1 किछ वक्तेरां बाद अम्मोनी लोकां केरो राज़ो नाहाश मेरि जेव, ते तैसेरू मट्ठू ज़ेसेरू नवं हानून थियूं तैन तैसेरे ठैरी राज़ो बनू। 2 तैखन दाऊदे एन सोचू, "ज़ेन्च़रे हानूनेरे बाजी नाहाशे मीं सेइं महरबानी की, तेन्च़रे अवं भी हानूने सेइं महरबानी केरेलो।" तैखन दाऊदे अपने किछ अधिकारी तैसेरे बाजेरे मौतरे बारे मां शान्ति देनेरे लेई भेज़े। ते दाऊदेरे अधिकारी अम्मोनी लोकां केरे मुल्खे मां आए। 3 पन अम्मोनी सेनापति अपने राज़े हानूने सेइं ज़ोने लगे, "दाऊदे ज़ैना तीं कां शान्ति देनेबाले भेज़ोरेन, तैना कुन तेरी समझ़ी मां तेरे बाजी केरि इज़्ज़त केरनेरे खियाले सेइं भेज़ोरेन? तैना कुन दाऊदे अपने सेवक तीं कां एस वजाई सेइं नईं भेज़ोरे कि एस नगरे मां हेर-जाच केरतां ते एसेरो भेद नेइतां एस नाश केरन?" 4 एल्हेरेलेइ हानूने दाऊदेरे सेवक ट्लाए, ते तैन केरि अध्धी-अध्धी दाढ़ी कटेइतां ते लख्खे करां उंढां लिगड़ां कटेइतां तैना भेज़े। 5 एस घटनारी खबर शुन्तां दाऊदे किछ मैन्हु तैन सेइं मिलनेरे लेई भेज़े, किजोकि तैना राज़ेरे सामने एजने करां शरमाते थिये। ते राज़े इन ज़ोवं, "ज़ांतगर तुश्शी दाढ़ी न बेडोए तांतगर यरीहो नगरे मां रुकोरे राथ, फिरी वापस एज्जा।"

6 ज़ैखन अम्मोनी लोकेईं हेरू कि असन सेइं दाऊद नाराज़ भोवरोए, तैखन अम्मोनी लोकेईं बेत्रहोब ते सोबा प्रदेशां केरे 20000 अरामी सिपाही, ते 1000 सिपेहिन समेत माका प्रदेशेरे राज़े, ते 12000 तोबी सिपाही, मज़दूरी पुड़ कुजाए।

7 एन शुन्तां दाऊदे योआब ते शूरबीरां केरि पूरी सेना लड़नेरे लेई भेज़ी। 8 तैखन अम्मोनी निस्से ते फाटके कां मोरच़ो लाव; ते सोबा ते रहोबेरे अरामी ते तोब ते माकारे सिपाही तैन करां अलग मैइदाने मां थिये।

9 एन हेरतां कि अग्रोवं पत्रोवं इश्शे खलाफ लोकेईं मोरच़ो लेवरोए, योआबे सारे बड्डे-बड्डे इस्राएली शूरबीरन मरां तैलतां अरामी केरे सामने तैन केरो मोरच़ो लाव, 10 ते बाकी सिपाही अपने ढ्ला अबीशैरे हथ्थे मां सौंफे, ते तैनी अम्मोनी केरे सामने तैन केरो मोरच़ो लाव। 11 फिरी तैनी ज़ोवं, "अगर अरामी मीं पुड़ भारी भोइ गान, त तू मेरी मद्दत केरां; ते अगर अम्मोनी तीं पुड़ भारी भोन, त अवं एइतां तेरी मद्दत केरेलो। 12 तू हिम्मत केर, ते गेइतां अस अपने लोकन ते अपने परमेशरेरे नगरां केरे लेई बहदरी सेइं लड़म; ते ज़ेरू यहोवा रोड़ू लग्गे तेरहु तै केरे।" 13 तैखन योआब ते ज़ैना लोक तैस सेइं साथी थिये अरामी लोकन सेइं जंग केरनेरे लेई नेड़े जे; ते अरामी तैसेरे सामनेरां नश्शे। 14 एन हेरतां कि अरामी नेश्शी जेवरेन अम्मोनी भी अबीशैरे सामनेरां नेशतां नगरेरे अन्तर जे। तैखन योआब अम्मोनी लोकन करां वापस एइतां यरूशलेम नगरे मां अव।

15 फिरी एन हेरतां कि अस इस्राएली सेना करां हैरी जेवरेम सारे अरामी अकोट्ठे भोए। 16 ते हदादेज राज़े दूत भेज़तां फरात दरियारे पार रानेबाले अरामी कुजाए; ते तैनेईं हदादेजेरेरो सेनापति शोबक अपनो प्रधान बनेइतां हेलाम नगरे मां आए। 17 एसेरी खबर शुन्तां दाऊदे सारे इस्राएली अकोट्ठे किये, ते यरदन दरियारे पार च़ेलतां हेलाम नगरे मां पुज़्ज़े। तैखन अराम दाऊदेरे खलाफ मोरच़ो लेइतां तैस सेइं लड़ो। 18 पन अरामी सेना इस्राएली सेनाई करां नश्शी। दाऊदे अरामी सेनारे 700 रथ च़लानेबाले ते 40000 सुवार सिपाही* मारे। ते तैन केरो सेनापति शोबक एन्च़रे ज़खमी कियो कि तै तैड़ी मेरि जेव। 19 ज़ेत्रे राज़े हदादेजेरेरे अधीन थिये तैना इन हेरतां कि अस इस्राएली सेना करां हारे, तैनेईं इस्राएलन सेइं समझोतो कियो, ते तैन केरे अधीन भोए। एल्हेरेलेइ अरामी अम्मोनी केरि मद्दत केरने करां डेरि जे।