हबक्‍कूक 1

हबक्‍कूक नेबेरी यहोवा सेइं शकैइत

1 दर्शने मां हबक्‍कूक नेबी जो यहोवा ई सन्देश दित्तो।

2 हबक्‍कूक नबी ज़ोते, हे यहोवा अवं केइस तगर मद्दतरे लेई तीं कां बिनती केरेलो, ते तू न शुनेलो? अवं केइस तगर तेरे सामने "ज़ुलम, ज़ुलम" ज़ोतो रेइलो? कुन तू न बच़ालो? 3 तू मीं अनर्थ कम्मां किजो हिरातस? तू बुराई किजो बरदाशत केरतस? मेरे सामने लूट-पाट ते ज़ुलम भोंते रहतन; ते लड़ाई भोती रहतीए ते बेंस बद्धतीए। 4 एल्हेरेलेइ कानून कमज़ोर भोइ जेवरोए ते न्याय कधी बांदो न भोए। दुष्ट लोक धेर्मी लोकन घेरतन; एल्हेरेलेइ न्यायेरो खून भोतो रहते।

5 तैखन यहोवा अपने लोकन सेइं ज़ोवं, कौमां-कौमां केरे पासे ध्यान लेइतां हेरा, ते बड़े हैरान भोथ। किजोकि अवं तुश्शे दिहैड़न मां एरां कम्मां केरनेबालोईं कि अगर अवं तुसन सेइं ज़ोईं भी त तुसां याकीन न केरेले।✝1:5 प्रेरित. 13:41. 6 हेरा, अवं कसदी लोकन*1:6 कसदी लोक बाबेलेरे लोक उभारने बालोईं, तै ज़ालम ते क्रूर कौमे, तैना तैन बेस्तन मां ज़ैना तैन केरि अथ्थी नईं तैन पुड़ कब्ज़ो केरनेरे लेई सैरी ज़मीनी पुड़मेइं फैली जेवरेन।✝1:6 प्रका. 20:9. 7 तैना खतरनाक ते डरावने लोकन, तैना एप्पु अपने लेई न्याय ते तारीफ़री वजा आन। 8 तैन केरे घोड़े चीतन करां भी तेज़ दौड़ने बालेन, तैना ड्लवझ़ी शिकार केरनेबाले गिद्दन करां भी जादे खुन्खारन। तैन केरे सुवार दूर-दूर नेशतां एइतन। हाँ, तैना दूरेरां च़ले एइतन। ते शिकारे पुड़ पेने बाले उकाबेरे शिकारे पुड़ पेतन। 9 बाबेलेरे सिपाही सब ज़ुलम केरनेरे लेई एइतन; सामनेरे पासे तुत्तर केरतां तैना सिद्धे च़ले एइतन, ते गुलाम लोकन रेतरे सिक्‍कां केरे ज़ेरे अकोट्ठे केरतन। 10 तैना राज़न त मज़ाके मां उड़ातन, ते हाकिमां केरि हासी बनातन। तैना सब मज़बूत क़िलन घटिया समझ़तन, किजोकि तैना दमदमो बेन्धतां तैन नगरन ज़ींती छ़डतन। 11 तैखन तैना हवारे ज़ेरे तेज़ी सेइं च़लते ते मर्यादा छ़ेडतां दोषी भोतन, किजोकि तैन केरि ताकत तैन केरो देबतोए।

12 हे मेरे प्रभु यहोवा, हे मेरे पवित्र परमेशर, कुन तू अनादिकाले करां नईं? एल्हेरेलेइ अस लोक न मरमेले। हे यहोवा, तू तैन केरो न्याय केरनेरे लेई ठहरावरोस; हे चट्टान, तीं झ़िड़क देनेरे लेई तैना ठहरावरेन। 13 तेरी एछ़्छ़ी एरी पवित्रन कि तैना बुरैई हेरी न सखन, तू बुरैई बरदाश न केरि सखस; त तू फिरी धोखे बाज़ां केरि किजो बरदाशत केरतस, ते ज़ैखन दुष्ट बेकसूरे निगली गातन, तैखन तू च़ुप रहतस? 14 तू किजो इन्सानन समुन्दरेरी मेछ़ली केरे ज़ेरे ते तैन पेटेरे भारे च़लनेबाले जीपां केरे ज़ेरे बनातस ज़ैन पुड़ कोई हुकूमत केरनेबालो नईं। 15 तै तैन सेभी मैन्हन कंटन सेइं ट्लाते ते जाले मां दीलतां ते महाजाले मां फसाते; एल्हेरेलेइ तैना खुश ते मघन भोतन। 16 एल्हेरेलेइ तै अपने जाले कां बलि च़ाढ़ते, ते अपने महाजाले कां गुग्गल बालते; किजोकि तैन्नां केरे ज़िरिये तैसेरो हिस्सो बड़ो रोड़ो भोते, ते तैन केरू खानू चिकनू भोते। 17 कुन तै जाल खाली केरने ते कौमां-कौमां केरे लोकन लगातार बेरहमी सेइं मारनेरे लेई रोकेलो?