1 अवं अपने पहरे पुड़ खड़ो रालो, ते गुम्मटे पुड़ च़ेढ़तां रुकोरो रालो, ते बलगतो रेइलो कि तै मीं सेइं कुन ज़ोते? ते अवं अपने कियोरे बिनतरे बारे मां कुन जुवाब देईं?

2 फिरी यहोवा मीं सेइं ज़ोवं, "दर्शनेरी गल्‍लां लिखतां रख; बल्के पेट्टी पुड़ साफ-साफ लिखतां रख कि तैन दौड़ते बार भी रोड़ेच़ारे पढ़ू गाए। 3 किजोकि इस दर्शनेरी गल ठहरावरे वक्ते पुड़ पूरी भोनेबालीए, बल्के इसेरे पूरे भोनेरो वक्त जल्दी एज्जी राहोरोए। इस मां धोखो न भोल्हो। चाए इस मां च़िर भी भोए, फिरी भी तैस बलगते रानू; किजोकि तै पक्‍की पूरी भोल्ही ते तैस मां च़िर न भोल्हु। 4 हेर, तैसेरो मन घमण्डे सेइं भरोरोए, तैसेरो मन सिद्धो नईं। पन धर्मी अपने विश्वासे सेइं ज़ींतो रालो।✝ 5 शराबी सेइं धोखो भोते; घमण्डी मैन्हु घरे न राए, तैसेरी इच्छा पातालेरी ज़ेरि पूरी न भोए, ते मौतरू ज़ेरू तैसेरू पेट न भेरोए। तै सब कौमन एप्पु कां खिचते, ते सब मुल्खां केरे लोकन एप्पु कां अकोट्ठे केरतां रखते।"

6 कुन तैना सब तैसेरी मसाल देइतां तैस जो तहंने न मारेले, ते एन ज़ोले, "तैस पुड़ अफ़सोस ज़ै होरि केरि धन-दौलत थुसोड़तां अमीर भोइ गाते? अफ़सोस तैस पुड़ ज़ै बन्धे रेखोरी चीज़ेइं सेइं अपनु घर भरते!" 7 ज़ैना तीं करां कर्ज़ो नेतन कुन तैना लोक अचानक खड़े न भोल्हे? ते कुन तैना न बींझ़ेले ज़ैना तीं मुसीबती मां छ़डेले? 8 ते कुन तू तैन करां न लुट्टो गालो? तीं बेड़ि कौमां लुटोरिन, एल्हेरेलेइ सब बच़ोरे लोक भी तीं लुटेले। एल्हेरेलेइ मैन्हु केरो कत्ले, ते तै ज़ुलम भी ज़ै तीं इस मुल्खेरे राजधैनी ते इस मां सब रानेबाले लोकन पुड़ कियोरोए।

9 तैस पुड़ अफ़सोस, ज़ै अपने घरेरे लेई अन्यायेरे लालच़ेरे फैइदेरो लालच़ीए, ताके तै अपनो आल्हो उच्‍चे ठैरी पुड़ बनेइतां आफती करां बच़े। 10 तीं बेड़ि कौमां केरि बरबादी केरतां अपने घरेरे लेई शर्मिन्दगरी योजना की, ते अपने प्राणा केरो दोषी भोव। 11 किजोकि घरेरी दिवारारो घोड़ बिनती केरते, ते तैन केरे छतरी केड़ी तैन केरे सुरे मां सुर मिलेइतां जुवाब देतिन।

12 अफ़सोस तैस पुड़ ज़ै कत्ल केरतां नगर बनाते, ते बुराई केरतां नगर मज़बूत केरते। 13 हेर, कुन सेना केरे यहोवारी तरफां एन न भोए कि मुल्खे-मुल्खेरे लोक मेहनत त केरतन, पन तैना अग्गी मां भस्म भोइ गातन; ते रियासत-रियासतरे लोकां केरि मेहनत बेफैइदी भोइ गातीए। 14 किजोकि धरती यहोवारे महिमारे ज्ञाने सेइं एन्च़रे भेरोई गाली ज़ेन्च़रे समुन्दर पैनी सेइं भेरतांए।

15 अफ़सोस तैस पुड़ ज़ै अपने पड़ोसी तांतगर शराब पियाते, ते तैस मां बिष मिलेइतां तैस मसत केरते कि तैसेरी नग्गी जान हेरे। 16 तू इज़्ज़तरे बदले बदनैमी सेइं भेरोई जेवरोस, तू भी पी, ते अपनो आप एरहो बांदो केर कि तेरो खतनो नईं भोवरोए! ज़ै कुटोरो यहोवारे देइने हथ्थे मां रहते, तै घुमतां तेरे पासे भी एज्जेलो, ते तेरी इज़्ज़त तेरे उलटी सेइं अशुद्ध भोइ गाली। 17 किजोकि लबानोने मां तेरो कियोरो ज़ुलम* ते तैट्ठेरे जंगली जानबरन पुड़ तेरो कियोरो ज़ुलम, ज़ैन सेइं तैना डेरि जेवरे थिये, तीं पुड़ एज्जी गाले। इन मैन्हु केरे कत्ले ते तैस ज़ुलमेरे वजाई सेइं भोल्हु, ज़ै इस मुल्खे ते राजधैनी ते इन सब रानेबालन पुड़ कियो जेवरोए।

18 मूरती बनानेबाले कुन फैइदो हेरतां बनाई? फिरी झूठ शिखालने बाली ते ढालोरी मूरती मां कुन फैइदो हेरतां ढालने बाले तैस पुड़ एत्रो भरोसो रख्खो कि न ज़ोनेबाली ते निकम्मी मूरती बनाए?✝ 19 अफ़सोस तैस पुड़ ज़ै लेकड़री मूरती जो ज़ोते बींझ़, ते बेजान घोड़ेरी मूरती जो ज़ोते ज़ींती खड़ी भो, तै कुन शिखी सकते? तै त सोन्ने चैंदी सेइं मढ़ोरीए, पन तैस मां ज़िन्दगी नईं।✝

20 पन यहोवा अपने पवित्र भवने मांए; सारी ज़मीन तैसेरे सामने च़ुप राए।