यहेजकेल 28

सोर नगरेरे राज़ेरे खलाफ नबूवत

1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, सोर नगरेरे राज़े सेइं ज़ो, परमेशर यहोवा एन ज़ोते कि तीं मने मां घमण्ड केरतां एन ज़ोवरूए, ‘अवं ईश्वर आईं, अवं समुन्दरे मां परमेशरेरे तखते पुड़ बिशोरोईं,’ पन अगर तू अपने आपे परमेशरेरो ज़ेरो हिरातस, फिरी भी ईश्वर नईं, मैन्हु आस।✝28:2 यहे. 28:9. 3 तू सोचतस कि तू दानिय्येले करां जादे अक्लमन्द आस; ते कोई भेद तीं करां छ़पोरो नईं; 4 तीं एपनी अक्लरे ते समझ़रे ज़िरिये सेइं धन-दौलत हासिल कियोरीए, ते अपने गुदामन मां सोन्नू चाँदी रखोरूए। 5 तीं बेड़ी अक्ली सेइं लेन-देन कियोरूए ज़ैस सेइं तेरी दौलत बेधी जेई, ते दौलतरे वजाई सेइं तेरो मन घमण्डे सेइं भेरोई जेवरोए। 6 एल्हेरेलेइ परमेशर यहोवा एन ज़ोते, तू ज़ै अपने मने परमेशरेरो ज़ेरो हिरातस, 7 एल्हेरेलेइ हेर, अवं तीं पुड़ एरे परदेशी लोकन करां चढ़ाई करेइलो, ज़ैना सैरी कौमन करां जादे सखत भोन; तैना एपनी तलवारां तेरी खूबसूरत चीज़न पुड़ च़लाले ज़ैना तीं अपने अक्ली सेइं बनेवरिन ते तेरी चमक-धमक बगैड़तां छ़डेले। 8 तैना तीं मारेले ते कब्री मां पुज़ाले, ते तू समुन्दरे मां मारोरां केरे तरीके मेरि गालो। 9 तैखन कुन तू अपने कत्ल केरनेबालेरे सामने ज़ोतो रालो, ‘अवं परमेशर आईं?’ तू अपने कत्ल केरनेबालेरे हथ्थे मां ईश्वर नईं, बल्के अक्‍के मैन्हु ठहरेइलो। 10 तू परदेशी लोकां केरे हथ्थे तैन लोकां केरो ज़ेरो मारो गालो ज़ैन केरो खतनो नईं भोवरो; किजोकि मीएं एन ज़ोवरूए, प्रभु यहोवा एन ज़ोते।"

