1 बीतोरे वक्ते मां परमेशरेरे तरफां तुसन कां नव्वीं ज़िन्दगी न थी; तुस अपने पाप ते बुरे कम्मां केरे वजाई मरोरे लोकां केरे ज़ेरे थिये। 2 तैस वक्ते तुस दुनियारे रीति पुड़ च़लते थिये, ते तुस अम्बरेरे दुष्ट आत्मा केरे अधिकैरी मुताबिक च़लते थी, ज़ेसेरी आत्मा हेजू भी परमेशरेरे हुक्म न मन्नेबाले लोकां केरे मन्न मां कम केरती। 3 एन मां अस भी सब पेइले अपने जिसमेरे खुवैइशन मां दिहाड़े कटते थी, ते जिसम, ते मनेरी मर्ज़ी पूरी केरते थी, ते होरि लोकां केरे ज़ेरे स्भावे सेइं बुरे थिये ते परमेशरेरे सज़ाहरे अधीन थिये। 4 पन परमेशर ज़ै बड़ो दया केरनेबालोए; अपने तैस बड़े प्यारे सेइं, ज़ैस सेइं तैने असन सेइं प्यार कियो। 5 ज़ैखन अस पापां केरे वजाई सेइं मर्रे लोकां केरे ज़ेरे थिये, तैनी असन ज़िन्दगी दित्ती ज़ैखन तैनी मसीह मुड़दन मरां ज़ींतो कियो, परमेशरेरे अनुग्रहे सेइं तुसन मुक्ति मैल्होरीए। 6 किजोकि तैनी अस मसीह सेइं साथी मुड़दन मरां ज़ींते किये, ते सुर्गेरे ठैरन मां तैस सेइं साथी बिशाले। 7 परमेशरे एन कियूं कि एजने बाले वक्ते मां दुनियारे लोकन हिराए कि तैसेरो अनुग्रह केत्रो महाने। ई अनुग्रह इश्शे लेई हिराव, तैने इश्शे लेई एन कियूं ज़ैना अस यीशु मसीह मां आम। 8 किजोकि विश्वासेरे ज़िरिये परमेशरेरे अनुग्रहे सेइं तुसन मुक्ति मैल्होरीए, ते तुसेईं अपनो आप एप्पू नईं बच़ावरो बल्के परमेशरेरे दाने सेइं तुस बच़ोरेथ। 9 ते भले कम्मन सेइं नईं, एरू न भोए कि कोई घमण्ड केरे। 10 किजोकि अस परमेशरेरे बनोरेम; ते मसीह यीशु मां तैन भले कम्मां केरे लेई पैदा कियोरेम, ज़ैना परमेशरे पेइले इश्शे केरनेरे लेई तियार कियां।

11 एल्हेरेलेइ याद केरा, कि तुस ज़ैना ज़रमनेरे गैर कौमरेथ, ते खतनो कियोरे लोक तुसन जो बगैर खतने बाले ज़ोतन। 12 तुस लोक तैस वक्ते मसीह न थिये ज़ानते, ते तुस परमेशरेरे च़ुनोरे इस्राएली लोक न थिये, ते तुस तैन रोड़ी चीज़न मां हिस्सेदार न थिये ज़ैन केरो वाधो परमेशरे यहूदी लोकन सेइं कियोरो थियो, ते न उमीद ते दुनियाई मां परमेशरे करां दूर थिये। 13 पन अक वक्त थियो कि तुस परमेशरे करां दूर थिये, पन हुनी यीशु मसीह मां तैसेरे खून सेइं नेड़े आनोरेथ। 14 किजोकि मसीहे इश्शो मेल कराव, तैन्ने यहूदी ते गैर यहूदी दूईये अक केरे, ते अलग केरनेबाली दिवार ज़ै मझ़ाटे थी, डोली। 15 मसीहेरे क्रूसेरे मौतरी वजाई सेइं, तैनी कानूनेरे सारे नियम पूरे तरीके सेइं खतम किये। मसीहेरो एरो केरनेरो मकसद ई थियो कि दूई टोली केरि अक नव्वीं टोली बनाए, ज़ै तैस सेइं ज़ुड़ोरी भोए। 16 मसीहेरे क्रूसेरी मौतरे ज़िरिये, तैनी दूई टोली अक की, ते परमेशरे सेइं तैन केरो मेल कराव, एन्च़रे यहूदी ते गैर यहूदी केरि दुश्मनी खतम की। 17 ते मसीहे एइतां तुस गैर कौमरे लोक ज़ैना परमेशरे करां दूर थिये, ते यहूदी ज़ैना तैसेरे नेड़े थिये, दूईयन मेल मिलापेरी खुशखबरी शुनाई। 18 किजोकि मसीहेरे बदौलम अस सारे एक्‍की पवित्र आत्मारे ज़िरिये बाजी परमेशरे कां एज्जी बटतम। 19 एल्हेरेलेइ तुस गैर कौमां केरे लोक परदेशी ते मुसाफर न राए, पन परमेशरेरे लोकां केरू झुण्ड, ते परमेशरेरे घरानेरे भोए। 20 तुस इमारतरे ज़ेरेथ ज़ेसेरी बुनीयाद प्रेरित ते नबी आन ते यीशु मसीह एप्पू तैसेरे कूनेरो घोड़े। 21 ज़ैस मां सारी इमारत साथी मिलतां प्रभु मां अक पवित्र मन्दर बनती गातीए। 22 तुस गैर कौमरे विश्वासी लोक भी परमेशरेरे होरि लोकन सेइं साथी शामल किये जे, किजोकि तुस मसीह सेइं साथी अक भोवरेथ। ताके तुस अक घर बनथ ज़ैड़ी परमेशरेरी आत्मा रहतीए।