यहेजकेल 32

मिस्र मुल्खेरे राज़ेरे लेई मातम

1 इश्शे गुलैमरे बारोवं सालेरे बारोवं महीनेरे पेइले दिहाड़े यहोवाए मीं सेइं ज़ोवं: 2 "ओ नाश भोने बाला मैन्हु, फ़िरौनेरे बारे मां मातमेरू गीत बनेइतां तैस शुना: कौमां केरे दरमियाने मां तेरी मसाल शेरे सेइं देते थिये, पन तू समुन्दरेरे मगरमच्छेरो ज़ेरोस। तू अपने दरियान मां ट्लुटतां पेव, ते तैन केरू पैनी पांवेइं सेइं खोदलेइतां छ़ड्डू। 3 पन परमेशर यहोवा एन ज़ोते: अवं बड़े कौमां केरे लोकां केरे ज़िरिये तीं पुड़ अपनु जाल फैलेइलो, ते तैना तीं पैनी मरां मेरे महाजाले मां खिचतां नेले। 4 तैखन तीं अवं ज़मीनी पुड़ छ़ेड्डी देइलो, ते मैइदाने मां शैरतां अम्बरेरां सारां च़ुड़ोलू तीं पुड़ बिशालेलो; ते तेरे मासे सेइं ज़मीनरे सारे जानबर रज़ानेलो। 5 अवं तेरू मास पहाड़न पुड़ रखेलो, ते तेरे वैदन टुक्ड़न सेइं भरेलो। 6 ज़ैस मुल्खे मां तू तारी देतस; तैस अवं पहाड़न तगर तेरे खूने सेइं सगेलो; ते तैसेरे नाले तेरे खूने सेइं भरे गाले। 7 ज़ैखन अवं तीं मिटेई छ़डेलो, त तैस मौके अवं अम्बरे ढकेलो ते तारन आंधरे केरेलो, अवं दिहाड़े बिदलारी सेइं छ़ुपालो ते चाँदनी भी लौ न देली।✝32:7 मत. 24:29;योए. 2:31. 8 अम्बरे मां ज़ेत्रे भी लौ देनेबाले तारेन, तैन सेभन अवं तेरी वजाई सेइं आंधरू बनेइलो, ते तेरे मुल्खे मां आंधरू भोल्हु, परमेशर यहोवा एन ज़ोते।

9 "ज़ैखन अवं तेरे विनाशेरी खबर कौमी-कौमी मां ते तेरे अनज़ान मुल्खन मां फैलेइलो, तैखन बड़े-बड़े मुल्खेरे लोकां केरे मने मां जलन पैदा केरेलो। 10 अवं बेड़ि कौमन तेरी वजाई सेइं हैरान परेशान केरि देलो, ते ज़ैखन अवं तैन केरे राज़ां केरे सामने अपनि तलवार भेज़ेलो, तैखन तेरी वजाई सेइं तैन शिलकन्ढे खड़े भोल्हे, ते तेरे बिछ़ड़नेरे दिहाड़े तैना अपने-अपने प्राणा केरे लेई थरकते गाले। 11 किजोकि परमेशर यहोवा एन ज़ोते: बाबेलेरे राज़ेरी तलवार तीं पुड़ च़लेली। 12 अवं तेरी सेनारे शूरबीरां केरे ज़िरिये बिछ़ोड़ेलो ज़ैना सेभी कौमन मां खतरनाकन।

"तैना मिस्र मुल्खेरू घमण्ड ट्लोड़ेले, ते तैन केरि सैरी सेनारो सत्यानाश भोल्हो। 13 अवं तैसेरे सारे जानबर पैनेरे तालाबन कां नाश केरतां छ़डेलो; ताके एजने बाले वक्ते मां तैना न त मैन्हेरे पव्वन सेइं ते न जानबरां केरे रोन्नेईं सेइं खदले किये गाले। 14 तैखन अवं तैन केरू पानी साफ केरेलो, ते तैन केरे दरिया तेलेरे ज़ेरे बगेले, परमेशर यहोवा एन ज़ोते।" 15 परमेशर यहोवा इन भी ज़ोते, "ज़ैखन अवं मिस्र मुल्खे उज़ाड़ेलो ते ज़ैस सेइं तै भेरतां तैस खाली केरेलो, ते ज़ैखन अवं तैस मां बस्सने बालन मारेलो, तैखन तैन्न पतो लग्गेलो कि अवं यहोवा आईं।

16 "लोकां केरे मातम केरनेरे लेई मातमेरू गीत एन्ने; कौमां-कौमां केरि कौन्शां एन गीत ज़ोएली; मिस्र ते तैसेरी सैरी सेनारे बारे मां एन्ने मातमेरू गीत ज़ोएली, परमेशर यहोवा एन ज़ोते।"

मरोरे लोकां केरू संसार

17 फिरी इश्शे गुलैमरे बारोवं सालेरे पेइले महीनेरे परहनोवं दिहाड़े यहोवाए मीं सेइं ज़ोवं: 18 "ओ नाश भोने बाला मैन्हु, मिस्र मुल्खेरे लोकां केरे लेई अफ़सोस-अफ़सोस केर, ते एस ताकतबर कौमरी कुइयन समेत कब्री मां दबोरेन सेइं साथी अधलोके मां भेज़। 19 हे मिस्र, तू कैस करां जादे खूबसूरत? तू उतरतां तैन लोकन सेइं साथी बिशोरो रह ज़ैन केरो खतनो नईं भोवरो।

