थी, तैस मीं वापस दे।" 15 तैखन ईशबोशेते लोक भेज़तां तै लैशेरे मट्ठे पलतीएले करां थसोड़ी। 16 ते तैसारो मुन्श तैस सेइं साथी च़लो, ते बहूरीम नगरे तगर तैस पत्पती लेरां देंतो च़लो। तैखन अब्नेरे तैस सेइं ज़ोवं, "वापस गा;" ते तै वापस च़लो जेव।

17 फिरी अब्नेरे इस्राएली केरे प्रधान्न सेइं एन्च़रां सेइं गल-बात की, "पेइले त तुस लोक चाते थिये कि दाऊद इश्शो राज़ो बने। 18 हुनी तेन्च़रे केरा; किजोकि यहोवा दाऊदेरे बारे मां एन्ने ज़ोवरूए, ‘अपने दास दाऊदेरे ज़िरिये अवं अपने इस्राएली लोकन पलिश्ती केरे, बल्के तैन केरे सारे दुश्मना केरे हथ्थे करां छुटेइलो।’" 19 अब्नेरे बिन्यामीन खानदानेरे लोकन सेइं भी गल्‍लां की; तैखन अब्नेर हेब्रोन नगर जो च़लो जेव, कि इस्राएली लोकन ते बिन्यामीन खानदानेरे लोकन ज़ैन किछ रोड़ू लग्गे, तैन दाऊदे कां गेइतां शुनाए।

20 तैखन अब्नेर 20 सिपाही साथी नेइतां हेब्रोन नगरे मां अव, ते दाऊदे तैसेरे ते तैस सेइं साथी ज़ैना सिपाही थिये तैन केरे लेई अक धाम दित्ती। 21 तैखन अब्नेरे दाऊदे सेइं ज़ोवं, "अवं गेइलो, ते ज़ैखन अवं गेइलो ते अपने मालिक राज़े कां गेइतां सारे इस्राएली लोकन अकोट्ठे केरेलो, कि तैना तीं सेइं करार केरन, ते तू एपनी मेर्ज़रे मुताबिक राज़ केरि सखस।" तैखन दाऊदे अब्नेर भेज़ो, ते तै सुखे सेइं च़लो जेव।

अब्नेरो कत्ल

22 तैखन दाऊदेरे बड़े सिपाही ते योआब समेत बड़ी चढ़ाई केरतां ते दुश्मना केरे किछ इलाके लूट पाट केरतां वापस अव। अब्नेर दाऊदे कां हेब्रोन नगरे मां न थियो, किजोकि तै तैनी भेज़ोरो थियो, ते तै सुखे सेइं च़लो जेवरो थियो। 23 ज़ैखन योआब ते तैस सेइं साथी बड़ी सेना अई, तैखन लोकेईं योआबे सेइं ज़ोवं, "नेरेरू मट्ठू अब्नेर राज़े कां एवरू थियूं, ते तैनी तैन भेज़ू, ते तैन सुखे सेइं जेवं।" 24 तैखन योआबे राज़े कां गेइतां ज़ोवं, "तीं एन कुन कियूं? अब्नेर ज़ै तीं कां एवरो थियो, त फिरी कुन वजा थी कि तीं तै गाने दित्तो, ते तै च़लो जेव? 25 तू नेरेरे मट्ठे अब्नेरे ज़ानतस कि तै तीं धोखो देने, ते तेरे एजने गाने, ते सारे कम्मेरो भेद नेने एवरो थियो।"

