यहेजकेल 20

इस्राएलेरी बगावत

1 इश्शे गुलाम भोनेरे सत्तोवं सालेरे पंच़ोंव महीनेरे दशोवं दिहाड़े इस्राएलेरे किछ बुज़ुर्ग यहोवा कां सवाल पुछ़ने आए, ते मेरे सामने बिश्शे। 2 तैखन यहोवाए मीं सेइं ज़ोवं, 3 "ओ नाश भोने बाला मैन्हु, इस्राएली बुज़ुर्गन सेइं एन ज़ो, प्रभु यहोवा एन ज़ोते, कि तुसां मीं सवाल पुछ़ने एवरेथ? प्रभु यहोवा एन ज़ोते कि मीं अपनि कसम, कि तुसां मीं सवाल पुछ़ी न सकेले। 4 ओ नाश भोने बाला मैन्हु, कुन तू तैन केरो न्याय न केरेलो? तू एप्पु तैन केरो न्याय केरतां ज़ो, कि कौन दोषी आहे। तैन केरे दादे-पड़दादां केरे भिट्टे कम्मां केरे बारे मां तैन सेइं ज़ो, 5 ते कने तैन सेइं ज़ो, प्रभु यहोवा एन ज़ोते, ज़ैस दिहाड़े मीं इस्राएल च़ुनोरो थियो, ते याकूबेरे खानदाने सेइं कसम खेवरी थी, ते मिस्र मुल्खे मां अपनो आप तैन पुड़ बांदो कियोरो थियो, ते तैन सेइं कसम खेइतां ज़ोवं, अवं तुश्शो परमेशर यहोवा आईं। 6 तैस्से दिहाड़े मीं तैन सेइं ऐह भी वाधो कियोरो थियो, कि तुसन मिस्र मुल्खे मरां केढतां एक्‍की एरे मुल्खे मां पुज़ेइलो, ज़ै मीं तुश्शे लेई च़ुनोरोए; तै सेभी मुल्खां केरी शान-ओ-शोकते, ज़ैस मां दुद्ध ते मैछ़ेरी गड्डां बेगतिन। 7 फिरी मीं तैन लोकन सेइं ज़ोवं, तुसन मरां हर कोई ज़ै तैन भिट्टी मूरती केरि पूज़ा केरते; तै तैन्न शैरी छ़डे; ते मिस्रेरे देबतां केरी मूरतन सेइं अपनो-आप अशुद्ध न केरा; अव्वें तुश्शो परमेशर यहोवा आईं। 8 पन तैनेईं मेरे खलाफ बगावत की, ते मेरी न शुनी; ज़ैन भिट्टी मूरती केरि तैना पूज़ा केरते थिये, तैना केन्चे न शैरी, ते न मिस्रेरी मूरती शैरी।

"तैखन मीं ज़ोवं, अवं इड़ी, मिस्र मुल्खे मां तुसन पुड़ अपनो क्रोध भड़केइलो। ते पूरो क्रोध हरेइलो। 9 फिरी भी मीं अपने नंव्वेरी खातर एन कियूं कि ज़ैन लोकन मां तैना थिये, ज़ैन केरे सामने मीं तैना मिस्र मुल्खेरां कढनेरे लेई अपनो आप तैन पुड़ बांदो कियोरो थियो, ताके तैन कौमां केरे सामने तैना अपवित्र न भोए। 10 मीं तैना मिस्र मुल्खेरां केढतां सुनसान ठैरी मां आने। 11 तैड़ी मीं तैन एपनी विधि शुनेई ते अपने नियम भी शुनाए कि ज़ै मैन्हु तैन्न मन्ने, तै तैन केरि वजाई सेइं ज़ींतो रालो। 12 फिरी मीं तैन केरे लेई आरामेरी दिहैड़ी ठहराई ज़ैना मेरे ते तैन केरे दरमियाने मां अक निशान भोन; ताके तैन्न पतो लग्गे, कि अवं यहोवा तैन पवित्र केरनेबालो परमेशर आईं। 13 पन फिरी भी इस्राएली लोकेईं सुनसान ठैरी मां मीं सेइं बगावत की; तैना मेरे विधन पुड़ न च़ले, ते मेरे नियम घटिया समझ़े, ज़ैन अगर मैन्हु मन्ने त तैन केरि वजाई सेइं मैन्हु ज़ींतो रालो; ते तैनेईं मेरी थैकरी दिहाड़ी बड़ी अपवित्र की।

