1 हे मालिकव, अपने-अपने गुलामन सेइं साथी न्याय ते ठीक-ठीक बर्ताव केरा, इन सेमझ़तां कि सुर्गे मां तुश्शो भी अक मालिके।

2 प्राथना मां लग्गोरो राथ, ते शुक्र सेइं साथी हुशार राथ। 3 साथी इश्शे लेई भी प्राथना केरते राथ, कि परमेशर इश्शे लेई शुनानेरे लेई एरी बत खोल्‍ले, कि अस मसीहेरे तैस भेदेरे बारे मां ज़ोई बटम ज़ेसेरे लेई अवं कैदे मां आई। 4 ते तैस बांदो केरि, ज़ेन्च़रे मीं कियोरू लोड़े। 5 वक्त कीमती सेमझ़तां बेइरन साथी समझ़दैरी सेइं बर्ताव केरा। 6 तुश्शो वचन सदा अनुग्रहे सेइं ते एरो लूनो भोए, कि तुसन हर एक्‍की मैन्हु रोड़ेच़ारे जुवाब देनो एज्जे।

7 ट्लारे ढ्ला ते वफादार सेवक, तुखिकुसे ज़ै प्रभु मां मेरो मद्दतगार, तै मेरी सेब्भी गल्‍लन मां तुसन ज़ोलो। 8 तै मीं एल्हेरेलेइ तुसन कां भेज़ो, कि तुसन इश्शी हालतरो पतो भोए ते तै तुश्शे दिलन शान्ति दे। 9 ते तैस सेइं साथी उनेसिमुस भी भेज़ो ज़ै वफादार ते ट्लारो ढ्लाए ते तुसन मरांए, ते तुसन इड़ी तगर सैरी गल्‍लां ज़ोले। 10 अरिस्तर्खुस ज़ै मीं सेइं साथी कैदीए, ते मरकुस ज़ै बरनबासेरो ढ्लाए लगते। (ज़ेसेरे बारे मां तुसन हुक्म मैल्होरो थियो कि अगर तै तुसन कां एज्जे, त तैस सेइं रोड़ेच़ारे बर्ताव केरथ) 11 ते यीशु ज़ै जो यूस्तुस ज़ोतन, तै तुसन नमस्कार ज़ोते। खतनो केर्रे लोकन मां सिर्फ ईए परमेशरेरे राज़्ज़े लेई मद्दतगार ते मेरे शैन्तरी वजा राए। 12 इपफ्रास ज़ै तुसन मरांए, ते मसीह यीशुएरो दासे, तुसन जो नमस्कार ज़ोते ते सदा तुश्शे लेई प्राथना केरते, ताके तुस सिद्ध भोइतां पूरे विश्वासे सेइं साथी परमेशरेरे मेर्ज़ी पुड़ मज़बूत राथ। 13 अवं तैसेरो गवाह आईं, कि तै तुश्शे लेई ते लौदीकिया ते हियरापुलिस बालां केरे लेई बड़ी कोशिश केरतो रहते। 14 ट्लारे तबीब लूका ते देमासेरू तुसन नमस्कार। 15 लौदीकिया नगरेरे ढ्लान ते नुमफास ते तैन केरे घरेरे कलीसियान जो नमस्कार ज़ोथ। 16 ते ज़ैखन ई चिट्ठी तुश्शे इड़ी पढ़ी गाए, त एरू केरनू कि लौदीकियारे कलीसियाई मां भी पढ़ी गाए, ते तै चिट्ठी ज़ै लौदीकियारां एज्जे तैस तुस भी पेढ़थ। 17 फिरी अरखिप्पुसे सेइं ज़ोइयथ कि ज़ै सेवा प्रभु मां तीं सौंफी, तैस बड़े हूशैरी सेइं पूरी केरथ।

18 अवं पौलुस अपने हथ्थन सेइं नमस्कार लिखताईं। मेरी शंगलन याद रखा; तुसन पुड़ अनुग्रह भोतो राए। आमीन।