20 "तैना तलवारी सेइं मारोरे लोकन मां बिछ़ड़ी गाले, तैन केरे लेई तलवारे रख्खोरीए; एल्हेरेलेइ मिस्रेरे सारे लोकन समेत दीलतां आनां। 21 ताकतबर शूरबीर अधलोके मां मिस्र ते तैसेरे मद्दत केरनेबालां केरे बारे मां लोक गल्‍लां केरेले; तैना लोक तलवारी सेइं मरोरे जेवरेन ज़ैन केरो खतनो न थियो भोवरो।

22 "अश्शूरेरे लोक ते तैसेरी सारी सेना तैड़ीए, तैसेरी कब्रां तैसेरे च़ेवरे पासन आन; ज़ैना सब तलवारी सेइं मारे जेवरेन। 23 तैन केरि कब्रां नालां केरे गत्तन मां बनेवरिन, ते इन केरि कब्रारे च़ेवरे पासन तैसेरी सेनाए; तैना सारे ज़ैना ज़ींतां केरि दुनियाई मां डर पैदा केरते थिये, हुनी सब तलवारी सेइं मेरि जेवरेन।

24 "एलाम तैड़ीए, ते तैसेरे कब्रारे च़ेवरे पासन तैसेरे सिपाही आन; तैना सब तलवारी सेइं मारे जेवरेन, तैना बगैर खतने अधलोके मां उतरी जेवरेन, तैना ज़ींतां केरि दुनियाई मां डर पैदा केरते थिये, पन हुनी कब्री मां दबोरेन सेइं साथी तैन केरे तुत्तरे पुड़ भी उदासी पेवरीए। 25 तैसेरे लोकन समेत मरोरे लोकन मां तैस बिछ़ान मैल्हेरूए, ते तैसेरे सेभी लोकां केरो आखरी ठिकानो तैसेरे कब्रारे आसे-पासे; तैना सारे बगैर खतने आन; ज़ैना तलवारी सेइं मारे जेवरेन; तैनेईं ज़ींतां केरे दुनियाई मां डर पैदा कियोरो थियो; एल्हेरेलेइ तैना गत्ते मां दबोरेन सेइं साथी तैन केरे तुत्तरे पुड़ उदासी पेवरीए; ते तैना मरोरे लोकन मां रखोरेन।

26 "तैड़ी मेशेक ते तूबल मुल्खां केरे लोक भी आन, तैन केरे च़ेवरे पासन कब्रन; तैना सारे बगैर खतने तलवारी सेइं मारे जेवरेन, किजोकि तैना ज़ींतां केरि दुनियाई मां डर पैदा केरते थिये। 27 तैना बिछ़ड़ोरे बगैर खतने शूरबीरन सेइं साथी पेवरे न राले ज़ैना अपने-अपने जंगरे हथियार ट्लेइतां अधलोके मां उतरी जेवरेन, तैड़ी तैन केरि तलवारां तैन केरे क्रोड़न हैठ रेखोरिन, ते तैन केरां अधर्मेरां कम्मां केरि सज़ाह तैन केरि हेड्डन पुड़ पेवरीए, किजोकि तैना ज़ींतां केरि दुनियाई मां शूरबीरन पुड़ भी डर पैदा केरते थिये। 28 एल्हेरेलेइ हे मिस्रेरे राज़ा तू भी बगैर खतने लोकन सेइं साथी नाश भोइतां ते तलवारी सेइं मर्रोरेन सेइं साथी पेवरो रालो।

29 "तैड़ी एदोम ते तैसेरे राज़े ते तैसेरे सारे प्रधान भी आन, ज़ैना ताकतबर भोनेरे बावजूद भी तलवारी सेइं मारोरे लोकन सेइं साथी रखोरेन; गत्तन मां दब्बोरे बगैर खतने लोकन सेइं साथी तैना भी पेवरे राले।

30 "तैड़ी उत्तेरे पासेरे सारे प्रधान ते सारे सीदोनी भी आन ज़ैना मर्रोरेन सेइं साथी उतरी जेवरेन; तैनेईं एपनी ताकती सेइं डर पैदा कियोरो थियो, पन हुनी तैना भी शरमिन्दे भेवरेन ते तलवारी सेइं मारोरे लोकन सेइं साथी तैना भी बगैर खतने पेई जेवरेन, ते कब्रन मां बाकी दब्बोरे लोकन सेइं साथी तैन केरे तुत्तरे पुड़ भी उदासी पेवरीए।

31 "एन हेरतां फ़िरौने भी अपने सारे लोकां केरे बारे मां आराम मैल्हेलो, हाँ फ़िरौन ते तैसेरी सैरी सेना ज़ै तलवारी सेइं मारी जेवरीए, परमेशर यहोवा एन ज़ोते। 32 किजोकि मीं तैसेरे ज़िरिये सेइं ज़ींतां केरि दुनियाई मां डर पैदा कियोरो थियो; एल्हेरेलेइ तै सारी भीड़ी समेत तलवारी सेइं मारोरे लोकन सेइं साथी बगैर खतनेरे लोकन सेइं साथी नाश कियो गाले, परमेशर यहोवा एन ज़ोते।"