यहेजकेल 7

इस्राएलेरो अन्त एजनो

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु, प्रभु यहोवा इस्राएलेरे मुल्खेरे बारे मां इन ज़ोते, कि अन्त भोव; च़ेवरे कून्न समेत मुल्खेरो अन्त एज्जी जेवरोए। 3 हुनी कोई उमीद नईं तेरो अन्त एवरोए, ते अवं अपनो क्रोध तीं पुड़ भड़केइतां तेरे चाल चलनेरे मुताबिक तीं सज़ाह देइलो; ते तेरे सारे भिट्टे कम्मां केरो फल तीं देइलो। 4 मेरी सिद्धी नज़र तीं पुड़ न भोल्ही, ते न अवं नरमी केरेलो; ते ज़ांतगर तेरे भिट्टे पाप तीं मां बनोरे राले तैखन तगर अवं तेरे बुरे कम्मां केरो फल तीं देलो। तैखन तीं पतो लग्गेलो कि अवं यहोवा आईं।

5 "प्रभु यहोवा इन ज़ोते: आफती पुड़ आफत एज्जी राहोरीए! हेरा, तै एइतीए। 6 अन्त एज्जी जेवरोए, सेभी केरो अन्त एवरोए; ई तेरे खलाफ खड़ो भोवरोए। हेरा, तै एइते। 7 हे इस्राएल मुल्ख, तेरे लेई विनाश चक्र घुम्मी जेव, वक्त एज्जी जेवरोए, दीस नेड़े; पहाड़न पुड़ आनन्देरे शब्देरे दिहाड़े नईं, शोर ही भोल्ही। 8 हुनी जल्दी अवं अपनि जलजलाहट तीं पुड़ भड़कालो, ते तीं पुड़ पूरो कोप उलटालो ते तेरे चाल चलनेरे मुताबिक तीं सज़ाह देइलो। ते तेरे भिट्टे कम्मां केरो फल तीं भुगतेइलो। 9 मेरी सिद्धी नज़र तीं पुड़ न भोल्ही ते न अवं तीं पुड़ नरमी केरेलो। अवं तेरे बुरे कम्मां केरो फल तीं करां भुगतेइलो, ते तेरे भिट्टे पाप तीं मां बनोरे राले। तैखन तुसन पतो लग्गेलो कि अवं यहोवा सज़ाह देनेबालो आईं।

10 "हेरा, तैस दिहाड़े हेरा, तै एइते! विनाशेरो चक्र घुम्मी जेव, सोटी फुल्‍ली जेई, घमण्ड फुल्‍ली जेव। 11 ज़ुलम बद्धते-बद्धते बुरैइअरी सज़ाह बेनि जेव; तैन मरां कोई न बच़ेलो, ते न तैन केरि भीड़, न तैन केरे धने मरां किछ रालू; ते न तैन केरे लेई मातम केरनेबालो भोल्हो। 12 तै वक्त एज्जी जेव, दीस नेड़े एवरीए; न त घिन्ने बालो आनन्द केरे ते न बेच़ने बालो मातम केरे, किजोकि तैन केरे सारे लोकन पुड़ कोप भेड़की जेवरोए। 13 चाए तैना ज़ींते रान, फिरी भी बेच़ने बालो बेच़ोरी चीज़ी कां कधी वापस न एज्जी बटेलो; किजोकि दर्शनेरी ई गल मुल्खेरे सारे लोकन पुड़ बीतेली; कोई मैन्हु वापस न एज्जेलो; कोई भी मैन्हु, ज़ै अधर्मे मां ज़ींतो रहते, ज़ोर न ट्लेइ सकेलो।

14 "इस्राएली लोकेईं नरशिंगो बज़ाव ते सब किछ तियार कियूं; पन जंगी मां कोई न गाए किजोकि मुल्खेरे सारे लोकन पुड़ मेरो कोप भड़कोरोए।

