2 शमूएल 11

दाऊद पापे मां फसते

1 फिरी ज़ैस वक्ते राज़े जंग केरनेरे लेई निस्ते थिये, तैस मौके, मतलब सालेरी शुरुआती मां दाऊदे योआब, ते तैस सेइं साथी अपने सिपाही ते सारे इस्राएली सिपाही भेज़े; ते तैनेईं अम्मोनी लोक नाश किये, ते रब्बाह नगरे जो घेरो दित्तो। पन दाऊद यरूशलेम नगरे मां राव।

2 एक्सां ड्लोझ़रे मौके दाऊद अपने खट्टी पुड़ेरां उठतां मेहलेरी छती पुड़ हेंठी राहोरो थियो, ते छती पुड़ेरां तैस अक कौन्श बड़ी खूबसूरत लेइहोई। 3 तैखन दाऊदे अक सेवक भेज़तां तैस करां पुछ़ावं, तैखन केन्चे ज़ोवं, "ई एलीआमेरी कुइये, ते हित्ती कौमरे ऊरिय्याहेरी कौन्श बतशेबाए।" 4 तैखन दाऊदे दूत भेज़तां तै कुजाई; ते तै दाऊदे कां अई, ते तै तैस सेइं साथी झ़ुल्‍लो। (तै त मासिक धर्मे करां शुद्ध भोवरीए थी) तैखन तै अपने घरे जो वापस जेई।✝11:4 लैव्य. 15:19. 5 किछ हफतां केरे बाद तै कौन्श दोज़ींती भोइ, तैखन दाऊदे कांजो समाद भेज़ो, कि अवं दोज़ींती भोवरीं।

6 तैखन दाऊदे दूतेरे ज़िरिये योआबे कांजो समाद भेज़ो, "हित्ती ऊरिय्याह मीं कां भेज़।" एल्हेरेलेइ योआबे ऊरिय्याह दाऊदे कांजो भेज़ो। 7 ज़ैखन ऊरिय्याह दाऊदे कां अव, तैखन तैने तैस करां योआब ते सेनारे ते जंगरे बारे मां हाल पुछ़ो। 8 तैखन दाऊदे ऊरिय्याह सेइं ज़ोवं, "अपने घरे गेइतां राती आराम केर।" ते ऊरिय्याह मेहले मरां निस्सो, ते राज़ेरे तरफां तैस जो किछ खाने पीनेरी चीज़ां भेज़ी। 9 पन ऊरिय्याह अपने मालिकेरे सारे सेवकन सेइं साथी मेहलेरे दारे पुड़ झ़ुल्‍लो, ते अपने घरे न जेव। 10 ज़ैखन दाऊदे ई खबर मैल्ही, "ऊरिय्याह अपने घरे नईं जेवरो," तैखन दाऊदे ऊरिय्याह सेइं ज़ोवं, "कुन तू लम्मू सफर केरतां नईं एवरो? फिरी तू अपने घरे किजो नईं जेवरो?" 11 ऊरिय्याहे दाऊदे सेइं ज़ोवं, "ज़ैखन करारेरो सन्दूख ते इस्राएल ते यहूदा प्रदेशेरे सिपाही झोफड़ी मां रहतन, ते मेरो मालिक योआब ते मेरे मालिकेरे सेवक खुले मैइदाने मां डेरे लेइतां रहतन, त कुन अवं घरे गेइतां खेइं, पीं, ते एपनी कौन्शी कां गेइतां झ़ुल्‍ली? तेरे ज़िन्दगरी कसम, ते तेरे प्राणा केरि कसम, अवं एन कम न केरेलो।" 12 दाऊदे ऊरिय्याह सेइं ज़ोवं, "अज़ इड़ी बिश, ते कालां अवं तीं भेज़ेलो।" एल्हेरेलेइ ऊरिय्याह तैस दिहाड़े ते दूइयोवं दिहाड़े भी यरूशलेम नगरे मां राव। 13 तैखन दाऊदे तैस जो समाद भेज़ो, ते तैनी तैस सेइं साथी खावं पियूं, ते तैनी तै मतवालो कियो; ते ड्लवझ़ां तै अपने मालिकेरे मेहलेरे पहरदारन सेइं साथी एपनी खट्टी पुड़ झ़ुलने जो जेव, पन अपने घरे न जेव।

