1 फिरी तैनी मैन्हें अवं परमेशरेरे भवने कां नियो, ते तैसेरे दूईये पासां केरे खम्भे ते तैना शा-शा हथ चौड़े निस्से, ऐह त तेम्बेरी चौड़ाई थी। 2 दारेरी चौड़ाई 10 हथ थी, ते दारेरे दूईये पासां केरि दिवारां पंच़-पंच़ हथ थी; ते तैनी भवनेरी लम्बाई नापी ते तै 40 हथ निस्सी ते चौड़ाई 20 हथ निस्सी। 3 तैखन तैनी अन्तर गेइतां दारेरे खम्भे नापे, ते तैना दूई-दूई हथ निस्से, ते दार शा हथ थियूं, ते दारेरी चौड़ाई सत हथ थी। 4 तैखन तैनी अन्तर गेइतां कमरेरी लम्बाई ते चौड़ाई भवनेरे सामने नापी ते तै 20-20 हथ निस्सी; ते तैनी मीं सेइं ज़ोवं, "ई त परमपवित्र ठारे।"

5 फिरी तैनी भवनेरी दिवार नापी ते तै शा हथ निस्सी, ते भवनेरे आसे-पासे च़ेवर-च़ेवर हथ चौड़े कमरे थिये। 6 एना बेइरीं कमरे ट्लाई मंज़लां थिये; ते हर एक्‍की मंज़ली पुड़ 30-30 कमरे थिये। भवनेरे आसे-पासेरी दिवारां एल्हेरेलेइ थी कि बेइरीं कमरे तैसेरे सहारे मां भोन; ते तैस मां कमरां केरि केड़ी रेखोरी थी, ते भवनेरी दिवारां केरे सहारे न थी। 7 भवनेरे आसे-पासे ज़ैना कमरे बेइरीं पासे थिये, तैन मरां ज़ैना बहा थिये, तैना जादे चौड़े थिये; मतलब भवनेरे आसे-पासे ज़ैन किछ बनेरू थियूं तैन ज़ेन्च़रे-ज़ेन्च़रे उबरू च़ढ़तू जेवं तेन्च़रे-तेन्च़रे चौड़ू भोतू जेवं; एस तरीके सेइं तैस घरेरी चौड़ाई बेइहीं पासे बद्धती जेई, ते लोक बुनीयें मंज़लरे मझ़ाटेरां उबरे बेहीं मंज़ली जो च़ैढ़ी सखते थिये। 8 फिरी मीं भवनेरे आसे-पासे उच्‍ची ज़मीन लाही, ते बेइरीं कमरां केरि ऊँचाई जोड़े तगर शा हथ बाँसेरी थी। 9 बेइरीं कमरां केरे लेई ज़ै दिवार थी, तै पंच़ हथ मोट्टी थी, ते ज़ै ठार खाली राहोरी थी, तै भवनेरे बेइरीं कमरां केरि ठार थी। 10 बेइरीं कमरां केरे मझ़ाटे भवनेरे आसे-पासे 20 हथ्थां केरो फासलो थियो। 11 बेइरीं कमरां केरू दार तैस ठारारे पासे थियूं, ज़ै खाली थी, मतलब अक दार उत्तरेरे पासे ते होरू दक्षिणेरे पासे थियूं, ते ज़ै ठार रेई जेवरी थी तैसारी चौड़ाई च़ेवरे पासना पंच़-पंच़ हथ थी।

12 फिरी ज़ै इमारत भवनेरे पश्चिमी अंगनेरे सामने थी, तै 70 हथ बिल्‍ली थी; ते कमरेरे आसे-पासेरी दिवारां पंच़ हथ मोट्टी थी, ते तैसेरी लम्बाई 90 हथ थी।

13 तैखन तैनी भवनेरी लम्बाई नापी ते तै 100 हथ निस्सी; ते दिवारन समेत अंगनेरी लम्बाई भी नैपतां 100 हथ निस्सी। 14 भवनेरो पूर्वी पासो ते तैसेरू अंगन 100 हथ चौड़ू थियूं।

15 फिरी तैनी पेत्रीएं अंगनेरे सामनेरी दिवारारी लम्बाई ज़ेसेरे दूईने पासन छेज्जी थी, नैपतां 100 हथ निस्सी; ते एन्त्रियों कमरो ते ओसारे भी नापे।

16 फिरी तैनी डेवढी ते निक्‍की-निक्‍की दैरी, ते आसे-पासेरी ट्लाईए मंज़लां केरि छेज्जी भी नैपी ज़ैना डेवढी कां सामने थी, ते च़ेवरे पासन तैन केरे तखते लेवरे थिये; ते तल्‍ले मरां दैरन तगर ते दैरी केरे आसे-पासे सेभी पासन तखते लेवरे थिये। 17 फिरी तैनी दारां केरि बेहीं ठार ते एंत्रीं भवने तगर ते तैसेरे बेइर भी ते आसे-पासेरी सैरी दिवारां अन्तर ते बेइर भी नैपी। 18 तैस मां करूब ते खजूरेरे बुट एन्च़रे घड़ाई कियोरे थिये कि दूई-दूई करूबां केरे मझ़ाटे अक-अक खजूरेरो बुट थियो; ते करूबां केरां दूई-दूई तुत्तरां थियां। 19 एस तरीके सेइं एक्‍की-एक्‍की खजूरेरे पासे एक्‍की पासे मैन्हेरू तुत्तर बनेवरू थियूं, ते होरि पासे जुवान शेरेरू तुत्तर बनेवरू थियूं। एस्से तरीके सेइं सारे भवनेरे च़ेवरे पासन बनेवरू थियूं। 20 तल्‍ले मरां लेइतां दारेरे बह तगर करूब ते खजूरेरे बुट घड़ाई कियोरे थिये, भवनेरी दिवारां एस्से तरीके सेइं बनोरी थी।

21 भवनेरे दारां केरे खम्भे चकोर थिये, ते पवित्र ठारारे सामनेरू रूप भवनेरू ज़ेरू थियूं। 22 वेदी लेकड़री बनोरी थी, ते तैसारी ऊँचाई ट्लाई हथ थी, ते लम्बाई दूई हथ थी; ते तैसेरे कूने ते तैसेरू सारू पाट ते तैसेरो आधार भी लेकड़ी बनोरो थियो, ते तैनी मीं सेइं ज़ोवं, "ऐह त यहोवारे सामनेरी मेज़े।"

23 भवन ते पवित्र ठारारे दूईयां केरां दूई-दूई दारां थियां। 24 ते हर एक्‍की दारेरी दूई-दूई मुड़ने बैली देरबली थी, ते हर एक्‍की दारेरे लेई दूई-दूई पल्‍ले थी। 25 ज़ेन्च़रे मन्दरेरी दिवारन मां करूब ते खजूर घड़ाई कियोरे थिये, तेन्च़रे तैसेरे हर एक्‍की दारेरे लेई दूई-दूई देरबली थी ते ओसारेरे बेइरीं पासे लेकड़री मोट्टे-मोट्टे तखते लेवरे थिये। 26 ओसारेरे दूईने पासन निक्‍की-निक्‍की दैरी थी, ते खजूरेरे बुट घड़ाई कियोरे थिये; ते भवनेरे बेइरीं कमरे ते मोट्टे-मोट्टे तखते भी लेवरे थिये।