1 किछ दिहाड़ना बाद दाऊद राज़े ज़ैना सिपाही तैस सेइं साथी तैन केरि गिनती की, ते हज़ारन पुड़ ते शौवन पुड़ सेनापति ठहराए। 2 फिरी दाऊदे सिपेही केरि अक तिहाई योआबेरे ते अक तिहाई सरूयाहेरे मट्ठे अबीशै, ते अक तिहाई गत नगरेरे रानेबाले इत्तैरे, अधिकारे मां केरतां जंगी मां भेज़े। फिरी राज़े सिपेहिन सेइं ज़ोवं, "अवं भी ज़रूर तुसन सेइं साथी च़लेलो।" 3 पन सिपैहेईं दाऊदे सेइं ज़ोवं, "तू न गेइ सकेलो। किजोकि चाहे अस नेश्शी गाम, फिरी भी तैना इश्शो फिक्र न केरेले; चाहे असन मरां अध्धे मारे भी गान, फिरी भी तैना इश्शी फिक्र न केरेले। पन तू इश्शे 10000 सिपेहिन बराबर आस; एल्हेरेलेइ रोड़ू इने कि तू नगरे मरां इश्शी मद्दत केरनेरे लेई तियार रा।" 4 राज़े तैन सेइं ज़ोवं, "ज़ैन किछ तुसन रोड़ू लगते अवं तैन्ने केरेलो।" एल्हेरेलेइ राज़ो फाटकेरे एक्‍की पासे खड़ो राव, ते सारे सिपाही 100-100 ते 1000-1000 एरे जथे मां निसने लगे। 5 राज़े योआब, अबीशै, ते इत्तै हुक्म दित्तो, "मेरे खातर अबशालोमे सेइं नेरमी सेइं सलूख केरथ।" ऐह हुक्म राज़े अबशालोमेरे बारे मां सारे सेनापतिन सारे लोकां केरे सामने दित्तो।

6 तैखन दाऊदेरे सिपाही अबशालोमेरो मुकाबलो केरनेरे लेई मैइदाने मां निस्से; ते एप्रैम नंव्वेरे जंगले मां जंग भोइ। 7 तैड़ी अबशालोमेरे सिपाही दाऊदेरे सिपेहिन करां हारे, ते तैस दिहाड़े एत्री मार काट भोइ कि 20000 सिपाही मारे जे। 8 तै जंग सारे इलाके मां फैली जेई; ते तैस दिहाड़े ज़ेत्रे लोक तलवारी सेइं मारे जे, तैन करां जादे जंगलेरे वजाई सेइं मेरि जे।

9 कुदरती अबशालोम ते दाऊदेरे सिपेही केरो सामनो भोव। अबशालोम एक्‍की खचरी पुड़ च़ेढ़तां च़लोरो थियो, ज़ैखन तै खचर बंज़ेरे बुट्टेरे घने डैलड़न हैठमेईं जेई, ते तैसेरी क्रोड़ी तैन बंज़ेरे बुट्टे मां फसी, ते तै टेंगोरो रेई जेव, ते तैसेरी खचर अग्रोवं निस्सी जेई। 10 दाऊदेरे एक्‍की सिपैहिए लाव ते तैनी योआबे सेइं ज़ोवं, "मीं अबशालोम बंज़ेरे बुट्टे पुड़ टेंगोरो लाहोरोए।" 11 योआबे खबर देनेबाले मैन्हु सेइं ज़ोवं, "तीं तै लाव! फिरी तीं तै मैरतां तल्‍ले कि न बिछ़ोड़ो? ते अवं तीं दश टुक्ड़े चैंदरे ते अक कमरबन्ध देथो।" 12 तैनी सिपैहिए योआबे सेइं ज़ोवं, "चाहे मेरे हथ्थे मां 1000 टुक्ड़े चैंदरे तुलतां दित्ते गान, फिरी भी राज़ेरे मट्ठेरे खलाफ हथ खड़ो न केरेलो; किजोकि इश्शे लोकां केरे शुन्ते राज़े तीं ते अबीशै ते इत्तै कुन हुक्म दित्तोरोए, ‘तुसन मरां कोई कि न भोए अबशालोमे सेइं कोई न हुरे।’ 13 अगर अवं धोखो देइतां तैस मैरेथो, त तू एप्पु मेरे मुखालफ भोइ गाथो, किजोकि राज़े करां कोई गल छ़पोरी न राए।" 14 योआबे तैस सेइं ज़ोवं, "अवं तीं सेइं साथी एरहो न रेइ सेखी!" एल्हेरेलेइ तैनी ट्लाई तीर नेइतां अबशालोमेरे छैती मां लाए, ज़ै बंज़ेरे बुट्टे पुड़ ज़ींतो टेंगोरो थियो कोश्शो। 15 तैखन योआबेरे दश हथियार छ़ूनेबाले सिपैहेईं अबशालोम घेरतां एत्रो मारो कि तै मेरि जेव।

16 फिरी योआबे नरशिंगो बज़ाव, ते दाऊदेरे सिपाही अबशालोमेरो पीछो केरनेबाले वापस आए; किजोकि योआब लोकन बच़ाने चातो थियो। 17 तैखन सिपैहेईं अबशालोमेरी लाश ओसैलतां तैस जंगलेरे एक्‍की बड्डे गत्ते मां छ़ेडी दित्ती, ते तैस पुड़ घोड़ां केरो अक बड़ो ढेर लाव; ते सारे इस्राएली अपने-अपने घरे जो नेश्शी जे। 18 अपने ज़ींते सांसे अबशालोमे एन सोचतां कि मेरे नंव्वे च़लानेबालू कोई मेरू मट्ठू नईं, अपने लेई तैनी अक खम्भो खड़ो करेवरो थियो ज़ै राज़ेरे तरैई मां बनेवरो थियो; ते तैस खम्भे पुड़ अपनु नवं रख्खू, ज़ैस जो अज़ तगर अबशालोमेरो खम्भो ज़ोतन।

