यहेजकेल 8

परमेशरेरे भवने मां मूरती पूज़ा

1 इश्शे बाबेलेरे गुलैमी मां गानेरे शेइयोवं सालेरे शेइयोवं दिहाड़े ज़ैखन अवं अपने घरे बिशोरो थियो, ते यहूदी केरे बुज़ुर्ग मेरे सामने बिश्शोरे थिये, तैखन प्रभु यहोवारी शक्ति तैड़ी मीं पुड़ बांदी भोइ। 2 तैखन मीं हेरू कि अग्गरू ज़ेरू अक रूप लेइहोते; तैसेरी कमरी करां बुनीयें पासे अग आहे, ते तैसेरी कमरी करां बेइयें पासे चमकते पितलरे चमकोरू ज़ेरू किछ आहे। 3 तैस हथ्थेरू ज़ेरू किछ बधेइतां मेरे दोग्गेरे बाल ट्लाए; तैखन आत्मा अवं धरती ते अम्बरेरे मझ़ाटे उठेइतां परमेशरेरे हिरावरे दर्शन मां यरूशलेमेरे भवने मां, अंगनेरे तैस फाटके कां पुज़व, ज़ेसेरू तुत्तर उत्तरेरे पासे; ते ज़ैस मां तैस जलन करावाने बाली मूरतरी ठार थी ज़ेसेरे वजाई सेइं जलन पैदा भोतीए। 4 फिरी तैड़ी इस्राएलेरे परमेशरेरी महिमा तेरही ही थी ज़ेरि मीं मैइदाने मां*8:4 मैइदाने मां मतलब कबार दरियारे बन्ने। लेवरी थी।

5 तैनी मीं सेइं ज़ोवं, "ओ नाश भोने बाला मैन्हु, अपनि एछ़्छ़ी उत्तरेरे पासे घेड़तां हेर।" ते मीं अपने एछ़्छ़ी उत्तरेरे पासे तेकतां हेरू कि वेदी फाटकेरे उत्तरेरे पासे तैसेरे दाखल भोनेरे ठैरी मां तै जलन पैदा करानेबाली मूरतीए। 6 तैखन तैने मीं सेइं ज़ोवं, "ओ नाश भोने बाला मैन्हु, कुन तू हेरने लाहोरोस कि इनां लोक कुन केरि राहोरेन? इस्राएली लोक केत्रां बड़ा भिट्टां कम्मां केरतन, ताके अवं अपने पवित्र ठैरी करां दूर भोइ गेईं; पन तू इन करां भी जादे भिट्टां कम्मां हेरेलो।"

7 तैखन तैनी अवं भवनेरे अंगनेरे दारे पुड़ नेव, ते मीं हेरू, कि दिवारी मां अक सुराखे। 8 तैखन तैनी मीं सेइं ज़ोवं, "ओ नाश भोने बाला मैन्हु, दिवारी ट्लोड़;" एल्हेरेलेइ मीं दिवार ट्लोड़तां हेरू कि अक दारे। 9 तैनी मीं सेइं ज़ोवं, "अन्तर गेइतां हेर कि इना लोक इड़ी केरहां-केरहां ते बड़ां भिट्टां कम्मां केरि राहोरेन।" 10 ते मीं अन्तर गेइतां हेरू कि च़ेवरे पासां केरि दिवारी पुड़ किसमां-किसमां केरे जीप ज़ैना पेटेरे भारे च़लनेबाले ते अशुद्ध जानबर ते इस्राएली लोकां केरे सब मूरती केरि तसवीरां बेनोरिन। 11 इस्राएली केरे बुज़ुर्गन मरां 70 ज़ैन मां शापानेरू मट्ठू याजन्याह याजक भी आहे, तैना तैन तसवीरां केरे सामने खड़ेन, ते हर एक्‍केरे हथ्थे मां धूपदाने; ते धूपेरे तूए सेइं खुशबू च़लने लेवरीए। 12 तैखन तैनी मीं सेइं ज़ोवं, "ओ नाश भोने बाला मैन्हु, कुन तीं लाहेरूए कि इस्राएली केरे बुज़ुर्ग आंधरे कमरन मां कुन लगोरेन केरने? तैना ज़ोतन कि यहोवा असन न लाहे; यहोवाए इस्राएलेरो मुल्ख शारोरोए।" 13 फिरी तैनी मीं सेइं ज़ोवं, "तू इन करां होरां भी भिट्टां कम्मां हेरेलो ज़ैना तैना केरतन।"

14 तैखन तैनी अवं यहोवारे भवनेरे तैस फाटके कां नियो ज़ै उत्तरेरे पासे थियो ते तैड़ी कौन्शां बिशोरी तम्मूज देबतेरे लेई लेरां देने लेगोरी थी। 15 तैखन तैनी मीं सेइं ज़ोवं, "ओ नाश भोने बाला मैन्हु, कुन तीं इन हेरू? फिरी इन करां भी भिट्टे कम्मन तू हेरेलो।"

16 तैखन तैनी अवं यहोवारे भवनेरे एन्त्री अंगने मां नियो; ते तैड़ी यहोवारे भवनेरे दारे पुड़ ओसारे ते वेदरे मझ़ाटे लगभग 25 मड़द अपनि पिठ यहोवारे भवनेरे पासे ते अपनु तुत्तर पूर्वेरे पासे केरतां थिये; ते तैना पूर्वेरे पासे दिहाड़ेरी पूज़ा केरि राहोरे थिये। 17 तैखन तैनी मीं सेइं ज़ोवं, "ओ नाश भोने बाला मैन्हु, कुन तीं एन लाहेरूए? कुन यहूदारे घरानेरे लेई भिट्टां कम्मां केरू केरनू निकड़ी ज़ेरि गल्‍ले, ज़ैन तैना इड़ी केरतन? तैनेईं अपनो मुल्ख ज़ुलमे सेइं भरो, ते फिरी इड़ी एइतां मीं सरकातन। बल्के तैना डालड़ी अपने नक्‍केरे सामने केरतां रखतन। 18 एल्हेरेलेइ अवं भी क्रोधे मां कम केरेलो, न अवं दया केरेलो ते न अवं नरमी हरेइलो; ते चाए तैना मीं कां उच्‍ची आवाज़ी मां प्राथना केरेले, फिरी भी अवं तैन केरि प्राथना न शुनेलो।"