1 अवं ज़ै प्रभुएरी सेवा केरनेरे वजाई सेइं कैदे मां आईं, तुसन कां बिनती केरताईं, कि ज़ेन्च़रे परमेशरे तुस अपने लोक भोनेरे लेई कुजेवरेथ, तैसेरे मुताबिक ज़िन्दगी भी ज़ीथ। 2 मतलब सैरी दीनता ते नम्रता सेइं साथी, ते सबर केरतां प्यारे सेइं एक्‍की होरेरी झ़ैल्‍लां। 3 इस कम्मे मां अपनि पूरी कोशिश केरा ताके तुस मेल मिलापे सेइं राथ, किजोकि पवित्र आत्मारे ज़िरिये तुस अक कियोरेथ। 4 अस सारे विश्वासी एक्‍की जानरे अंगां केरे ज़ेरे आम, ते असन सेब्भन अक्‍के पवित्र आत्माए मैल्होरोए; ते तुसन अक्‍के उमीद दित्ती, ज़ैखन तुस परमेशरेरे लोक भोनेरे लेई च़ुने जे। 5 अक्‍के प्रभुए ज़ै यीशु मसीहे, ज़ैस पुड़ अस सब विश्वास केरतम, ते असेईं सेब्भन अक्‍के बपतिस्मो मैल्हो। 6 ते अक्‍के परमेशरे, ज़ै सेब्भी केरो बाजीए, तैए सेब्भन पुड़ राज़ केरते ते इश्शे दरमियान कम केरते, ते असन सेब्भन मांए रहते। 7 पन मसीहे असन मरां हर एक्‍की तैसेरू कम केरनेरे लेई अलग-अलग किसमेरी काबलीत दित्तोरीए।

8 एल्हेरेलेइ पवित्रशास्त्र ज़ोते,

"ज़ैखन तै उच्‍चे पुड़ च़ाढ़ो,

ते तैने बड़े कैदी एप्पू सेइं साथी ने,

ते तैने लोकन बेड़ि बरकतां दित्ती।"

9 (तैसेरे उच्‍चे च़ढ़नेरो साफ मतलबे ई आहे, कि मसीह धेरतरे बुनीयें ठारन मां एवरो थियो। 10 एल्हेरेलेइ मसीह बुन एवरो थियो, तैए आहे ज़ै सैरी अम्बरे करां भी उबरो जेव, मसीहे एन एल्हेरेलेइ कियूं ताके सब किछ तैसेरे हज़ूरी सेइं भरपूर भोए) 11 ते तै मसीहे ज़ैने (कलीसियाई) ज़िमेवारी दित्ती, तैने किछ प्रेरित किछ नबी, किछ खुशखबरी शुनाने बाले, किछ रखवाले ते किछ उस्ताद च़ुने। 12 मसीहे अपने लोकन इना ज़िमेदारी एल्हेरेलेइ दित्तोरिन, कि कलीसिया ज़ै मसीहेरी जाने तरक्‍की केरे। 13 ज़ैखन कि अस सब विश्वास, ते परमेशरेरे मट्ठेरी पिशानी मां अक भोम, ते ज़ांतगर अक सिद्ध मैन्हु न भोम ते मसीहेरे कदेरे अनदाज़े तगर न पुज़ाम। 14 ताके अस अग्रोवं जो बच्‍चां केरे ज़ेरे न रहम, ज़ैना मैन्हु केरि ठगनेरी गल्‍लां ते च़लैकी सेइं तैन केरे कोशिशी सेइं खियालां केरि ते शिक्षारी हर एक्‍की बयाने सेइं उछ़ड़ाए, ते इरां उरां घुमाए गाते भोन। 15 बल्के प्यारे सेइं सच़ ज़ोइतां, सेब्भी गल्‍लन मां मसीहेरे ज़ेरे सिद्ध भोथ ज़ै कलीसियारी क्रोड़ी। 16 ज़ैस सेइं सारी जान सेब्भी जोड़ां केरि मद्दती सेइं साथी मिलतां, ते साथी ज़ुड़तां तैस अस्सरेरे मुताबिक ज़ै सेब्भी हिस्सन सेइं भोइतां, अपने आपे बद्धाते, कि तै प्यारे मां तरक्‍की केरतो राए।

