यहेजकेल 27

सोर नगरेरे लेई मातम

1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, सोर नगरेरे बारे मां मातमेरू गीत बनेइतां तैस सेइं इन ज़ो, 3 ओ समुन्दरे मां दाखल भोनेरे फाटके पुड़ रानेबाली, ते बड़े जज़ीरां केरे लेई मुल्खे-मुल्खेरे लोकन सेइं बुपार केरनेबाली, परमेशर यहोवा एन ज़ोते: हे सोर तीं ज़ोवरूए कि अवं पूरे तरीके सेइं खूबसूरत आईं। 4 तेरी हद्दां समुन्दरेरे मझ़ाटे आन; तेरे बनानेबाले तू बड़ी खूबसूरत बनेवरिस। 5 तेरी सैरी पेटरी सनीर पहाड़ेरे सनोवरेरी लेकड़री बेनोरिन; ते समुन्दरी निक्‍के ज़िहाज़ां केरे खड़े थम्मां केरे लेई लबानोनेरे गैइड़ केटतां आनोरेन। 6 ते तेरे च़ेप्पू बाशानेरे बंज़ेरे बुट्टां केरे बनाए। तेरे ज़िहाज़ां केरे तखते कित्ती लोकां केरे जज़ीरन मरां आनोरे सिद्धे सनोवर लेकड़ी सेइं बनाए ते तैन हाथी दांत लेवरे थिये। 7 तेरे ज़िहाज़ां केरे तरपाल मिस्रेरां आनोरे कढ़ाई दार सनेरे कपड़ेरे बनाए ताके तेरे लेई झण्डां केरू कम देन। तेरी चाँदी एलीशारे जज़ीरन मरां आनोरे बैंगनी रंगेरे कपड़ां केरि बनोरी थी। 8 सीदोन ते अर्वद नगरां केरे रानेबाले तेरे ज़िहाज़ च़लानेबाले थिये। हे सोर, तेरे अक्लमन्द लोक तेरे ज़िहाज़ां च़लानेबाले मल्‍लाह थिये। 9 तेरे कारीगिर मरम्मत केरनेबाले गबल नगरेरे बुज़ुर्ग अक्लमन्द लोक थिये; तीं मां बुपार केरनेरे लेई मल्‍लाहन समेत समुन्दरे पुड़ेरां सारां ज़िहाज़ां तीं कां एवरां थियां। 10 तेरी सेनाई मां फारसी, लूदी ते पूती लोक भरती भोवरे थिये; तैनेईं तेरी दिवारन पुड़ एपनी ढालां ते टोप टेंगतां रख्खे, ते तैन्ना केरि वजाई सेइं तेरी शान-ओ-शोकत बधोरी थी। 11 तेरी शहरपनाही पुड़ तेरी सेनाई सेइं साथी अर्वद नगरेरे लोक थिये, ते तेरे गुम्मटन मां गम्‍मद नगरेरे लोक खड़े थिये, तैनेईं एपनी ढालां तेरे च़ेवरे पासां केरि शहरपनाही पुड़ टेंगोरी थी; तेरी खूबसूरती तैन केरे ज़िरिये पूरी भोवरी थी।

12 "तेरे धन-दौलतरे वजाई सेइं तर्शीश नगरेरे लोक तीं सेइं बुपार केरते थिये; तैनेईं चाँदी, लोंह, राँगा*27:12 राँगा अक धात ज़ै तैस इस्तेमाल कियो गातो थियो। ते शीशो देइतां तेरो माल मुल्‍ले घिन्नो। 13 यावान, तूबल ते मेशेक प्रदेशां केरे लोक तेरे मालेरे बदले दास-दैसी ते पितलरां भांडां केरो तीं सेइं बुपार केरते थिये। 14 तोगर्मार प्रदेशेरे रानेबाले बुपैरेईं तेरी धन-दौलत नेइतां घोड़े, सुवारी केरनेरे घोड़े ते खचरां दित्ती। 15 ददानी लोक तेरे बुपारी थिये; ते बड़े जज़ीरे तेरे बुपारेरी मन्डी थिये ते तैना तीं कां हाथी दांतेरां शिंगां ते आबनूस बुट्टेरी लकड़ी बुपारे मां आनते थिये। 16 तेरी बेड़ी कारीगिरारी वजाई सेइं अरामी लोक भी तीं सेइं बुपार केरते थिये; मरकत ते बैंगनी रंगेरां कढ़ाई दार लिगड़ां ते सन, मूंगा, ते लालड़ी देइतां तैना तेरो माल नेते थिये। 17 यहूदा ते इस्राएल भी तेरे बुपारी थिये; ते तैनेईं मिन्नीतरे गेहुं, पन्नग, माछ़ी, तेल, ते बलसान देइतां तीं करां चीज़ां घिन्नी। 18 तीं मां बड़ी कारीगिरी थी ते हर किसमेरी दौलत अकोट्ठी भोइ, एल्हेरेलेइ दमिश्क तेरो बुपारी बनो; ते तीं कां हेलबोनेरो दाछ़रो रस ते छ़ित्ती उन्ना पुज़ेइतां दित्ती। 19 दान ते यावान नगरे तेरे मालेरे बदले मां सूत दित्तू; ते तैन केरि वजाई सेइं फौलाद, तज ते अगरे मां भी तेरो बुपार भोतो थियो। 20 ददान नगरेरे बुपारी तीं सेइं घोड़ां केरी कैठरे लेई ज़ीनरे कपड़ेरो बुपार केरते थिये। 21 अरब ते केदारेरे सारे प्रधान तेरे बुपारी बने; तैना गबड़ां, हुड़ ते थाव्वे एन्हतां तीं सेइं बुपार केरते थिये। 22 शेबा ते रामाह नगरेरे बुपारी तेरे बुपारी भोए; तैनेईं रोड़े करां रोड़े किसमेरे मसाले, कीमती मणि ते सोन्नू देइतां तेरो माल नेते थिये। 23 हारान, कन्ने, एदेन, शेबारे बुपारी, ते अश्शूर ते कलमद, एना सब तेरे बुपारी थिये। 24 तैनेईं रोड़े-रोड़े किसमेरी चीज़ां मतलब लानेरे लेई नीले कढ़ाई दार लिगड़ां ते डोरन सेइं बेन्धोरी गैइड़ेरे लेकड़रे बेनोरी पेट्टी एन्हतां लेन-देन केरनेरे लेई आनते थिये। 25 तर्शीश नगरेरां ज़िहाज़ां तेरो बुपारेरो माल घराते थिये।

