लूका 7

24 ज़ैखन यूहन्नारे बिस्तार देनेबाले लोक वापस च़ले जे, त यीशु यूहन्नारे बारे मां गवाही देने लगो, "तुस जंगले मां कुन हेरने जेवरे थिये? कुन हवाई सेइं हिलते निरैठरे डाल? 25 त फिरी तुस होरू कुन हेरने जेवरे थिये? कुन रोड़ां लग्गोरां लिगड़न बालो मैन्हु? हेरा, ज़ैना मगां लिगड़ां लाने बाले मैन्हु, ते ज़ैना एश केरनेबाले लोक भोतन। तैना राज़ मेहलन मां रहतन, 26 त फिरी तुस होरू कुन हेरने जेवरे थिये? कुन कोई नबी? हाँ, अवं तुसन सेइं ज़ोताईं, नेबी करां बड्डे। 27 ऐह तैए, ज़ेसेरे बारे मां लिखेरूए,

‘हेर, अवं अपनो बिस्तार देनेबालो तीं अग्री-अग्री भेज़ताईं, ज़ै तेरी बत अग्रोवं तियार केरेलो।’ "

28 यीशुए ज़ोवं, "अवं तुसन सेइं सच़ ज़ोताईं, कि ज़ै कुआन्शन करां ज़र्मोरोए, तैन मां यूहन्ना बपतिस्मो देनेबाले करां बड्डो कोई नईं। पन ज़ै परमेशरेरे राज़्ज़े मां निकड़ोए, तै यूहन्ना करां बड्डोए।" 29 ज़ैखन तैन लोकेईं एन गल्‍लां शुनी त धड़त नेनेबालेईं भी यूहन्ना बपतिस्मो देनेबाले करां बपतिस्मो नेइतां परमेशर धर्मी मन्नो। 30 पन फरीसी लोकेईं ते शास्त्री लोकेईं तैस करां बपतिस्मो न नेइतां परमेशरेरी मर्ज़ी अपने बारे मां टाली।