यहेजकेल 38

गोग राज़ेरे खलाफ नबूवत

1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, अपनु तुत्तर मागोग मुल्खेरे गोग राज़ेरे पासे केरतां ज़ै रोश, मेशेक, ते तूबल नगरां केरो प्रधाने, तैसेरे खलाफ नबूवत केर। 3 ते एन ज़ो, हे गोग राज़ा, तू ज़ै रोश, मेशेक, ते तूबलेरे प्रधानस, परमेशर यहोवा एन ज़ोते: हेर, अवं तेरे खलाफ आईं। 4 अवं तीं च़ेवरे पासन घुमेइलो, ते तेरे बोमफ़े मां नकेल लेइतां तीं कढेलो; ते तेरी सैरी सेनाई भी मतलब घोड़न ते सुवारन ज़ैना सब कवच लेइतां अक बड़ी भीड़े, ज़ैना फरी, ढाल घिन्तां सब तलवार च़लानेबाले भोल्हे; 5 ते तैन सेइं साथी फारस, कूश ते पूत मुल्खां केरे सिपाही, ज़ैन केरे हथ्थे मां ढाल ते दोग्गे पुड़ टोप लेवरोए; 6 ते गोमेर ते तैसेरी सारी सेना, ते उत्तरेरे पासेरे दूर-दूर मुल्खां केरे तोगर्मारे घराने ते तैसेरी सारी सेना कढेलो; तीं सेइं साथी बड़े मुल्खां केरे लोक भोल्हे।

7 "एल्हेरेलेइ हे गोग राज़ा, तू तियार भोइ गा; तू ते तीं कां ज़ेत्री सेना अकोट्ठी भोल्ही, तियार रेइयथ, ते तू तैन केरो प्रधान बेना। 8 बड़े दिहाड़े बीतनेरां बाद तेरो पतो कियो गालो; ते आखरी सालन मां तू तैस मुल्खे मां एज्जेलो, ज़ै तलवारी करां बेच़तां छुटोरो भोल्हो, ते ज़ेसेरे लोक बड़े कौमन मरां अकोट्ठे भोल्हे; मतलब तू इस्राएलेरे पहाड़न पुड़ एज्जेलो, ज़ैना लगातार उज़ड़ने लगोरेन; पन तैना मुल्खे-मुल्खेरे लोकां केरे कब्ज़े मरां छुटतां सारे निडर राले। 9 तू चढ़ाई केरेलो, ते तूफानेरो ज़ेरो एज्जेलो, ते अपनि सारी सेना ते बड़े मुल्खां केरे लोकन सने बिदलारारो ज़ेरो एज्जेलो।

10 "परमेशर यहोवा एन ज़ोते, तैस दिहाड़े तेरे मने मां एरी-एरी गल्‍लां एज्जेली, कि तू अक बुरी योजना भी कढेलो; 11 ते तू ज़ोलो कि अवं बगैर शहरपनाहरे ड्लाव्वां केरे मुल्खे पुड़ चढ़ाई केरेलो; अवं तैन लोकन कां गेइलो ज़ैना चैनी सेइं निडर रहतन; ज़ैना सारे बगैर शहरपनाहरे ते बगैर फाटकां केरे ते बगैर अड्डे ते बगैर पल्‍लां केरे बस्सोरेन; 12 ताके तू थुसोड़तां तैन लुटस ते अपनो हथ तैन खण्डरण पुड़ मारस ज़ैना फिरी बसाए जे, ते तैन लोकां केरे खलाफ गास ज़ैना कौमन मरां अकोट्ठे भोवरे थिये ज़ैना मालदारन ते गोरू गब्बां पालतन, ते मुल्खे मां मझ़ाटे बस्सोरेन। 13 शेबा ते ददान नगरां केरे लोक ते तर्शीश नगरेरे बुपारी लोक अपने मुल्खेरे सब जुवान शेरन समेत ज़ोले, ‘कुन तू लुटने एवरोस? कुन तीं दौलत लुटने ते सोन्नू चाँदी नेने ते गोरू गब्बां ते जाईदात लुटनेरे लेई एत्री भीड़ अकोट्ठी कियोरीए?’

