1 किछ दिहाड़ना बाद दाऊद राज़े पलिश्ती ज़ींत्तां अपने कब्ज़े मां किये, ते दाऊदे पलिश्ती लोकां केरे मेतग-अम्माह नगरे पुड़ कब्ज़ो कियो।

2 फिरी दाऊदे मोआबी लोक भी ज़ींते, ते तैनी बन्धी बनेवरे सिपाही ज़मीनी पुड़ लेटाए ते डोरी सेइं नापे। तैखन तैनी दूई डोरन सेइं नैपतां लोक मारे, ते अक रस्सी भेरतां लोक ज़ींते छ़डे। तैखन मोआबी लोक दाऊदेरे अधीन भोइतां लगान देने लगे।

3 फिरी ज़ैखन सोबा प्रदेशेरो राज़ो रहोबेरू मट्ठू हदादेजेर फरात दरियाए कां अपनु राज़ फिरी ज़ेरू थियूं तेरहु केरनेरे लेई गेइ राहोरो थियो, तैखन दाऊदे तै भी हाराव। 4 ते दाऊदे तैस करां 1700 सुवार सिपाही, ते 20000 पैदल च़लनेबाले सिपाही थुसोड़तां आने; ते सारे रथे बाले घोड़ां केरि ज़ैंधू केरि पेत्रीं पासेरी नसां कट्टेइ, पन 100 रथां केरे लेई घोड़े बच़ेइतां रख्खे। 5 ज़ैखन दमिश्क नगरेरे अरामी सोबा प्रदेशेरे राज़े हदादेजेरेरी मद्दत केरनेरे लेई आए, तैखन दाऊदे 22000 अरामी सिपाही मारे। 6 तैखन दाऊदे दमिश्केरे अरामे मां सेनारी चौकी बिशैली; एन्च़रां सेइं अरामी दाऊदेरे अधीन भोइतां लगान देने लगे। ते ज़ैड़ी-ज़ैड़ी दाऊद गातो थियो तैड़ी-तैड़ी यहोवा तैस ज़ींत देतो थियो। 7 हदादेजेर राज़ेरे अधिकैरन कां ज़ैना सोन्नेरी ढालां थी तैना दाऊदे नेइतां यरूशलेम नगरे मां ऐनोरी थी। 8 ते बेतह ते बेरौताई नंव्वेरे हदादेजेरेरे नगरन मरां दाऊदे राज़े बड़ी पितल आनी।

9 ज़ैखन हमातेरे राज़े तोईएं एन शुनू कि दाऊदे हदादेजेरेरी सारी सेना हाराई, 10 तैखन तोईएं अपनु मट्ठू ज़ेसेरू नवं योराम थियूं दाऊद राज़ेरो हाल चाल पुछ़ने भेज़ू, ते तैस बधाई देनेरे लेई एल्हेरेलेइ भेज़ू, कि तैनी हदादेजेरे सेइं लेड़तां तै हारावरो थियो। किजोकि हदादेजेर राज़ो तोई राज़े सेइं लड़तो रहतो थियो। ते योराम चाँदी, सोन्नू ते पितलरां भांडां घिन्तां अव। 11 तैना दाऊद राज़े यहोवारे लेई पवित्र केरतां रखां; ते ज़ैना कौमन पुड़ तैनी ज़ींत हासिल कियोरी थी, तैन केरू सोन्नू चाँदी भी यहोवारे लेई पवित्र कियूं। 12 मतलब अरामी लोक, मोआबी लोक, अम्मोनी लोक, पलिश्ती लोक, ते अमालेकी लोकां केरू सोन्नू चाँदी भी, ते रहोबेरू मट्ठू सोबारो राज़ो हदादेजेरेरी लूटरो माल भी रख्खो।

13 ज़ैखन दाऊद लूनेरे वैदी मां 18000 अरामी लोकन मैरतां वापस अव, तैखन तैसेरे नव्वेंरी बड़ी मुशूरी भोइ जेई। 14 फिरी तैनी पूरे एदोम प्रदेशे मां सेनारी चौकी बिशैली; ते सारे एदोमी लोक दाऊदेरे अधीन भोइ जे। ते ज़ैड़ी भी दाऊद गातो थियो तैड़ी यहोवा तैस ज़ींत देतो थियो।

15 दाऊद त सारे इस्राएले पुड़ राज़ केरतो थियो, ते दाऊद अपने सारे लोकां केरो न्याय केरतो थियो ते धार्मिकतारां कम्मां केरतो थियो। 16 प्रधान सेनापति सरूयाहेरू मट्ठू योआब थियूं; इतिहास लिखने बालो अहीलूदेरू मट्ठू यहोशापात थियूं; 17 प्रधान याजक अहीतूबेरू मट्ठू सादोक ते एब्यातारेरू मट्ठू अहीमेलेक थियूं; ते मंत्री सरायाह थियो; 18 करेती ते पलेती लोकां केरो प्रधान यहोयादारू मट्ठू बनायाह थियूं; ते दाऊदेरां मट्ठां भी मंत्री थियां।