1 फिरी अहीतोपेले अबशालोमे सेइं ज़ोवं, "मीं सेनाई मरां 12000 सिपाही च़ुन्ने दे, ते अवं गेइतां अज़्ज़े राती दाऊदेरो पीछो केरेलो। 2 ते ज़ैखन तै थकोरो ते कमज़ोर भोल्हो, तैखन अवं तैस ट्लालो, ते डरेइलो; ते ज़ेत्रे लोक तैस सेइं साथी आन सारे नश्शेले। तैखन अवं अकदम हमलो केरतां दाऊद राज़े मारेलो, 3 ते अवं सारे लोकन तीं कां वापस आनेलो; ते ज़ैस मैन्हु तू तोप्पने लगोरोस, तैसेरे वापस एजने सेइं सारे इस्राएली लोक वापस गाले ते सारे लोक सुखे सेइं राले।" 4 ई गल अबशालोम ते सारे इस्राएली बुज़ुर्गन रोड़ी लग्गी।

5 पन अबशालोमे ज़ोवं, "एरेकी हूशै भी कुजेइतां आन, ते ज़ैन तै ज़ोलो अस तैन भी शुनम।" 6 ज़ैखन हूशै अबशालोमे कां अव, तैखन अबशालोमे तैस सेइं ज़ोवं, "अहीतोपेले त इस किसमेरी गल ज़ोवरीए; कुन अस तैसेरी गल मन्नम या नईं? अगर नईं, त तू ज़ो।" 7 हूशै अबशालोमे सेइं ज़ोवं, "ज़ै सलाह अहीतोपेले इस फेरे दित्तोरीए, तै ठीक नईं।" 8 फिरी हूशै ज़ोवं, "तू त अपने बाजी ते तैसेरे सिपेहिन ज़ानतस कि तैना शूरबीरन, ते ज़ैस ट्लियोगरे बच्‍चे थिसोड़ोरे भोन तैसेरे ज़ेरे सेरकोले। तेरो बाजी योद्धा आहे; ते बाकी सिपेहिन सेइं साथी रात न गुज़ारे। 9 इस मौके त तै कोन्ची कुढी, या कोन्ची होरि ठारी छ़पोरो भोल्हो। ज़ैखन इन मरां पेइले हमले मां कोई मारो गालो, तैखन इस गल्‍लरे शुन्ने बाले ज़ोले, ‘अबशालोमेरे सारे सिपाही हारे।’ 10 तैखन शेरेरो ज़ेरो बहादर सिपेही डेरि गालो। सारे इस्राएली ज़ानतन कि तेरो बाजी बहादर आहे, ते तैसेरे साथी योद्धा आन। 11 एल्हेरेलेइ मेरी सलाह ईए कि दान नगरे करां बेर्शेबा नगरे तगर रानेबाले सारे इस्राएली तीं कां समुद्रेरे बन्नेरी रेतरे सिक्‍कां केरे ज़ेरे अकोट्ठे भोन, ते तू एप्पु जंगी मां गास। 12 ते ज़ैखन अस तैस कोन्ची न कोन्ची ठारी पुड़ ज़ैड़ी तै मैल्ही गाए तैस ट्लांमेले, तैखन ज़ेन्च़रे ओश ज़मीनी पुड़ बिछ़ड़तीए तेरहे अस तैस पुड़ हमलो केरमेले; तैखन न तै बच़ेलो, ते न तैसेरो कोई सिपाही बच़ेलो। 13 अगर तै कोन्ची नगरे मां जेवरो भोए, त सारे इस्राएली तैस नगरेरे नेड़े रेस्सी आनेले, ते अस तैस नगरेरे दरियाए मां शारमेले, इड़ी तगर कि तैसेरो अक निकड़ो ज़ेरो घोड़ भी न रेई बटेलो।" 14 तैखन अबशालोम ते सारे इस्राएली सिपैहेईं ज़ोवं, "एरेकी हूशैरी सलाह अहीतोपेलेरी सलाही करां रोड़ीए।" यहोवा अहीतोपेलेरी रोड़ी सलाह नाकामयाब केरनेरी सोचोरी थी, कि तै अबशालोमे पुड़ आफत छ़डे।