सोर नगरेरे राज़ेरी हार

11 फिरी यहोवाए मीं सेइं ज़ोवं: 12 "ओ नाश भोने बाला मैन्हु, सोर नगरेरे राज़ेरे बारे मां मातमेरू गीत बनेइतां तैस सेइं ज़ो, परमेशर यहोवा एन ज़ोते: तू त रोड़े करां रोड़ोस; ते तू अक्ली सेइं भरपूर ते बड़ो खूबसूरतस। 13 तू परमेशरेरी अदन नंव्वेरी बागी मां थियो; तीं कां आभूषण, माणिक्य, पुखराज, हीरा, फीरोजा, सुलैमानी मणि, यशब, नीलमणि, मरकत ते लाल सब किसमेरी मणि ते सोन्नेरे पहरावे थिये; ते तेरी डेपली ते बेंशोई तींए मरां बनेवरी थी; ज़ैस दिहाड़े बनावरो थियो तैस्से दिहाड़े तैना भी तियार कियोरी थी।✝28:13 प्रका. 2:7. 14 तू सुरक्षा केरनेबालो अभिषिक्त करूब थियो, मीं तू एरहो ठहराव कि तू परमेशरेरे पवित्र पहाड़े पुड़ रहतो थियो; तू अग्गरे ज़ेरे चमकने बाले मेणि मां च़लो फिरतो थियो। 15 ज़ैस दिहाड़े तू बनेवरो थियो, ते ज़ैस दिहाड़े तगर तीं मां बुराई न थी मैल्होरी, तैस वक्ते तगर तू अपने सारे चाल चलने मां बेकसूर राव। 16 पन तेरे बड़े बुपारेरे कम्मां केरि वजाई सेइं तीं मां ज़ुलम भेरोई जेवं; ते तू पापी भोइ जेव; एल्हेरेलेइ मीं तू अपवित्र सेमझ़तां परमेशरेरे पहाड़े पुड़ेरां उसालो, ते हे सुरक्षा केरनेबाले करूब मीं तू अग्गरे ज़ेरे चमकने बाले मेणि मां नाश कियोरोस। 17 खूबसूरती सेइं तेरो मन घमण्डी भोइ जेव; ते अपने शान-ओ-शोकतरे वजाई सेइं तेरी अक्ल बिगड़ी जेवरी थी। मीं तू ज़मीनी पुड़ पेटकतां शारो; ते राज़ां केरे सामने तेरो तमाशो बनेवरोए। 18 तेरे बड़े अधर्मेरे कम्मां केरि वजाई सेइं ते तेरे लेन-देनेरी बुरैई सेइं तेरी पवित्र ठार अपवित्र भोइ जेई; एल्हेरेलेइ मीं तीं मरां एरी अग पैदा कियोरीए कि ज़ैस सेइं तू भस्म भोस, ते मीं तू सेभी तकने बालां केरे सामने ज़मीनी पुड़ भस्म केरतां छ़डोरोस। 19 मुल्खे-मुल्खेरे लोकन मरां ज़ेत्रे तीं ज़ानतन सब तेरी वजाई सेइं हैरान भेवरेन; तू डरेरी वजाह भोवरोस ते फिरी न मैल्हेलो।"

सीदोन नगरेरे खलाफ नबूवत

20 फिरी यहोवाए मीं सेइं ज़ोवं: 21 "ओ नाश भोने बाला मैन्हु, अपनु तुत्तर सीदोन नगरेरे पासे केरतां तैसेरे खलाफ नबूवत केर, 22 ते ज़ो, प्रभु यहोवा एन ज़ोते: हे सीदोन नगर, अवं तेरे खलाफ आईं; अवं तेरे मझ़ाटे अपनि महिमा करेइलो। ज़ैखन अवं तैस मां सज़ाह देलो ते तैस मां अवं अपनो आप पवित्र ठहरेलो, तैखन लोकन पतो च़लेलो कि अवं यहोवा आईं। 23 अवं तैस मां मरी फैलालो, ते तैसेरी सड़कन मां खून बगेइलो; ते तैसेरे च़ेवरे पासन तलवार च़लेली; तैखन तैस मां ज़खमी लोक बिछ़ड़ी गाले, ते तैन पतो लग्गेलो कि अवं यहोवा आईं।

इस्राएले बरकत मैल्हेली

24 "इस्राएली लोकां केरे च़ेवरे पासन ज़ेत्री कौमां तैन सेइं बुरो बर्ताव केरतिन, तैन मरां कोई तैन डुबने बालो कन्टो न भोल्हो, तैखन लोकन पतो च़लेलो कि अवं परमेशर यहोवा आईं।

25 "परमेशर यहोवा एन ज़ोते, ज़ैखन अवं इस्राएली लोकन तैन लोकन मरां अकोट्ठे केरेलो, ज़ैन मां तैना तितर-बितर भोवरे थिये, ते मुल्खे-मुल्खेरे लोकां केरे सामने तैन केरे ज़िरिये सेइं पवित्र ठहरेइलो, तैखन तैना तैस मुल्खे मां बास केरेले ज़ै मीं अपने दास याकूबे दित्तोरो थियो। 26 तैना तैस मां निडर भोइतां बस्सोरे राले; तैना घरां बनेइतां ते दाछ़ां केरि बागां लेइतां निडर राले; तैखन अवं तैन केरे च़ेवरे पासां केरे लोकन सज़ाह देइलो ज़ैना तैन सेइं बुरो बर्ताव केरतन तैखन तैन लोकन पतो लग्गेलो कि अवं तैन केरो परमेशर यहोवा आईं।"