मरकुस 7

9 फिरी तैनी तैन सेइं ज़ोवं, "तुस केत्रू गलत केरतथ, कि अपने रीति-रुवाज़ मन्नेरे लेई परमेशरेरे हुक्म ट्लोड़तथ। 10 किजोकि मूसा नेबे ज़ोवरूए कि, परमेशरे सारे मैन्हन ई हुक्म दित्तो कि, ‘तू अपने हाज बव्वेरी इज़्ज़त केर। त ज़ै कोई अपने हाज बव्वे जो बुरू ज़ोलो, तै ज़रूर मारो गालो।’ 11 पन तुस ज़ोतथ कि अगर कोई मैन्हु अपने हाज बव्वे सेइं सिर्फ एन ज़ोए, त तैन बड़ू आहे कि, ‘मीं करां ज़ै किछ मद्दत तुसन मैल्ही सकती थी, तै पेइली बलिदान भोवरीए, यानी परमेशरे जो च़ढ़तल च़ाढ़ोरीए। एल्हेरेलेइ, अवं तुसन किछ न देइ सेखी।’ 12 एरी शिक्षा देइतां तुस लोकन तैन केरे हाज बव्वां केरि किछ मद्दत केरने न देथ। 13 एन्च़रां तुस अपनि परमपरा च़लानेरे लेई, परमेशरेरी गल्‍लां टेली छ़डतथ। एरी ज़ेरि तुस होरि भी बेड़ि गलत परमपरा मन्ते एवरेथ।"