1 इश्शे गुलैमरे यारोवं सालेरे पेइले महीनेरे पेइले दिहाड़े यहोवाए मीं सेइं ज़ोवं: 2 "ओ नाश भोने बाला मैन्हु, सोर नगरे ज़ैने यरूशलेम नगरेरे बारे मां मज़ाक बनेइतां ज़ोवरूए, ‘ज़ैन मुल्खे-मुल्खेरे फाटकां केरू ज़ेरू थियूं, तैन नाश भोइ जेवं! ते तैसेरे उज़ड़ने सेइं अवं भरपूर भोइ गालो।’ 3 एल्हेरेलेइ परमेशर यहोवा एन ज़ोते: हे सोर, हेर, अवं तेरे खलाफ आईं; ते अवं एरू केरेलो कि बेड़ि कौमां केरि सेना तेरे खलाफ एरी खेड़ि भोल्ही ज़ेन्च़रे समुन्दरेरी छ़ेल्‍ली खेड़ि भोतिन। 4 तैना सोर नगरेरी शहरपनाह बुछ़ोड़तां छ़डेली, ते तैसेरे गुम्मट ट्लोड़तां छ़डेली; ते अवं तैस पुड़ेरां मित्ती खुरकतां तैस नग्गी चट्टान बनेइतां छ़डेलो। 5 सोर नगर समुन्दरे मां टैपू बनेरू ज़ैड़ी मछ़ली ट्लानेबाले अपना जालां शुकानेरे लेई खिलारेले; किजोकि परमेशर यहोवा एन ज़ोते; ते तै तैस कौमी करां लुटोलो; 6 ते तेरे ज़ैना लोक ड्लाव्वन ते बेसतन मां आन तैना तलवारी सेइं मारे गाले। तैखन तीं पतो लग्गेलो कि अवं यहोवा परमेशर आईं।

7 "किजोकि परमेशर यहोवा एन ज़ोते, हेर, अवं सोर नगरेरे खलाफ बाबेलेरे महाराज़े नबूकदनेस्सर राज़े घोड़ां, रथां, ते सुवारां केरि अक बड़ी भीड़ी ते सेना समेत उत्तरेरे पासेरां आनेलो। 8 तेरे ज़ैना लोक ड्लाव्वन ते बेसतन मां भोल्हे, तैन्न तै तलवारी सेइं मारेलो, ते तेरे खलाफ मोरच़ो लाएलो, ते तेरे खलाफ खड़े भोइतां; ते ढाल खड़ी केरेले। 9 तै तेरी शहरपनाहरे खलाफ जंगरे हथियार ते तैना तेरे गुम्मटन मारतोड़न सेइं डोलतां छ़डेले। 10 तैसेरे घोड़े एत्रे भोल्हे, कि तू तैन केरि धूड़ी सेइं देबोलो, ते ज़ैखन तैना तेरे फाटकन मां एन्च़रे घुसेलो ज़ेन्च़रे नाके बाले नगरे मां घुसतन, तैखन तेरी शहरपनाह सुवारन सेइं ते छकड़न सेइं ते रथ्थन सेइं थेरकी गाली। 11 तै अपने घोड़ां केरे रोन्नेईं सेइं तेरी सड़कन ट्लोड़ी छ़डेलो, ते तेरे लोकन तलवारी सेइं मारेलो, ते तेरे मज़बूत खम्भे ज़मीनी पुड़ बछ़ोड़े गाले। 12 तै सेना तेरी धन-दौलत लुटेली ते तेरे बुपारेरी चीज़ां थिसोड़ेले; तैना तेरी शहरपनाह बिछ़ोड़ी छ़डेले, ते तेरां आली शान घरां डोली छ़डेले, ते तेरे घोड़, लकड़ी, मित्ती तैना समुन्दरे मां शैरी छ़डेले। 13 ते अवं तेरे गीतां केरि आवाज़ बन्द केरि देइलो, ते तेरी सैन्गी केरि आवाज़ फिरी कधे न शुनोली।✝ 14 अवं तीं नग्गी चट्टान बनेइतां छ़डेलो; ते तू जाल खिलारनेरो टैपू भोइ गालो; ते फिरी बसाव न गालो, किजोकि मीं यहोवाए एन ज़ोवरूए, परमेशर यहोवा एन ज़ोते।

15 "परमेशर यहोवा सोर नगरे सेइं एन ज़ोते, तेरे बिछ़ड़नेरी आवाज़ी सेइं ज़खमी लोक कर लाएले ते तीं मां मौते-मौत भोल्ही, त तैखन कुन टैपू न थरकेले? 16 तैखन समुन्दरे बन्नेरे सारे प्रधान अपने-अपने तखते पुड़ेरां उतरी गाले, ते अपने चोगे ते शाही लिगड़ां खोलतां मातमेरां लिगड़ां लाएले, ते धूड़ी पुड़ बिशतां हर एक्‍की पले मां थरकेले; ते तेरी वजाई सेइं हैरान राले। 17 ते तैना तेरे बारे मां मातमेरू गीत बनेइतां तीं सेइं ज़ोले,

‘अफ़सोस! किश्ती च़लाने बालां केरि बसावरी अफ़सोस!

हे सहारावरी नगरी ज़ै समुन्दरे मां रानेबालन समेत सामर्थी राई

तै सेभी रुकने बालां केरे लेई डराने बाली नगरी थी,

तू केन्च़रे नाश भोवरिस?✝

18 तेरे बिछ़ड़नेरे दिहाड़े टैपू हिल्‍ले जे:

ते तेरे च़ले गानेरे वजाई सेइं सब टैपू घेमरोई गाले।’

19 "किजोकि परमेशर यहोवा एन ज़ोते: ज़ैखन अवं तीं बेरान नगरां केरो ज़ेरो उज़ाड़ेलो, ते तीं पुड़ महासागर च़ाढ़ेलो, ते तू डुग्घे पैनी मां डुब्बी गालो,✝ 20 तैखन अवं तीं तैन लोकन सेइं ज़ैना गत्ते मां बिछ़ड़ी गातन पुराने लोकन कां बुन पुज़ालो ज़ैना बड़े पेइले मर्रोरेन, ते गत्ते मां ते बिछ़ड़ने बालन सेइं साथी तीं भी बुनीयें लोके मां रेखतां पुराने ज़मानेरे उज़ड़ोरे ठारां केरो ज़ेरो केरेलो; इड़ी तगर कि तू फिरी न बेस्सी बटेलो ते न ज़ींतां केरे दुनियाई मां कोई ठार मैल्हेली। 21 अवं तीं घबरानेरी वजाह बनेइलो, ते एजने बाले वक्ते मां न रेई बटेलो। बल्के तोपतां भी तेरो पतो न लग्गेलो, परमेशर यहोवा एन ज़ोते।"✝