"तैखन मीं ज़ोवं, अवं सुनसान ठैरी मां तैन पुड़ अपनो क्रोध भड़केइतां तैन केरो नाश केरेलो। 14 पन मीं अपने नंव्वेरी खातर एन कियूं कि तैन कौमां केरे सामने, ज़ैन केरे हेरते मीं तैना कढोरे थिये, अपवित्र न ठहरन। 15 फिरी मीं सुनसान ठैरी मां तैन सेइं कसम खाई कि ज़ै मुल्ख मीं तैन दित्तोरो थियो, ते ज़ै सेभी मुल्खन मां शान-ओ-शोकती बालोए, ते ज़ैस मां दुद्ध ते मैछ़ेरी गड्डां बेगतिन, तैस मां तैन न पुज़ेइलो, 16 किजोकि तैनेईं मेरे नियम घटिया समझ़े, ते मेरी विधन पुड़ न च़ले, ते मेरे आरामेरे दिहाड़े अपवित्र कियोरे थिये; एल्हेरेलेइ कि तैन केरो मन तैन केरि मूरती केरे पासे लगोरो राव। 17 फिरी भी मीं तैन पुड़ सिद्धी नज़र रख्खी, ते तैना नाश न किये, ते न सुनसान ठैरी मां पूरे तरीके सेइं तैन केरो नाश कियो।

18 "फिरी मीं सुनसान ठारी मां तैन केरे खानदानेरे लोकन सेइं ज़ोवं, अपने दादे-पड़दादां केरे विधन पुड़ न च़ला, ते न तैन केरि रीती रुवाज़ मन्ना, ते न तैन केरि मूरती केरि पूज़ा केरतां अपनो आप अशुद्ध केरा। 19 अवं तुश्शो परमेशर यहोवा आईं, मेरे विधन पुड़ च़ला, ते मेरे नियम मन्ना ते तैन पुड़ च़ला, 20 ते मेरे आरामेरे दिहाड़े पवित्र मन्ना, ते तै मेरे ते तुश्शे मझ़ाटे अक निशान भोल्हो, ज़ैस सेइं तुसन पतो लग्गे कि अवं तुश्शो परमेशर यहोवा आईं। 21 पन तैन केरे खानदानेरे लोकेईं भी मीं सेइं बगावत की; तैना भी मेरे विधन पुड़ न च़ले, ते न मेरे नियम मन्नेरे लेई ध्यान दित्तू; ज़ैन्न अगर मैन्हु मन्ने त तैन केरे वजाई सेइं तै ज़ींतो रालो; मेरी थैकरी दिहाड़ी भी तैनेईं अपवित्र की,

"तैखन मीं ज़ोवं, अवं सुनसान ठैरी मां अपनि जलजलाहट तैन पुड़ भड़केइतां तैन अपनि सरक हरेइलो। 22 फिरी भी मीं अपनो हथ पत्रोवं कियो, मीं अपने नंव्वेरी खातर एन कियूं कि तैन कौमां केरे सामने ज़ैन केरे सामने मीं तैना केढतां आनोरे थिये, तैना अपवित्र न ठहरे। 23 फिरी मीं तैन सेइं सुनसान ठैरी मां कसम खाई, कि अवं तुसन कौमन-कौमन मां तितर-बितर केरेलो, ते मुल्खे-मुल्खे मां छ़ींकेइतां छ़डेलो। 24 किजोकि तैनेईं मेरे नियम न मन्ने, ते मेरी विधि घटिया सेमझ़ी, मेरे थैकरी दिहाड़ी अपवित्र की, ते ज़ैन मूरती केरि तैन केरे दादे-पड़दादे पूज़ा केरते थिये तैना भी तैन्ना केरि पूज़ा केरते राए। 25 फिरी मीं तैन केरे लेई एरी-एरी विधि ठहरेई ज़ैना रोड़ी न थी ते एरी-एरी रीति रुवाज़ ज़ैन केरे वजाई सेइं तैना ज़ींते न रेई सके; 26 मतलब तैना अपने सेभी ज़ेठे मट्ठन अग्गी मां बलि केरने लगे; एस तरीके सेइं मीं तैना तैन केरि च़ढ़तलां केरे ज़िरिये अशुद्ध किये ज़ैस सेइं तैन बेऔलाद केरि, तैखन तैन पलो लग्गेलो कि अवं परमेशर यहोवा आईं।

