यहेजकेल 19

मातमेरू गीत

1 यहोवाए मीं सेइं ज़ोवं, "इस्राएलेरे प्रधाना केरे बारे मां तू मातमेरू इन गीत शुना: 2 तेरी अम्मा अक एरी शेरनी थी! ज़ै शेरन मां बिशती थी ते अपने बच्‍चन जुवान शेरन मां रेइतां पालती थी। 3 अपने बच्‍चन मरां तैसां अक बच्‍चो पालो, ते तै जुवान शेर भोइ जेव, ते तैनी शिकार ट्लानो शिखो; तैनी मैन्हु केरो भी शिकार कियो। 4 कौमां-कौमां केरे लोकेईं तैसेरी चर्चा शुनी, ते तै अपने घड़ोरे गत्ते मां फसाव; ते तै नकेल लेइतां मिस्र मुल्खे जो नेव। 5 ज़ैखन तैसेरी अम्मा हेरू कि तै बलगती राई ते फिरी तैसारी उमीद ट्लूटी जेई, फिरी तैसां अक होरो बच्‍चो पैलतां जुवान शेर बनाव। 6 फिरी तै जुवान शेर बेनतां शेरन मां च़लने-फिरने लगो, ते तैनी भी शिकार ट्लानो शिखी छ़डो; ते मैन्हु केरो भी शिकार केरने लगो। 7 तैनी तैन केरे क़िले बिछ़ोड़े, ते तैन केरे नगर बेरान केरतां छ़डे; बल्के तैसेरे गरज़नेरे डरे सेइं मुल्ख ते तैस मां ज़ैन किछ थियूं उज़ड़ी जेवं। 8 तैखन च़ेवरे पासां केरी कौमां-कौमां केरे लोक अपने-अपने सूबन मरां तैसेरे खलाफ जंग केरनेरे लेई निस्सी जे, ते तैसेरे लेई ज़ाल लावं; ते तै तैन केरे घड़ोरे खड्डे मां फेसी जेव। 9 तैखन तैनेईं तैसेरे नक्‍के मां नकेल लेइतां तै पिंजरे मां बन्द केरतां बाबेलेरे राज़े कां नियो, ते तै क़िले मां बन्द केरतां छ़डो, ताके तैसेरू गरज़नू इस्राएलेरे पहाड़ी मुल्खे मां न शुनोए।

10 "तेरी अम्मा ज़ैसां तीं ज़र्म दित्तू, तै बन्ने पुड़ लगोरी दाछ़री बागरी ज़ेरि थी, ज़ै डुग्घे पैनेरे वजाई सेइं फलन ते डालन सेइं भेरतां थी। 11 राज़ केरनेबालां केरे सोटरे लेई तैस मां मोट्टे डाल थिये; तैसारी ऊँचाई एत्री भोइ जेई कि अम्बरे तगर पुज़्ज़ी जेई, ते अपने बड़े डालन समेत लोकन बड़ी लम्मी लेइहोने लगी। 12 फिरी भी क्रोधे सेइं तै पुट्टी छ़डी ते ज़मीनी पुड़ शैरतां छ़डी, ते तैसारे फल पूर्वेरी हवा लग्गने सेइं शुक्‍की जे, ते तैसारे डाल ट्लुटतां शुक्‍की जे, ते तै अग्गी सेइं भस्म भोइ जेई। 13 हुनी तै जंगले मां, बल्के एरे मुल्खे मां लेवरीए ज़ैस मां पानी नईं। 14 तैसारी शाखां केरे डालन मरां अग निस्सी, ज़ैस सेइं तैसारे फल भस्म भोइ जे, हुनी तैस मां अक भी मज़बूत डाल न राव, ज़ैस सेइं राज़ केरनेरे लेई सोटी बनाई गाए।"

एन्ने मातमेरू गीते, ते एन मातमेरू गीत बार-बार ज़ोवं गालू।