पहरदार ते तैसेरो सन्देश
1 यहोवाए मीं सेइं ज़ोवं: 2 "ओ नाश भोने बाला मैन्हु, अपने लोकन सेइं ज़ो, ज़ैखन अवं कोन्ची मुल्खे पुड़ दुश्मना केरे ज़िरिये तलवार च़लेइ, ते तैस मुल्खेरे लोक कोन्ची मैन्हु च़ुनतां अपनो पहरदार बनान, 3 तैखन अगर तै पहरदार एन हेरतां कि इस मुल्खे पुड़ तलवार च़लने बालीए, नरशिंगो बज़ेइतां लोकन खबरदार केरे, 4 त अगर कोई तैखन भी नरशिंगेरी आवाज़ शुन्तां खबरदार न भोए ते तलवार च़लने सेइं मेरि गाए, त तै अपने मरनेरो एप्पु ज़िमेवार भोल्हो। 5 तैनी नरशिंगेरी आवाज़ शुनी, पन खबरदार न भोव एल्हेरेलेइ तै अपने मौतरो ज़िमेवार एप्पु भोल्हो, पन अगर तै खबरदार भोथो त तैसेरी जान बच़नी थी।33:5 मत. 27:25. 6 पन अगर पहरदार इन हेरने पुड़ कि तलवार च़लने बालीए ते तै नरशिंगो बज़ेइतां लोकन खबरदार न केरे, ते तलवार च़लने सेइं तैन मरां कोई मेरि गाए, त तै मैन्हु अपने पापेरी वजाई सेइं मेरि गालो, पन अवं तैसेरे मौतरो ज़िमेवार पहरदारे बनेइलो।
7 "एल्हेरेलेइ, ओ नाश भोने बाला मैन्हु, मीं तू इस्राएली लोकां केरो पहरदार च़ुनोरोस, एल्हेरेलेइ मीं करां वचन शुन्तां तैन्न मेरे तरफां खबरदार केर। 8 अगर अवं दुष्टे सेइं ज़ोईं, ‘हे दुष्ट, तू ज़रूर मरेलो,’ तैखन अगर तू दुष्टे तैसेरे बत्तरे बारे मां खबरदार न केरस त तै दुष्ट अपने पापे मां मेरि गालो, त तैसेरे मौतरो हिसाब अवं तीं करां नेइलो। 9 पन अगर तू दुष्टे तैसेरे बुरी बत्तरे बारे मां खबरदार केरस कि तै बाज़ एज्जे ते तै एरू कम न केरे ते तै त अपने पापेरे वजाई सेइं मेरि गालो, पन तू अपनि जान बच़ालो।
परमेशर लोकन नष्ट केरनो न चाए
10 "फिरी ओ नाश भोने बाला मैन्हु, इस्राएली लोकन सेइं इन ज़ो, तुसां एन ज़ोतथ, ‘कि इश्शे पापां केरो बोझ असन पुड़ लद्दोरोए, ते असां तैन केरे वजाई सेइं नाश भोइ गातम, ते हुनी असां केन्च़रे ज़ींते रहम?’ 11 एल्हेरेलेइ तू एन सेइं इन ज़ो, परमेशर यहोवा एन ज़ोते: मीं अपनि कसम, अवं दुष्टेरे मरने सेइं बिलकुल खुशी न भोईं, पन एस सेइं खुशी भोताईं कि तै अपनि दुष्टता छ़ेडतां फिरे ते ज़ींतो राए; हे इस्राएली लोकव, तुसां एपनी बुरी बत्तन करां फिरी गाथ, तुसां किजो मरथ? 12 ओ नाश भोने बाला मैन्हु, अपने लोकन सेइं इन ज़ो, अगर धर्मी मैन्हु पाप केरे, त तैसेरी धार्मिकता तैस न बच़ेइ बटेली, ते अगर दुष्ट अपनि दुष्टता छ़ेडतां फिरी गाए त तैसेरी पेइली दुष्टता सेइं तै न बिछ़ोड़ेलो, ते धर्मी मैन्हु ज़ैखन पाप केरे, तैखन अपनि धार्मिकताई सेइं तै ज़ींतो न रालो। 13 अगर अवं धर्मी मैन्हु सेइं ज़ोईं कि तू ज़रूर ज़ींतो रालो, ते तै एपनी धार्मिकताई पुड़ भरोसो केरतां बुरां कम्मां केरने लगे, तैखन तैसेरे धार्मिकतारे कम्मन मरां कोई भी याद न कियूं गालू; ते ज़ैना बुरां कम्मां तैनी कियोरां भोल्हां तैन्ने मां फसोरो तै मेरि गाले। 14 फिरी ज़ैखन अवं दुष्टे सेइं ज़ोईं, तू पक्को मेरि गालो, ते तै अपने पापे करां फिरतां न्याय ते धार्मिकतारू कम केरने लगे, 15 मतलब, अगर दुष्ट मैन्हु बन्धे रेखोरी चीज़ां वापस दे, ते लुटोरी चीज़ां भी वापस दे, ते बगैर बुराई कियोरे ज़िन्दगी देनेबाले विधन पुड़ च़ले, त तै न मारेलो; तै पक्को ज़ींतो रालो। 16 ज़ेत्रे पाप तैनी कियोरे भोन, तैन मरां कोई याद न कियो गालो, तैनी न्याय ते धार्मिकतारां कम्मां कियां ते तै पक्को ज़ींतो रालो।