15 तैखन हूशै सादोक ते एब्यातार याजके सेइं ज़ोवं, "अहीतोपेले त अबशालोम ते इस्राएली बुज़ुर्गन एस तरीके सेइं सलाह दित्ती; ते मीं इस तरीके सेइं सलाह दित्तोरिए। 16 एल्हेरेलेइ हुनी जल्दी केरतां दाऊदे जो समाद भेज़ा, ‘अज़ राती जंगलेरे घाटे कां न रुकथ, ज़रूरी पार गेइयथ; एरू न भोए कि राज़ो ते ज़ेत्रे लोक तैस सेइं साथीन, सारे मारे गान।’" 17 योनातान ते अहीमास एनरोगेल नागे कां रुके; ते अक दासी गेइतां तैन बिस्तार देती थी, ते तैना गेइतां दाऊद राज़े बिस्तार देते थिये; किजोकि तैना केन्चेरे सामने नगरे मां न थिये गेइ सकते। 18 एक्सां एक्‍की मट्ठे तैना लाहे ते तैने अबशालोमे सेइं ज़ोवं; पन तैना दूईये ज़ने जल्दी च़ले जे, ते अक बहूरीम नगरेरे मैन्हेरे घरे पुज़तां ज़ेसेरे अंगने मां खुह थियूं तैस मां छ़प्पे। 19 तैखन तैस मैन्हेरे कौन्शां कपड़े सेइं खुह ढक्‍कू, ते तैस पुड़ दलोरू अन्न खिलारू; एल्हेरेलेइ कि कोई पतो न लगे। 20 तैखन अबशालोमेरे सिपाही तैस घरे मां गेइतां तैस कौन्शी सेइं ज़ोने लगे, "अहीमास ते योनातान कोड़ि आन?" तैखन कौन्शां तैन सेइं ज़ोवं, "तैना त उस निकड़े दरियाएरे पार जेवरेन।" तैखन तैना तैन तोप्पने लगे, पन तैन्न तैना न मैल्हे ते तैना वापस यरूशलेम नगरे जो जे।

21 ज़ैखन तैना च़ले जे, तैखन तैना खुहे मरां निस्से, ते गेइतां दाऊद राज़े खबर दित्ती; ते दाऊदे सेइं ज़ोवं, "तुस लोक च़ला, जल्दी केरतां दरियाए पार च़ले गाथ; किजोकि अहीतोपेले तुश्शे खलाफ साज़िश कियोरीए।" 22 तैखन दाऊद ते तैसेरी सेना यरदन दरियाए पार च़ली जेई। ते झ़ेझ़ां लौ भोने तगर कोई एरहो न राव ज़ै यरदन दरियाए पार न जेवरो भोए।

23 ज़ैखन अहीतोपेले हेरू कि मेरी सलाहरे मुताबिक कम न भोवं, तैखन तैनी अपने गधे पुड़ काठी बन्धी, ते अपने नगरे मरां गेइतां अपने घरे जेव। ते अपने घरेरो बन्दो बसत कियो ते अपने आपे फांसी देइतां मेरि जेव, ते ज़ैड़ी तैसेरो बाजी दबोरो थियो तैड़ी तै भी दब्बो जेव।

24 तैखन दाऊद महनैम नगरे मां पुज़्ज़ो। ते अबशालोम सारे इस्राएली सिपेहिन सेइं साथी यरदन दरियाए पार जेव। 25 अबशालोमे अमासा योआबेरी जगाई पुड़ प्रधान सेनापति बनाव। ई अमासा अक इस्राएली मैन्हेरू मट्ठू थियूं ज़ेसेरू नवं यित्रो थियूं, ते तै योआबेरी अम्मा, सरूयाहेरी बेइन, अबीगैल नव्वेंरी नाहाशेरी कुइये सेइं साथी झ़ुलोरो थियो। 26 ते इस्राएली सिपैहेईं ते अबशालोमे गिलाद प्रदेशे मां डेरे लाए।

27 ज़ैखन दाऊद महनैम नगरे मां अव, तैखन अम्मोनी लोकां केरे रब्बाह नगरेरे रानेबाले नाहाशेरू मट्ठू शोबी, ते लोदबार नगरेरे रानेबाले लोकेईं अम्मीएलेरू मट्ठू माकीर, ते रोगलीम नगरेरे रानेबाले गिलादी बर्जिल्‍लै, 28 पंदां, तशले, मितरां भांडां, गेहुं, जौ, मैदो, लोबिया, मस्सर, भुज़ोरे छोले, 29 माछ़ी, मखन, भैड्डां-छ़ेल्‍ली, ते बेछ़रू दुद्धेरू पनीर, दाऊद ते तैसेरे सैथी केरे खानेरे लेई इन सोचतां आनू, "कि सुनसान ठैरी मां तैना लोक ढ्लुखोरे-ट्लिशोरे ते थकोरे भोल्हे।"