14 "एल्हेरेलेइ ओ नाश भोने बाला मैन्हु, नबूवत केरतां गोग राज़े सेइं ज़ो, परमेशर यहोवा एन ज़ोते, ज़ैस मौके मेरे इस्राएली लोक निडर भोइतां बस्सोरे राले, कुन तू हमलो केरनेरे लेई तियार न भोल्हो? 15 तू उत्तरेरे पासेरे दूर-दूर ठारन मरां एज्जेलो; तू ते तीं सेइं साथी बेड़ि कौमां केरे लोक भोल्हे, ज़ैना सारे घोड़न पुड़ सुवार भोल्हे, मतलब अक बड़ी भीड़ ते ताकतबर सेना। 16 ज़ेन्च़रे बिदलार अम्बरे ढकतीए तेन्च़रे तू मेरे इस्राएली लोकां केरे मुल्खे पुड़ एन्च़रे चढ़ाई केरेलो। एल्हेरेलेइ हे गोग, आखरी दिहाड़न मां एरू भोल्हु, कि अवं तीं करां अपने मुल्खे पुड़ चढ़ाई करेइलो, कि ज़ैखन अवं कौमां केरे हेरते तेरे ज़िरिये अपनो आप पवित्र ठहरेईं, तैखन तैना मीं पिशानेले।

17 "परमेशर यहोवा एन ज़ोते, कुन तू तैए नईं ज़ेसेरी चर्चा मीं पुराने ज़माने मां अपने दासां केरे ज़िरिये, मतलब इस्राएलेरे नेबी केरे ज़िरिये नबूवत कियोरी थी, ज़ैना तैस वक्ते मां बड़े सालन तगर नबूवत केरते राए, कि यहोवा गोगे करां इस्राएली लोकन पुड़ हमलो करालो। 18 ज़ैस वक्ते गोग इस्राएल मुल्खे पुड़ हमलो केरेलो, तैस वक्ते अवं अपनो क्रोध बांदो केरेलो, परमेशर यहोवा एन ज़ोते। 19 मीं जलजलाहट ते क्रोधेरी अग्गी मां ज़ोवं कि सच़्च़े तैस दिहाड़े इस्राएलेरे मुल्खे मां अक बड़ो भुंज़ल एज्जेलो। 20 ते मेरे दर्शने सेइं समुन्दरेरी मेछ़ली ते अम्बरेरां च़ुड़ोलू ते जंगली जानबर ते ज़मीनी पुड़ ज़ेत्रे भी पेटेरे भारे च़लनेबाले जीप जन्तू ते ज़मीनी पुड़ ज़ेत्रे मैन्हु रहतन, सब थरकेले, ते पहाड़ां बिछ़ोड़ां गालां; ते शफड़ां बिछ़ड़ी गैली, ते सब डंख डुलतां मित्ती मां मिली गाले।✝38:20 होश. 4:3. 21 परमेशर यहोवा एन ज़ोते कि अवं तैसेरे खलाफ तलवार च़लानेरे लेई अपने सेभी पहाड़न जो ज़ोइलो ते हर एक्‍केरी तलवार तैसेरे ढ्लाएरे खलाफ खड़ी भोल्ही। 22 अवं महामैरी सेइं ते खूनेरे ज़िरिये तैस सेइं सज़ाह देइलो; ते तैस पुड़ ते तैसेरे सेनाई पुड़, ते तैन बेड़ि कौमन पुड़ ज़ैना तैस कां भोल्ही, अवं तैन पुड़ बड़ी झ़ड़ी ते आन ते अग ते गन्धक बखेइलो।✝38:22 यशा. 66:16. 23 एस तरीके अवं अपनो आप महान ते पवित्र ठहरेइलो ते बेड़ि कौमां केरे सामने अपनो आप बांदो केरेलो। तैखन तैन्न पतो लग्गेलो कि अवं यहोवा आईं।"