1 हे ढ्लाव ते बेइनव, असन कां प्रभु यीशु मसीहेरे वापस एजनेरे बारे मां ज़ोनेरे लेई किछ आहे। तै वक्त एज्जेलो ज़ेइस अस तैस सेइं साथी मिलमेले। 2 इन सोचतां तुस परेशान न भोथ या तुश्शो दिल न घबराए कि प्रभुएरी दिहाड़ी पेइली एवरीए। किछ ज़ोई बटतन कि इन भविष्यिवाणी मां या सन्देशे मां या चिट्ठी मां तैन कां एवरू थियूं। 3 लोक ज़ैना इस बारे मां झूठी गल्‍लां ज़ोतन तैन पुड़ विश्वास न केरा। किजोकि यीशु मसीहेरे वापस एजनेरे पेइले, तै वक्त एज्जेलो ज़ेइस बड़े लोक परमेशरेरे खलाफ भोल्हे, ते फिरी अधर्मी मैन्हु बांदो भोल्हो। तै, तै आए ज़ै नाश भोनेरे लेई ठहरावरोए। 4 तै अधर्मी मैन्हु परमेशरेरी खलाफत केरेलो, ते तैन सब किछ ज़ैन लोक देबते सेमझ़तां आराधना केरतन, तै इन ज़ोलो ई अवं इन सेब्भन करां महान आईं। इड़ी तगर कि तै परमेशरेरे मन्दरे मां बिशतां अपनो आपे जो परमेशर ज़ोलो। 5 इन न बिसरां, कि मीं बड़े बार इन गल्‍लां केरे बारे मां ज़ोवरूए, ज़ैखन अवं तुसन सेइं साथी थियो। 6 हुन्ना तै अधर्मी मैन्हु बांदो नईं भोवरो किजोकि कोई आहे ज़ैने तै रोकोरोए, कि तै अपने वक्ते पुड़ बांदो भोए। 7 किजोकि अधर्मी चीज़ां केरि शक्ति इस दुनियाई मां पेइली छ़ेपतां कम केरने लगोरीए, पन अक आहे ज़ै तैस रोकते। ते तै तैस रोकतो रालो ज़ांतगर तै दूर न कियो गाए। 8 तैट्ठां बाद तै दुष्ट मैन्हु एज्जेलो, पन बादे मां ज़ैखन प्रभु यीशु एज्जेलो, त तैस दुष्ट मैन्हु अपने ऐशेरे फुक्‍की सेइं ते एजनेरी महिमाई सेइं मारेलो। 9 तै दुष्ट मैन्हु, शैतानेरे शेक्ति सेइं एज्जेलो। तै हर किसमेरे झूठे चमत्कार ते निशान, ते बडां-बडां कम्मां केरेलो, ताके लोक सोचन कि तै परमेशरे ज़ै एन केरते। 10 ते तै हर किसमेरां बुरां कम्मां केरेलो, ते तैन धोखो देलो ज़ैना परमेशरे नाश केरनेन। किजोकि तैनेईं तैस सच़्च़े पुड़ विश्वास केरने करां इन्कार कियो, ज़ैस सेइं तैन मुक्ति मैल्हेथी। 11 एल्हेरेलेइ परमेशर तैन मां अक धोखो देनेबाली आत्मा भेज़ेलो ज़ै तैन सच़्च़े करां दूर केरेली, ताके तैना झूठे पुड़ विश्वास केरन ज़ैन तै दुष्ट मैन्हु तैन सेइं ज़ोलो। 12 परमेशर तैन सेब्भी लोकन सज़ा देलो ज़ैनेईं यीशु मसीहेरे सच़्च़े सन्देशे पुड़ विश्वास न कियो, पन पाप केरने सेइं खुश भोए।

13 हे ढ्लाव ते बेइनव, असेईं तुश्शे लेई परमेशरेरू शुक्र कियोरू लोड़े। किजोकि परमेशर तुसन सेइं प्यार केरते, तैने तुस दुनिया बनाने करां पेइले च़ुने, कि पवित्र आत्मारे पवित्र बनाते, ते यीशु मसीहेरे बारे मां ज़ै सच़्च़ो सन्देशे तैस पुड़ विश्वास केरतां परमेशर तुसन मुक्ति दे। 14 ज़ै खुशखबरी असेईं प्रचार की परमेशरे तै इस्तेमाल की, कि तुसन बच़ानेरे लेई कुजाए, तुस इश्शे प्रभु यीशु मसीहेरी महिमाई मां शामल भोथ। 15 एल्हेरेलेइ, ढ्लाव ते बेइनव, ज़ै शिक्षा असेईं तुसन दित्ती, ज़ैखन असेईं तुसन सेइं गल्‍लां की त कने चिट्ठी केरे ज़िरिये, तैस पुड़ तुस लगातार विश्वास केरते राथ। 16 अस प्राथना केरतम इश्शो प्रभु यीशु मसीह एप्पू, ते इश्शो बाजी परमेशर ज़ैने असन सेइं प्यार कियो, ते ज़ैने अपने अनुग्रहे सेइं असन हमेशारो होसलो ते पक्‍की उमीद दित्ती, 17 तैना तुसन होसलो देन, ते तुसन मज़बूत केरन ताके तुस लगातार भलियाई केरथ ते ज़ैन ज़ोथ तैन रोड़ू भोए।