27 "ओ नाश भोने बाला मैन्हु, तू इस्राएली लोकन सेइं ज़ो, प्रभु यहोवा एन ज़ोते: तुश्शे दादे-पड़दादेईं धोखो केरतां मेरी निन्दा की। 28 किजोकि ज़ैखन मीं तैना तैस मुल्खे मां पुज़ाए, ज़ै मुल्ख मीं तैन देनेरे लेई वाधो कियोरो थियो, तैखन तैना हर एक्‍की उच्‍चे पहैड़ी पुड़ ते हर एक्‍की बड्डे बुट्टे पुड़ नज़र देइतां तैड़ी एपनी मेलबलि केरने लगे; ते मेरो क्रोध भड़कानेरे लेई च़ढ़तलां च़ाढ़ने लगे ते तैड़ी खुशबूदार चीज़ां बालने लगे, ते तैड़ी पीनेरी च़ढ़तलां च़ाढ़ने लगे। 29 तैखन मीं तैन पुछ़ू, ज़ैस उच्‍चे ठैरी पुड़ तुस लोक गातथ, तैसेरो कुन मतलबे? इस्से तरीके सेइं तैसेरू नवं अज़ तगर बामा*20:29 बामा मतलब मूरती पूज़ा केरनेरे लेई उच्‍ची ठारां। ज़ोवं गाते। 30 एल्हेरेलेइ इस्राएली लोकन सेइं ज़ो, प्रभु यहोवा तुसन एन पुछ़ते, कुन तुस भी अपने दादे-पड़दादां केरि रीति रुवाज़े पुड़ च़ेलतां अशुद्ध भोइतां, ते तैन केरे भिट्टे कम्मां केरे मुताबिक व्यभिचारी कौन्शरू ज़ेरू कम केरतथ? 31 अज़ तगर ज़ैखन भी तुस अपनि च़ढ़तल च़ाढ़तथ, ते अपने बच्‍चन अग्गी मां बलि केरतथ तैखन तुस अपने मूरती केरे वजाई सेइं अशुद्ध भोतथ। हे इस्राएली लोकव, कुन तुस मीं पुछ़ी बटेले? प्रभु यहोवा एन ज़ोते मीं अपनि कसम तुसां मीं करां किछ भी पुछ़ी न सकेले।

32 "ज़ै गल तुश्शे मने मां एइतीए, ‘असां लकड़ी ते घोड़ेरी पूज़ा केरनेबाले भोइतां गैर कौमन ते मुल्खे-मुल्खेरे कुलां केरे ज़ेरे भोइ गाले,’ तै कोन्ची किसमे सेइं पूरी नईं भोने बाली।

यहोवा इस्राएले दुबारां आबाद केरेलो

33 "प्रभु यहोवा एन ज़ोते, मीं अपनि कसम अवं सच़्च़े अपने ताकतबर हथ्थे सेइं ते शेक्ति सेइं ते भड़कोरी जलजलाहटी सेइं तुसन पुड़ राज़ केरेलो।✝20:33 यिर्म. 21:6. 34 अवं ताकतबर हथ्थे सेइं ते अपने शेक्ति सेइं ते एपनी जलजलाहटी सेइं तुसन मुल्खे-मुल्खेरे लोकन मरां अलग केरेलो, ते तैन मुल्खन मरां ज़ैन मां तुस तितर-बितर भोवरे थिये, अकोट्ठे केरेलो; 35 ते अवं तुसन मुल्खे-मुल्खेरे सुनसान ठैरी मां नेइतां, तैड़ी अपने सामने तुसन सेइं मुकदमो लड़ेलो। 36 ज़ैस तरीके सेइं अवं तुश्शे दादे-पड़दादन सेइं मिस्र मुल्खेरे सुनसान ठैरी मां मुकदमो लड़तो थियो, तैस्से तरीके सेइं तुसन सेइं मुकदमो लड़ेलो, प्रभु यहोवा एन ज़ोते।