17 एल्हेरेलेइ अवं इन ज़ोताईं, ते प्रभु मां खबरदार केरताईं कि ज़ेन्च़रे गैर विश्वासी लोकां केरे लोक अपने मनेरे बेकार खियालन पुड़ च़लतन, तुस अज़ेरे बाद तैन केरे ज़ेरे न च़ला। 18 किजोकि तैना बेसमझ़ भोवरेन, ते तै अज्ञानतारी वजाई सेइं ते सखत मनेरे वजाई सेइं तैना तैस ज़िन्दगी करां दूर आन ज़ै परमेशर देते। 19 ते तैना बेशर्म भोइतां, एशे मां लेगि जे, कि सेब्भी किसमेरां गन्दां कम्मां शोके सेइं केरन। 20 पन तुसन मसीहेरी एरी शिक्षा नईं मैल्होरी। 21 बल्के मीं पूरू याकीने कि ज़ैखन तुसेईं यीशुएरे बारे मां अपने उस्तादन करां शुनू, त तुसेईं तैन करां सच़्च़ी शिक्षा शिख्खी। 22 कि तुस पेइले चाल चलनेरे पुरानी इन्सानयती ज़ै टपलाने बैली इच्छां केरे मुताबिक भ्रष्ट भोइ गातीए, खोल्‍ला। 23 इसेरे बदले पवित्र आत्मा तुश्शे खियालन ते निज़िरियो बदले। 24 परमेशरे तुसन नव्वों सुभाव दित्तोरोए, ज़ै तैसेरे स्वभावेरे ज़ेरोए। त तुस नव्वें स्वभावेरे ज़ेरे ज़ीथ। सच़्च़े तुस धर्मी ते पवित्र भोथ।

25 एल्हेरेलेइ झूठ ज़ोनू शैरतां हर कोई अपने पड़ोसी सेइं सच़ ज़ोए, किजोकि अस एप्पू मांमेइं एक्‍की जानेरे अंग आम। 26 अगर तुस क्रोधे मां भोथ खबरदार राथ, कि पाप न केरथ, दिहाड़ो डुबने तगर तुश्शो क्रोध मुक्‍की गाए। 27 ते शैताने मौको न देथ कि तै तुश्शी अज़मैइश केरे। 28 च़ोरी केरनेबालो फिरी च़ोरी न केरे; बल्के ईमानदैरी सेइं अपने हथ्थन सेइं मेहनत केरे; एल्हेरेलेइ ज़ैस ज़रूरत भोए तैस देनेरे लेई तैस कां किछ भोए। 29 कोई गन्दी गल तुश्शे ज़बाना न निस्से, पन ज़रूरतरे मुताबिक तैन्ने ज़ोथ, ज़ैन होरि केरे लेई विश्वासे मां मज़बूती सेइं बद्धनेरी वजा भोए। तैखन ज़ैन तुसेईं ज़ोवं तैन लोकां केरे लेई रोड़ू भोल्हु ज़ैना तुश्शी शुन्तन। 30 ते ज़ैन किछ तुस केरथ तैसेरे वजाई सेइं परमेशरेरे पवित्र आत्मा दुखी न केरा, ज़ैस सेइं तुसन पुड़ छुटकारेरे दिहाड़रे लेई छाप दित्तोरीए। 31 सेब्भी किसमेरी ट्लिठार ते प्रकोप, ते क्रोध, सखत गल, ते तुहीन ते सारो बैर-भावे सेइं तुस दूर कियोरेथ। 32 ते एक्‍की होरि पुड़ दया केरा, ते माफ़ केरनेबाले भोथ, ते ज़ेन्च़रे परमेशरे मसीह मां तुश्शे पाप माफ़ किये, तेन्च़रे तुस भी एक्‍की होरेरे पाप माफ़ केरा।