"तैन केरे ज़िरिये तू समुन्दरे मां रेइतां बड़ी दौलतमन्द ते शान-ओ-शोकती बाली भोइ जेवरी थी। 26 तेरे किश्ती च़लाने बालेईं तू डुग्घे पैनी मां पुज़ाई, ते पूर्वेरे हवा तू समुन्दरे मां ट्लोड़तां छ़डी। 27 ज़ैस दिहाड़े तू डुब्बेली, तैस्से दिहाड़े तेरी धन दौलत बुपारेरो माल, मल्‍लाह, माँझी, जुड़ाई केरनेरू कम केरनेबाले, बुपारी लोक ते तीं सेइं ज़ेत्रे सिपाही आन, ते तेरे सारे लोक समुन्दरे मां बिछ़ड़ी गाले। 28 तेरे माँझी केरि चिन्डां केरि शौरी सेइं तेरे आसे-पासेरी ठारां हिल्‍लेली। 29 सारे च़ेप्पू देनेबाले ते मल्‍लाह ते समुन्दरे मां ज़ेत्रे माँझी रहतन, तैना अपने-अपने ज़िहाज़न पुड़ेरां ओसेले,✝27:29 प्रका. 18:17. 30 ते तैना धेरती पुड़ खड़े भोइतां तेरे बारे मां बड़े ज़ोरे-ज़ोरे सेइं लेरां देले। दुख बांदो केरनेरे लेई तैना अपने-अपने दोग्गे पुड़ धूड़ छ़ेडतां मांज़नी पुड़ लेटोई देले; 31 ते तेरे शोगे मां अपने दोग्गेरी टिन्ड बनाले, ते लखे मां टाट पलेटतां ते अपने मनेरे सखत दुखेरे मारे तेरे बारे मां लेरां देले ते छाती पिटेले। 32 तैना मातम केरते तेरे बारे मां मातमेरू एन गीत बनेइतां ज़ोले, ‘सोर नगरी ज़ै हुनी समुन्दरे मां च़ुप-च़ाप बिशोरीए, तैसेरी ज़ेरि कौ नगरीए?✝27:32 प्रका. 18:15,18. 33 ज़ैखन तेरो माल समुन्दरेरी बत्तां गातो थियो, तैखन बड़ी कौमां केरे लोकां केरि ज़रूरतां पूरी भोती थी। तेरे दौलती सेइं ते धन ते बड़े मालेरे बुपारेरे वजाई सेइं दुनियारे राज़े धनी भोते थिये।✝27:33 प्रका. 18:9,15,19. 34 पन हुनी तू समुन्दरेरे पैनेरी छ़ेलहन सेइं ट्लुटी जेई, तैस वक्ते तेरे बुपारेरो माल ते तेरे सब लोक भी तीं कां रेइतां नाश भोइ जे। 35 समुन्दरेरे बन्नेरे मुल्खेरे सब रानेबाले तेरी वजाई सेइं उदास भोइ जे; ते तैन केरे राज़ां केरे शिलकन्ढे खड़े भोए, ते डरे सेइं तैन केरां तुत्तरां उदास भोल्हां। 36 मुल्खे-मुल्खेरे बुपारी तेरे खलाफ तानो लगोरेन मारने; तू डरेरी वजा बनोरिस, ते तू कायम न रेई बटेली।’"✝27:36 यहे. 26:21;यिर्म. 18:16.