1 किजोकि परमेशरे तुश्शे गैर कौमां केरे लेई इन कियोरू, अवं पौलुस तुश्शे लेई प्राथना केरताईं, अवं कैदे मां आईं, किजोकि अवं तुश्शे लेई यीशु मसीहेरी सेवा केरताईं। 2 पक्‍कू तुसेईं शुनेरूए, परमेशरे अपने अनुग्रहेरे ज़िरिये तुसन खुशखबरी शुन्नेरी लेई मीं ज़िमेवारी दित्तोरीए। 3 परमेशरेरो छ़पोरो मकसद बड़ो पेइलो छ़पोरो थियो, हालांकी तैनी मीं पुड़ बांदो कियो, किछ गल्‍लां आन ज़ैना अवं तुसन चिट्ठरे ज़िरिये समझ़ानो चाताईं। 4 ज़ैस सेइं तुस पेढ़तां बुझ़ी बटतथ, कि अवं मसीहेरो तै भेद कोड़ि तगर समझ़ताईं। 5 बीतोरे वक्ते मां परमेशरे ई भेद लोकन पुड़ बांदो नईं कियोरो, पन हुनी पवित्र आत्मारे ज़िरिये अपने पवित्र प्रेरितन ते नेबन पुड़ बांदो कियो। 6 परमेशरेरो मकसद ईए, खुशखेबरारे ज़िरिये यीशु मसीहे सेइं तैन केरो रिश्तो भोनेरे वजाई सेइं गैर कौमां केरे लोक तैस्से विरासती मां हिसेदार भोल्हे, ते तैना तैस्से जानरे अंग आन, ज़ेसेरो वाधो परमेशरे यहूदन सेइं कियोरो।

7 परमेशरे अनुग्रह ते बेड़ि शेक्ति सेइं मीं तै खुशखेबरारी प्रचार केरनेरे लेई सेवा केरनेरो खास अधिकार दित्तोरोए। 8 चाए अवं परमेशरेरे सेब्भी लोकन मरां निकड़े करां निकोड़ोईं। परमेशरे मीं पुड़ अनुग्रह कियो, कि अवं गैर कौमन खुशखबरी शुनेई बेटि कि मसीह हमेशारी बरकतां केरो देनेबालोए। 9 अवं इस भेदेरे मकसदेरे बारे ज़ोनेरे लेई च़ुनोरोईं, ज़ै परमेशर हर चीज़ बनानेबालोए तैनी शुरू करां छ़पोरो रखोरो थियो। 10 ताके हुनी कलीसियारे ज़िरिये सेइं, परमेशरेरू बड़ू ज्ञान, अम्बरेरे तैन प्रधान्न ते अधिकैरन पुड़ बांदू कियूं गाए। 11 परमेशरे दुनिया बनानेरे पेइलो इन्ने थापेरू थियूं, ज़ैन तैने इश्शे प्रभु यीशु मसीह मां पूरू कियूं। 12 किजोकि मसीह पुड़ इश्शो विश्वासे, तैसेरे वजाई सेइं अस परमेशरेरी मौजूदगी मां हिम्मत ते भरोसे सेइं साथी एज्जी बटतम। 13 एल्हेरेलेइ अवं बिनती केरताईं कि ज़ैना दुख तुश्शे लेई मीं पुड़ लगोरेन एजने, तैन केरे वजाई सेइं दिलेरी न शैरी, किजोकि इन सब तुश्शे फैइदेरे लेईए।

14 एल्हेरेलेइ अवं तैस बाजी परमेशरेरे कां ज़ैधू केरे भारे प्राथना केरताईं, 15 तैए आहे ज़ै सुर्ग ते धेरती पुड़ रानेबाले विश्वासी लोकां केरो बाजी। 16 कि तै अपने महिमारे धनेरे मुताबिक तुसन इन दान दे, कि तुस तैसेरी आत्माई सेइं अपनो एन्त्रियों मैन्हु मां शक्ति हासिल केरतां मज़बूत भोते गाथ। 17 ते विश्वासे सेइं मसीह तुश्शे दिले मां राए, कि तुस प्यारे मां ज़ील छ़ेडतां ते मुनीयाद छ़ेडतां, 18 सब पवित्र लोकन सेइं रोड़ेच़ारे समझ़नेरी शक्ति हासिल केरा; कि तैसेरी चौड़ाई, ते लमबाई, ते ऊँचाई, ते डुग्घार केत्रोए। 19 ते अवं प्राथना केरताईं कि तुस मसीहेरे तैस प्यारे सेमझ़ी बटतथ ज़ै समझ़ी करां बेइरे, कि तुस परमेशरेरी भरपूरी सेइं भेरोते गाथ। 20 हुनी ज़ै एरो शेक्ति बालोए, ज़ै इश्शी बिनती ते समझ़ी करां बड़ू जादे कम केरि बटते, ते तैस शेक्तरे मुताबिक असन मां कम केरते, 21 कलीसिया मां, ते मसीह यीशु मां, तैसेरी महिमा पीढ़ी करां पीढ़ी तगर हमेशा भोती राए। आमीन।