1 एक्सां दाऊदे सोचू, "कुन शाऊलेरे घराने मरां कोई हेजू ज़ींतोए, ज़ैस सेइं अवं योनातानेरी वजाई सेइं महरबानी केरि?" 2 शाऊलेरे घरानेरो अक सेवक थियो ज़ेसेरू नवं सीबा थियूं, दाऊदेरे सेवकेईं तै दाऊदे कां कुजव; ते ज़ैखन राज़े तैस पुछ़ू, "कुन तू सीबास?" तैखन तैनी ज़ोवं, हाँ, "तेरो दास सीबा आईं।" 3 राज़े पुछ़ू, "कुन शाऊलेरे घराने मरां हेजू कोई ज़ींतोए, ज़ैस पुड़ अवं परमेशरेरी ज़ेरि महरबानी केरि?" सीबा राज़े सेइं ज़ोवं, "हाँ, योनातानेरू अक मट्ठूए, ज़ैन दूईये ज़ंघेइं टोन्टूए।" 4 राज़े तैस पुछ़ू, "तैन कोड़िए?" सीबा राज़े सेइं ज़ोवं, "तै त लोदबार नगरे मां, अम्मीएलेरे मट्ठे माकीरेरे घरे मां रहते।" 5 तैखन दाऊद राज़े कोई भेज़ो कि तैस लोदबार नगरे मरां, अम्मीएलेरे मट्ठे माकीरेरे घरेरां आने। 6 ज़ैखन मपीबोशेत, ज़ैन योनातानेरू मट्ठू ते शाऊलेरू पोट्लड़ू थियूं, दाऊदे कां अव, तैखन तुत्तरेरे भारे तैस कां झुकू। दाऊदे ज़ोवं, "हे मपीबोशेत!" तैनी ज़ोवं, "तेरे दासे कुन हुक्मे?" 7 दाऊदे तैस सेइं ज़ोवं, "डर न; तेरे बाजी योनातानेरी खातर अवं ज़रूर तीं पुड़ महरबानी केरेलो, ते तेरे दादे शाऊलेरी सारी ज़मीन तीं वापस देइलो; ते तू मीं सेइं साथी हमेशा राज़ेरे मेज़े पुड़ रोट्टी खालो।" 8 तैनी झुकतां ज़ोवं, "तेरो दास कुने, कि तू मेरे ज़ेरे मुओरे कुतरेरे पासे ध्यान देस?"

9 तैखन राज़े शाऊलेरे सेवके सीबा कुजेइतां तैस सेइं ज़ोवं, "ज़ैन किछ शाऊलेरू ते तैसेरे सारे घरानेरू थियूं तैन मीं तेरे मालिकेरे पोट्लड़े दित्तोरूए। 10 अज़्ज़ेरे बाद तू अपने 15 मट्ठां ते 20 सेवकन सेइं साथी तैन उडारन मां ज़मीनदारी केरतां तैसेरी फसल आनतो रेइयां, कि तेरे मालिकेरे पोट्लड़े रोट्टी मैलती राए; पन तेरे मालिकेरू पोट्लड़ू मपीबोशेत मीं सेइं साथी ज़रूर रोट्टी खातू रालू।" 11 सीबा राज़े सेइं ज़ोवं, "मेरो मालिक राज़ो अपने दासे ज़ै भी हुक्म दे, तैन सेभी केरे मुताबिक तेरो दास केरेलो।" दाऊदे ज़ोवं, "मपीबोशेत राज़ेरे मट्ठां केरो ज़ेरो मीं सेइं साथी रोज़ रोट्टी खालो।" 12 मपीबोशेतेरू अक निकड़ू मट्ठू थियूं, ज़ेसेरू नवं मीका थियूं। ते सीबारे घरे मां ज़ेत्रे रहते थिये तैना सारे मपीबोशेतेरी सेवा केरते थिये। 13 मपीबोशेत यरूशलेम नगरे मां रहतो थियो; किजोकि तै राज़े सेइं साथी रोज़ रोट्टी खातो थियो। ते तै दूईये पव्वन सेइं टोन्टो थियो।