इस्राएलेरे पापेरी सज़ाह

15 "नगरेरे बेइर तलवार ते घरे अन्तर काल ते महामारीए; ज़ै मैइदाने मां भोए तै तलवारी सेइं मरेलो, ते ज़ै नगरे मां भोए तै ढ्लुखी सेइं ते महामारी सेइं मारो गालो। 16 ते तैन मरां ज़ैना बेच़तां निसेले त तैना बच़ने त बच़ेले पन अपने-अपने अधर्मेरे कम्मन मां फेसतां वैदन मां रेइतां कबूतरां केरे ज़ेरे पहाड़न पुड़ मातम केरते राले। 17 सेभी केरे हथ ढिल्‍ले ते सेभी केरे ज़ैधू बड़े कमज़ोर भोइ गाले। 18 तैना दुख बांदो केरनेरे लेई कमरी मां टाट पलैटेले, ते तैन शिलकन्ढे च़ड़ेले; सेभी केरां आशी शुक्‍की गालां ते सेभी केरि टिन्ड भोल्ही। 19 तैना अपनि चाँदी सड़कन मां शारेले, ते तैन केरू सोन्नू अशुद्ध चीज़ ठहरेलू; यहोवारी जलनरे दिहाड़े तैन केरू सोन्नू चाँदी तैन बच़ेइ न सखेलू, ते न तैस सेइं तैना रज़्ज़ेले, ते न तैन केरां पेटां भेरोलां। किजोकि तैन केरे अधर्मेरे ठोकरारी वजा भोल्ही। 20 तैन केरो मुल्ख ज़ै खूबसूरत ते बड़ो शानदार थियो, तैसेरे बारे मां तैनेईं घमण्ड केरतां तैस मां एपनी भिट्टी चीज़ां केरि मूरती रेखतां, ते भिट्टी चीज़ां बनेई, एल्हेरेलेइ मीं तै तैसेरे लेई अशुद्ध चीज़ ठहरावरोए। 21 अवं तैस लुटनेरे लेई परदेशी केरे हथ्थे, ते धन-दौलत थिसोड़नेरे लेई धेरतरे दुष्ट लोकां केरे कब्ज़े मां केरि देइलो; ते तैना तैस अपवित्र केरेले। 22 अवं तैन करां तुत्तर फिरेइलो, तैखन तैन मेरे सुरक्षित ठैरी अपवित्र केरेले; डैकू तैस मां गेइतां तैस अपवित्र केरेले।

23 "अक शंगल बना, किजोकि मुल्ख खून खराबे सेइं, ते नगर ज़ुलमे सेइं भेरि जेवरूए। 24 अवं गैर कौमां केरे बुरे करां बुरे लोकन आनेलो, ज़ैना तैन केरे घरां केरे मालिक भोइ गाले; ते अवं शेक्ति बालां केरू घमण्ड ट्लोड़ेलो ते तैन केरी पवित्र ठारां अपवित्र की गैली। 25 ज़ैखन नाश भोने पुड़ भोल्हो तैखन तोप्पने पुड़ भी तैन शान्ति न मैल्हेली। 26 मुसीबती पुड़ मुसीबत एज्जेली अफवाही पुड़ अफवा शुनोली; ते लोक नेबी करां दर्शनेरी गल्‍लां पुछ़ेले, पन याजके करां कानून, ते बुज़ुर्गन करां सलाह देनेरी शक्ति च़ली गाली। 27 राज़ो त मातम केरेलो, ते हुकूमत केरनेबाले उदैसारां लिगड़ां लाएले, ते मुल्खेरे लोकां केरे हथ ढिल्‍ले भोइ गाले। अवं तैन केरे कम्मां केरे मुताबिक तैन सेइं बर्ताव केरेलो, ते तैन केरि कमैइयरी ज़ेरि तैन सज़ाह देलो; तैखन तैन पतो लग्गेलो कि अवं यहोवा आईं।"