19 तैखन सादोकेरे मट्ठे अहीमासे योआबे सेइं ज़ोवं, "मीं दौड़तां राज़े ई खबर देने दे, कि यहोवा न्याय केरतां तू तेरे दुश्मना केरे हथ्थे करां बच़ावरोस।" 20 योआबे तैस सेइं ज़ोवं, "तू अज़्ज़ेरे दिहाड़े खबर न पुज़ेइयां; दूइयोवं दिहाड़े खबर शुनेइयां, पन अज़ खबर न दे, एल्हेरेलेइ कि राज़ेरू मट्ठू मेरि जेवरूए।" 21 तैखन योआबे एक्‍की कूशी मैन्हु* सेइं ज़ोवं, "ज़ैन किछ तीं लाहेरूए तैन गेइतां राज़े सेइं ज़ो।" त तै कूशी मैन्हु योआबे कां झुकतां दौड़तो च़लो जेव। 22 फिरी सादोकेरे मट्ठे अहीमासे दूइयोवं बार योआबे सेइं ज़ोवं, "चाए किछ भी भोए, पन मीं भी कूशी पत्ती दौड़तां गाने दे।" योआबे ज़ोवं, "हे मेरे मट्ठां, तीं खबर बदले किछ भी इनाम न मैल्हेलू, फिरी तू किजो दौड़तो गानू चातस?" 23 पन तैनी इन ज़ोवं, "ज़ैन किछ किना भोए, मीं दौड़तां गाने दे।" तैनी तैस सेइं ज़ोवं, "दौड़।" तैखन अहीमास दौड़तो, वैदी मांमेइं कूशी करां अग्रोवं च़लो जेव।

24 दाऊद त दूई फाटकां केरे मझ़ाटे बिशोरो थियो, तैखन पहरदार ज़ै फाटकेरे दिवारी पुड़ च़ैढ़तां फाटकेरे छती पुड़ जेव, तैखन तैनी अक मैन्हु दौड़तां एइतो लाव। 25 ज़ैखन पहरदारे हक देइतां राज़े सेइं ज़ोवं, तैखन राज़े ज़ोवं, "अगर अकैल्‍लो एवरोए त सन्देश घिन्तां एवरो भोल्हो।" तै दौड़ते नेड़े पुज़ोरोए। 26 फिरी पहरदारे अक होरो मैन्हु दौड़तो फाटकेरे पहरदारे हक देइतां ज़ोवं, "शुन, अक होरो मैन्हु अकैल्‍लो दौड़तो एवरोए।" राज़े ज़ोवं, "तै भी खबर घिन्तां एवरो भोनोए।" 27 पहरदारे ज़ोवं, "मीं त एन लेइहोते कि पेइलो दौड़ने बालो सादोकेरू मट्ठू अहीमासेरो ज़ेरोए।" राज़े ज़ोवं, "तै त रोड़ो मैन्हु आहे, तै त रोड़ी खबर घिन्तां एवरो भोनोए।"

28 तैखन अहीमासे हक देइतां राज़े सेइं ज़ोवं, "सब ठीके।" फिरी तैनी राज़ेरे सामने ज़मीनी पुड़ झुकतां ज़ोवं, "तेरो परमेशर यहोवा धने, ज़ैनी मेरे मालिक राज़ेरां खलाफ हथ खड़ो केरनेबालो तेरे कैबू मां कियोरोए!" 29 राज़े अहीमासे पुछ़ू, "कुन तै जुवान अबशालोम ठीके?" अहीमासे ज़ोवं, "ज़ैखन योआबे राज़ेरे सेवक ते तेरो सेवक भेज़ो, तैखन मीं अक बड़ी भीड़ लाही, पन पतो न लग्गो कि कुन भोवरू थियूं।" 30 राज़े ज़ोवं, "एक्‍की पासे भोइ गा ते इड़ी खड़ो रा।" एल्हेरेलेइ तै एक्‍की पासे च़ुपच़ाप खड़ो भोइ जेव।

31 तैखन कूशी भी पुज़्ज़ो; ते ज़ोने लगो, "मेरे मालिक राज़ेरे लेई ई खबरे। यहोवा अज़ न्याय केरतां तू तैन सेभी केरे हथ्थे करां बच़ावरोस ज़ैना तेरे खलाफ खड़े भोवरे थिये।" 32 राज़े कूशी पुछ़ू, "कुन तै अबशालोम ठीके?" कूशी मैन्हे ज़ोवं, "मेरे परमेशर राज़ेरो दुश्मन, ते ज़ेत्रे तेरे नुक्सानेरे लेई खड़े भोवरे थिये, तैन केरि हालत भी तैस जुवैनरी ज़ेरि भोए।" 33 तैखन राज़ो घेमरोई जेव, ते फाटकेरे दारेरे बेइयें कमरे मांजो लेरां देंतो च़लो जेव; ते च़लते-च़लते इन ज़ोतो जेव, "हे मेरा मट्ठां अबशालोम! मेरा मट्ठां, ओ मेरा मट्ठां अबशालोम! रोड़ू भोथू कि अवं एप्पु तेरे बदले मरेथो, ओ! अबशालोम! मेरा मट्ठां, मेरा मट्ठां!"