1 यहोवाए मीं सेइं ज़ोवं, "ओ नाश भोने बाला मैन्हु, खड़े उठ, ते अवं तीं सेइं गल्‍लां केरेलो।" 2 ज़ेरू तैने मीं सेइं ज़ोवं, तैखन आत्मा मीं मां एइतां अवं खड़ो कियो; ते ज़ै मीं सेइं गल्‍लां केरतो थियो मीं तैसेरी गल्‍लां शुनी। 3 तैनी मीं सेइं ज़ोवं, ओ नाश भोने बाला मैन्हु, अवं तीं इस्राएली लोकन कां मतलब बगावत केरनेबैली कौमी कां भेज़ताईं, ज़ैनेईं मेरे खलाफ बगावत की। तैन केरे दादे-पड़दादे ते तैना अज़ तगर मेरे खलाफ पाप केरते एवरेन। 4 इस पीढ़रे लोक ज़ैन कां अवं तीं भेज़ताईं, तैना बेशर्म ते ज़िद्दी आन। 5 ते तू तैन सेइं ज़ोइयां, प्रभु यहोवा ज़ोते, इस सेइं तैना, ज़ैना बगावत केरनेबाले घरानेरेन, चाए तैना शुन्न, फिरी भी तैन ई पतो लग्गेलो कि इश्शे दरमियान नबी आहे। 6 पन ओ नाश भोने बाला मैन्हु, तू तैन करां न डेरां; चाए तीं कंटन, झ़ैल्‍लन ते बिच़्च़ू केरे दरमियान रानू पे, चाए तैन बगावत केरनेबाले घरानेरेन फिरी भी तैन केरे गल्‍लन करां न डेरां ते न तैन केरां तुत्तरां लेहितां तेरी हिम्मत घटे। 7 एल्हेरेलेइ चाए तैना शुन्न या न शुन्न; फिरी भी तू मेरे वचन तैन सेइं ज़ोइयां, तैना त बड़े बगावत केरनेबालेन।

8 "पन ओ नाश भोने बाला मैन्हु, ज़ैन अवं तीं सेइं ज़ोताईं तैस तू शुन, तैस बगावत केरनेबाले घरानेरो ज़ेरो तू भी बगावत केरनेबालो न बेना, अपनु आशी घाड़ ते ज़ैन अवं देताईं तैस खा।"✝ 9 तैखन मीं तक्‍कू ते कुन लावं, कि मेरे पासे अक हथ एवरोए ते तैस मां अक किताबे*। 10 तैनी तै मेरे सामने खोलतां खिलारी ते तै दूईये पासन लिखोरी थी; ते ज़ैना गल्‍लां तैस मां लिखोरी थी, तैना मातम ते शोग ते दुखे सेइं भेरतां थी।✝