1 अवं पौलुस परमेशरेरी मेर्ज़ी सेइं यीशु मसीहेरो प्रेरित आईं। अवं तुसन ज़ैना परमेशरेरे लोक आथ ते इफिसुस नगरे मां रहतथ ई चिट्ठी लिखने लगोरोईं।
2 इश्शे बाजी परमेशर ते प्रभु यीशु मसीह करां तुसन अनुग्रह ते शान्ति मैलती राए।
मसीह मां आत्मिक उमीद
3 इश्शे प्रभु यीशु मसीहेरे परमेशर ते कने बाजी केरि बडीयाई भोए, इश्शो रिश्तो मसीह सेइं भोनेरे वजाई सेइं तैने असन हर लिहाज़े सेइं तैना आत्मिक बरकतां दित्तोरिन, ज़ैना बरकतां सुर्गेरां एइतिन। 4 ज़ेन्च़रे तैने अस दुनिया बनानेरे पेइली मसीह मां च़ुने, कि अस तैसेरी नज़री मां प्यारे मां पवित्र ते बेइलज़ाम भोम। 5 किजोकि परमेशरे असन सेइं प्यार कियो, तैनी बड़े पेइले ई फैसलो कियोरो थियो कि तै असन यीशु मसीहेरे ज़िरिये अपने बच्चां केरे रूपे मां गोद ने, किजोकि तै इन केरनू चातो थियो। 6 अस परमेशरेरे अनुग्रहेरे लेई तैसेरी बडीयाई केरतम, ज़ै तैने असन मुफते मां दित्तो, किजोकि इश्शो रिश्तो तैसेरे ट्लारे मट्ठे सेइं आहे। 7 परमेशरेरे बड़े अनुग्रहेरे मुताबिक मसीहेरे खूने बगाने सेइं असन छुटकारो मैल्हो, मतलब इश्शे पाप माफ़ भोए। 8 ज़ै तैनी सारे ज्ञान ते समझ़ सेइं साथी असन पुड़ बड़ो जादे कियो। 9 कि तैने अपनि मेर्ज़रो भेद, अपने रोड़े इरादेरे मुताबिक असन पुड़ बांदो कियो, ज़ै तैने पूरो केरनो थापोरो थियो। 10 परमेशरेरे ठहरावरे वक्ते पुड़ तै सुर्ग ते धेरतरी चीज़न साथी आनेलो ते मसीह तैस पुड़ राज़ करालो।
11 मसीह सेइं इश्शो रिश्तो भोनेरे वजाई सेइं परमेशरे अस च़ुने, तैन हासिल केरनेरे लेई ज़ेसेरो वाधो तैने असन देनेरे लेई कियोरो थियो। इन बिलकुल तेन्च़रे भोव ज़ेन्च़रे तैनी बड़े पेइलू पूरू केरनू थापेरू थियूं ते इच्छा कियोरी थी। 12 अस यहूदी पेइले लोक आम ज़ैनेईं मसीह पुड़ उमीद रख्खोरी थी, ते अस च़ुने जे, ताके परमेशरेरे महिमारी स्तुति केरि बटम। 13 ते तुस भी मसीह सेइं शामल भोए ज़ैखन तुसेईं सच़्च़ू वचन शुनू, ज़ै खुशखेबरां तुश्शे लेई मुक्ति आनी, ज़ैखन तुसेईं विश्वास कियो परमेशरे तुसन पुड़ अपनि छाप लाई, ई छाप पवित्र आत्माए, ज़ै तैनी असन दित्तो, ज़ेसेरो वाधो तैनी कियोरो थियो। 14 पवित्र आत्मा भी छुटकारेरे सैयरो ज़ेरोए, ज़ै पक्कू केरते कि परमेशरे असन तै विरासत देलो ज़ेसेरो तैनी वाधो कियोरोए, ते तैनी अस अपने लोकां केरे रूपे मां घिनोरेम, ताके तैसेरे महिमारी बडीयाई भोए।
पौलुसेरी प्राथना
15 एल्हेरेलेइ, ज़ेइसेरू मीं शुनेरूए कि तुस प्रभु यीशु पुड़ विश्वास केरतथ ते परमेशरेरे सेब्भी लोकन सेइं प्यार केरतथ, 16 तुश्शे लेई परमेशरेरू शुक्र केरनू न शैरी, ते अपने प्राथनान मां तुसन याद केरताईं। 17 अवं प्राथना केरताईं कि परमेशर, इश्शे प्रभु यीशु मसीहेरे महिमा बाले बाजी, तुसन पवित्र आत्मा दे, तै तुसन अक्लमन्द बनालो ते परमेशरे तुसन पुड़ बांदो केरेलो, ताके तुस तैस पिशैनी बटथ। 18 अवं ई भी प्राथना केरताईं कि तै तुश्शे मने खोलेलो, कि तुस बुझ़थ कि इश्शे कुजानेरी कुन उमीदे, ते केत्री महान ते महिमा बैली बरकतां केरे लेई परमेशरे अपने लोकन जो वाधो कियोरोए। 19 ते तैसेरी शक्ति इश्शे लेई ज़ैना अस विश्वास केरतम, केत्री महाने, तैसेरी शेक्तरे कम्मेरे मुताबिक, 20 ज़ैन तैनी मसीहेरे बारे मां कियूं, कि तैस मुड़दन मरां ज़ींते केरतां सुर्गे मां अपने देइने पासे बिशालो। 21 तैड़ी तै हर किसमेरी हुकूमत, ते अधिकार, ते शक्ति, ते प्रभुता, ते तैसेरी पदवी हर एक्के अधिकैरी करां तै महाने, ज़ैना न सिर्फ इस जहानी मां, पन एजने बाले जहानी मां भी आए। 22 ते परमेशरे सब किछ मसीहेरे अधिकारे मां कियूं, तैनी सेब्भी चीज़न पुड़ अधिकारी बनेइतां कलीसिया दित्तो। 23 कलीसिया मसीहेरी जाने, ते तैसेरी भरपूरी ज़ै सेब्भन मां सब किछ पूरू केरतीए।