17 "फिरी भी तुश्शे इस्राएली लोक ज़ोतन, प्रभु न्याय नईं लगोरो केरने, पन तैन्ना एप्पु बुरू केरि राहोरेन। 18 ज़ैखन धर्मी मैन्हु धार्मिकताई करां फिरतां बुरां कम्मां केरने लगे, तैखन तै सच़्च़े तैन मां फेसतां मेरि गाले। 19 ज़ैखन अगर दुष्ट एपनी दुष्टता करां फिरतां न्याय ते धर्मेरां कम्मां केरने लगे, त तैखन तै तैन केरे वजाई सेइं ज़ींतो रालो। 20 फिरी भी तुसां ज़ोतथ कि प्रभु न्याय नईं लगोरो केरने? हे इस्राएलेरे घराना, अवं हर एक्की मैन्हेरो न्याय तैसेरे कम्मां केरे मुताबिक केरेलो।"
यरूशलेम नगरेरी हार
21 फिरी इश्शी गुलैमरे यारोवं सालेरे दशोवं महीनेरे पंच़ोंव दिहाड़े, अक मैन्हु ज़ै यरूशलेम नगरे मरां नेशतां बच़ोरो थियो, तै मीं कां एइतां ज़ोने लगो, "नगरे पुड़ कब्ज़ो भोइ जेव।" 22 तैस नश्शोरे मैन्हेरे एजने करां पेइले ड्लवझ़ी यहोवारी शक्ति मीं पुड़ एवरी थी; ते झ़ेझ़ां तगर मतलब तैस मैन्हेरे एजने तगर मेरू आशी खुल्लू; ते मेरू आशी खुलोरू रावं, ते अवं फिरी लट्टो न राव।
इस्राएली लोकां केरो पाप
23 फिरी यहोवाए मीं सेइं ज़ोवं: 24 "ओ नाश भोने बाला मैन्हु, इस्राएल मुल्खेरे तैन खण्डरन मां रानेबाले लोक ज़ोतन, कि अब्राहम अक मैन्हु थियो, फिरी भी मुल्खेरो मालिक भोव, पन असां बड़े लोक आम, एल्हेरेलेइ मुल्ख सच़्च़े इश्शे कब्ज़े मां दित्तोरोए। 25 एल्हेरेलेइ तू तैन सेइं ज़ो, परमेशर यहोवा एन ज़ोते, ‘तुसां लोक त मासे खूने समेत खातथ, ते एपनी मूरती केरि पूज़ा केरतथ, ते खून केरतथ, ते फिरी तुसां तैस मुल्खेरे बारस राले? 26 तुसां एपनी-एपनी तलवारी पुड़ भरोसो केरतथ ते भिट्टां कम्मां केरतथ ते अपने पड़ोसेरी कौन्शी सेइं व्यभिचार केरतथ, त फिरी कुन तुसां एस मुल्खेरे मालिक भोल्हे?’" 27 तू तैन सेइं इन ज़ो, परमेशर यहोवा एन ज़ोते: "मीं अपनि कसम, इस मां कोई शक नईं ज़ैना लोक खण्डरन मां रहतन, तैना तलवारी सेइं मरेले, ते ज़ैना खुल्ले मैइदाने मां रहतन, तैन अवं जानबरां केरि खूराक बनेइलो, ते ज़ैना गत्तन मां ते कुढन मां रहतन तैना महामैरी सेइं मरेले।33:27 यिर्म. 42:22. 28 अवं इस्राएल मुल्खे उज़ाड़ेलो; ते तैसेरी ताकतरू घमण्ड खतम भोइ गालू, ते इस्राएलेरां पहाड़ां एन्च़रे उज़डेलां कि तैन पुड़मेइं कोई न च़लेलो। 29 एल्हेरेलेइ एन राहोरे लोकां केरे बुरे कम्मां केरि वजाई सेइं अवं एस मुल्खे उज़ाड़ेलो, तैखन तैन पतो लग्गेलो कि अवं यहोवा आईं।"
वचन शुन्नू ते तैस पुड़ न च़लनू
30 यहोवा इन भी ज़ोवं, "ओ नाश भोने बाला मैन्हु, तेरे लोक दिवारन कां ते घरां केरे दारन मां तेरे बारे मां गल्लां केरतन ते एक्की होरि सेइं ज़ोतन, ‘एज्जा, शुना, यहोवारे तरफां कुन वचन एवरूए।’ 31 तैना लोकां केरे ज़ेरे तीं कां एइतन ते मेरे लोक बेनतां तेरे सामने बिशतां तेरी गल्लां शुन्तन, पन तैना तैन्न पुड़ न च़लन, एपनी ज़बाना सेइं त तैना बड़ो प्यार हिरातन, पन तैन केरे मने मां लालच़ रहते। 32 तू तैन केरे नज़री मां प्यारेरां गीतां ज़ोने बालो, ते रोड़ू साज़ बज़ाने बालो भोव, किजोकि तैना तेरी गल्लां शुन्ने त शुन्तन, पन तैन पुड़ अमल न केरन। 33 एल्हेरेलेइ ज़ैखन ई गल भोल्ही, त तै सच़्च़े पूरी भोल्ही, तैखन तैन पतो लग्गेलो कि तैन मां अक नबी एवरोए थियो।"