26 योआबे दाऊदे करां निस्तां अब्नेरे पत्ती किछ दूत भेज़े, ते तैनेईं तै सीरा नंव्वेरे तालाबे करां वापस आनो। पन दाऊदे एस गल्‍लरो पतो न थियो। 27 ज़ैखन अब्नेर हेब्रोन नगरे मां वापस अव, तैखन योआबे अकैल्‍ले मां गल्‍लां केरनेरे लेई तै फाटकेरे अन्तर नेव, ते तैड़ी अपने ढ्ला असाहेलेरे खूनेरे बदले मां तैसेरे पेटे मां एन्च़रे बाई कि तै मेरि जेव। 28 किछ वक्तेरां बाद दाऊदे एन शुनू, ते तैने एलान कियूं, "नेरेरे मट्ठे अब्नेरेरे कत्लेरे बारे अवं अपने लोकन समेत यहोवारी नज़री मां हमेशा बेकसूर रालो। 29 इस कत्लेरो दोष योआब ते तैसेरे बाजी केरे सारे घराने लगे; ते योआबेरे खानदाने मां कोई न कोई धातरो रोगी, ते कोढ़ी, ते टोन्टो, ते तलवारी सेइं मारो गानेबालो, ते नियन्नो मरने बालो हमेशा भोतो राए।" 30 योआब ते तैसेरे ढ्लाए अबीशै अब्नेर एल्हेरेलेइ मारो, कि तैनी तैन केरो ढ्ला असाहेल गिबोन नगरे मां लड़ैई मां मारोरो थियो।

दाऊदेरो अब्नेरे लेई शोग

31 तैखन दाऊदे योआब ते अपने सारे साथी लोकन सेइं ज़ोवं, "मौतरो दुख बांदो केरनेरे वजाई सेइं अपना लिगड़ां छ़िन्दां, ते लख्खे मां टाट बेन्धतां अब्नेरे अग्री-अग्री च़ला।" ते दाऊद राज़ो एप्पु लाशी पत्ती-पत्ती च़लो। 32 ते अब्नेर हेब्रोन नगरे मां दब्बो जेव; ते राज़ो अब्नेरेरी कब्री कां ज़ोरे-ज़ोरे सेइं लेरां देने लगो; ते सारे लोक भी लेरां देने लगे। 33 तैखन दाऊदे अब्नेरेरे बारे मां इन मातमेरू गीत बनाव,

"कुन अब्नेरे डैकू*3:33 डैकू या बेवकूफ केरू ज़ेरू मरनू थियूं?

34 न त तेरे हथ बन्धे जे, ते न तेरे पव्वन मां बेड़ी लेग्गी;

ज़ेन्च़रे कोई अधर्मी मैन्हन करां मारो गाए,

तेन्च़रे तू मारो जेव।" तैखन सारे लोक तैसेरे लेई फिरी लेरां देने लगे।

35 हेजू दीस थी कि लोक दाऊदे रोट्टी खुवाने आए। पन दाऊदे कसम खेइतां ज़ोवं, "अगर अवं दिहाड़ो डुबने करां पेइले रोट्टी या कोई चीज़ खेइं, त परमेशर मीं सेइं सखते करां सखत बर्ताव केरे।" 36 सारे लोकेईं एस गल्‍ली पुड़ विचार कियो ते ई गल सब लोकन पसंद अई। ज़ैन किछ राज़ो केरतो थियो तैस सेइं सारे लोक खुशी भोते थिये। 37 तैस दिहाड़े तैन सब लोकन, बल्के सारे इस्राएली लोकन पतो च़लो कि नेरेरे मट्ठे अब्नेरे मौती मां राज़ेरो कोई हथ नईं। 38 राज़े अपने अधिकैरन सेइं ज़ोवं, "कुन तुस लोक न ज़ानथ कि इस्राएले मां अज़्ज़ेरे दिहाड़े अक प्रधान ते महान मैन्हु मेरि जेवरोए? 39 ते अगर अवं अभिषिक्त राज़ो आईं फिरी भी कमज़ोर आईं; ते तैना सरूयाहेरे मट्ठां मीं करां जादे ताकतबरन। पन यहोवा बुराई केरनेबाले तैसेरी बुरैइयरे मुताबिक तैस बदलो दे।"