37 "अवं तुसन लट्ठी हैठमेईं च़लेइलो। ते तुसन करारेरे बन्धने मां छ़डेलो। 38 अवं तुसन मरां सब बगावत केरनेबालन केढतां ज़ैना मेरे खलाफ पाप केरतन तुसन शुद्ध केरेलो; ते ज़ैस मुल्खे मां तैना रहतन तैस मरां अवं तैन्न कढेलो; पन इस्राएल मुल्खे मां एजने न देइलो। तैखन तुसन पतो लग्गेलो कि अवं यहोवा आईं।

39 "हे इस्राएली लोकव तुसन सेइं त प्रभु यहोवा एन ज़ोते: गेइतां एपनी-एपनी मूरती केरि पूज़ा केरा; अगर तुसां मेरी न शुनेले, त अग्रोवं जो भी एन्ने केरथ; पन मेरू पवित्र नवं एपनी च़ढ़तलन सेइं ते मूरतन सेइं अपवित्र न केरथ।

40 "किजोकि प्रभु यहोवा एन ज़ोते कि इस्राएलेरो सारो घरानो अपने मुल्खे मां मेरे पवित्र पहाड़े पुड़, इस्राएलेरे उच्‍चे पहाड़े पुड़ सब मेरी आराधना केरेले; तैड़ी अवं तैन सेइं खुशी भोइलो, तैड़ी अवं तुश्शी सब च़ढ़तलां ते रोड़ी-रोड़ी चीज़ां, ते तुश्शी सैरी पवित्र कियोरी सब चीज़ां कबूल केरेलो। 41 ज़ैखन अवं तुसन मुल्खे-मुल्खेरे लोकन मरां अलग केरेलो ते तैन मुल्खन मरां ज़ैन मां तुसां तितर-बितर भोवरे थिये, अकोट्ठे केरेलो, तैखन अवं तुसन खुश केरनेबाली खुशबू सेमझ़तां कबूल केरेलो, ते गैर कौमां केरे सामने तुश्शे ज़िरिये अवं पवित्र ठहराव गालो।✝20:41 यहे. 28:25. 42 ज़ैखन अवं तुसन इस्राएलेरे मुल्खे मां पुज़ेइलो, ज़ैस देनेरो वाधो मीं तुश्शे दादे-पड़दादन सेइं कियोरो थियो, तैखन तुसन पतो लग्गेलो कि अवं यहोवा आईं। 43 तैड़ी तुसां अपनो चाल चलन ते अपना सब कम्मां ज़ैन केरे केरने सेइं तुसां अशुद्ध भोवरेथ याद केरेले, ते अपने सेभी बुरे कम्मां केरे वजाई सेइं एपनी नज़री मां भिट्टे ठहरेले। 44 हे इस्राएली लोकव, ज़ैखन अवं तुसन सेइं तुश्शे बुरे चाल चलन ते बुरे कम्मां केरे मुताबिक नईं, पन अपने नंव्वेरे खातर बर्ताव केरेलो, तैखन तुसन पतो च़लेलो कि अवं यहोवा आईं, प्रभु यहोवा एन ज़ोते।"

दक्षिण मुल्खेरे जंगले मां अग

45 फिरी यहोवाए मीं सेइं ज़ोवं: 46 "ओ नाश भोने बाला मैन्हु, अपनु तुत्तर दक्षिणेरे पासे केर, ते दक्षिणेरे पासे वचन शुना, ते दक्षिण मुल्खेरे जंगलेरे खलाफ नबूवत केर; 47 ते दक्षिण मुल्खेरे जंगले सेइं ज़ो, यहोवारू एन वचन शुन, प्रभु यहोवा एन ज़ोते; अवं तीं मां अग लेइलो, ते तीं मां कुन सब्ज़ ते कुन शुकोरे बुट आन, अग तैन सेभन भस्म केरेली; तैसेरी भखोरी अग न हिश्शेली, ते तैसेरी वजाई सेइं दक्षिणे करां उत्तरे तगर सेभी केरां तुत्तरां फुकोई गालां। 48 तैखन सेभी लोकन समझ़ एज्जेली कि ऐह अग यहोवाए लेवरीए; ते तै कधे न हिश्शेली।" 49 तैखन मीं ज़ोवं, "अफ़सोस परमेशर यहोवा! लोक त मेरे बारे मां ज़ोइयां केरतन कि कुन तै पुनैनी केरो ज़ोने बालो नईं?"