14 केन्चे इस बारे मां दाऊदे खबर दित्ती, ते झ़ेझ़ां दाऊदे योआबेरे लेई अक चिट्ठी लिखतां ऊरिय्याहेरे हथ्थे भेज़ी। 15 ते तैस चिट्ठी मां इन लिखोरू थियूं, "जंगी मां ऊरिय्याह सेभन करां अग्गर रखनो, तैखन तै शैरतां वापस एजनू, कि तै ज़खमी भोइतां मेरि गाए।" 16 योआबे तैस वक्ते रब्बाह नगरे घेरो दित्तोरो थियो। तैस पतो थियो कि कोस ठैरी दुश्मना केरे बहादर सिपाही आन, ते तैनी ऊरिय्याह तैस ठैरी जो भेज़ो। 17 तैखन तैस नगरेरे सिपैहेईं निस्तां योआबे सेइं जंग लड़ी ते दाऊदेरे सिपेहिन मरां किछ मेरि जे ते हित्ती ऊरिय्याह भी मेरि जेव। 18 तैखन योआबे दूत भेज़तां दाऊदे जंगरो पूरो हाल शुनाव। 19 ते दूते ऐह हुक्म दित्तो, "ज़ैखन तू जंगरो पूरो हाल राज़े शुनास, 20 तैखन अगर राज़ो सेरकोइतां ज़ोने लगे, ‘तुस लोक लड़नेरे लेई नगरेरे नेड़े किजो जेवरे थिये? कुन तुस ज़ानते न थिये कि तैना शहरपनाही पुड़ेरां तीर मारेले? 21 यरूब्बेशेतेरू मट्ठू अबीमेलेक केनी मारू? कुन एक्‍की कौन्शां शहरपनाही पुड़ेरां ढ्लाटेरो बेइयोवं ढ्लेइटोल तैस पुड़ एरहो न शारो कि तै तेबेस नगरे मां मेरि जेव? फिरी तुस शहरपनाहरे नेड़े किजो जेवरे थिये?’ त तू एन ज़ोइयां, ‘तेरो सेवक हित्ती ऊरिय्याह भी मेरि जेव।’"✝11:21 न्या. 9:50-55.

22 तैखन दूत च़ेलि जेव, ते गेइतां दाऊदे सेइं योआबेरी सैरी गल्‍लां बियान की। 23 दूते दाऊदे सेइं ज़ोवं, "तैना लोक असन पुड़ हावी भोइतां मैइदाने मां असन कां निस्तां आए, फिरी असेईं तैना फाटके तगर खदाड़े। 24 तैखन तीर च़लाने बालेईं नगरेरी दिवारी पुड़ेरां तेरे सिपेहिन पुड़ तीर च़लाए; ते राज़ेरे किछ सिपाही मेरि जे, ते तेरो दास ऊरिय्याह हित्ती भी मेरि जेव।" 25 दाऊदे दूते सेइं ज़ोवं, "योआबे सेइं एन ज़ोइयां, ‘एस गल्‍लरी वजाई सेइं उदास न भोइयां, किजोकि तलवार ज़ेन्च़रे एस तेन्च़रे तैस भी नाश केरतीए; तू नगरेरे खलाफ जादे मज़बूती सेइं लेड़तां तैस नाश केर।’ ते तू तैसेरे लेई हिम्मत केर।"

26 ज़ैखन ऊरिय्याहेरी कौन्शां एन शुनू कि मेरो मुन्श मेरि जेवरोए, तैखन तै अपने मुन्शेरे लेई लेरां देने लगी। 27 बादे मां ज़ैखन तैसेरे मातमेरे दिहाड़े बीती जे, तैखन दाऊदे तै कुजेइतां अपने घरे मां रख्खी, ते तै तैसेरी कौन्श भोइ जेई, ते तैस अक मट्ठू भोवं। पन ज़ैन कम दाऊदे कियोरू थियूं तैस सेइं यहोवा बड़ी सरक अई।