1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, नबूवत केरतां ज़ो, परमेशर यहोवा एन ज़ोते: अफ़सोस, अफ़सोस केर, अफ़सोस तैस दिहैड़ी पुड़! 3 किजोकि यहोवारी दिहाड़ी नेड़े एवरीए; तै बिदलारी दिहाड़ी, ते कौमां केरि सज़ाहरी दिहाड़ी भोल्ही। 4 मिस्र मुल्खे मां तलवार च़लेली, ते ज़ैखन मिस्रे मां लोक मारे गाले, तैखन कूश भी मुश्किली मां पेई गालो, लोक मिस्रे लुट्टी छ़डेले, ते तैसेरी मुनीयादां डोलतां छ़डेले। 5 कूश, पूत, लूद ते सब मिलो जुलोरे ते कूब लोक ते मुल्खेरे तैना लोक ज़ैनेईं करार कियोरोए, मिस्री लोकन सेइं साथी तलवारी सेइं मारे गाले।

6 "यहोवा एन ज़ोते, मिस्रेरे मद्दत केरनेबाले भी बिछ़ड़ी गाले, ते एपनी ज़ैस ताकती पुड़ तैना घमण्ड केरतन, तै ताकत ट्लुटी जेई; मिग्दोल नगरे करां लेइतां सवेने नगरे तगर तैन मां रानेबाले तलवारी सेइं मारे गाले, परमेशर यहोवा एन ज़ोते। 7 तैना उज़ड़ोरे मुल्खे मां उज़ड़ोरे राले, ते तैन केरे नगर खण्डर कियोरे नगरन मां गने गाले। 8 ज़ैखन अवं मिस्र मुल्खे मां अग लेइलो, ते तैसेरे सारे मद्दतगार नाश भोइ गाले, तैखन तैन्न पतो लग्गेलो कि अवं यहोवा आईं।

9 "तैस मौके मेरे सामनेरां दूत समुन्दरी ज़िहाज़न पुड़ च़ैढ़तां निडर भोइतां निस्सेले ते कूशी लोकन डराले; ते तैन पुड़ एत्री मुसीबत पेली कि ज़ेन्च़रे मिस्रेरे सज़ाहरे मौके पेवरी थी; किजोकि हेर, तै दिहाड़ी एइतीए!

10 "परमेशर यहोवा एन ज़ोते: अवं बाबेलेरे राज़े नबूकदनेस्सरेरे हथ्थे मिस्र मुल्खेरी भीड़ नाश करेइलो। 11 नबूकदनेस्सर अपने लोकन समेत, ज़ैना सेभी कौमन मां खतरनाकन, तैस मुल्खे नाश केरनेरे लेई पुज़ाए गाले; ते तैना मिस्र मुल्खेरे खलाफ तलवार खिचतां मुल्खे लाशन सेइं भेरि देले। 12 अवं नील दरियाए भी शुकेई छ़डेलो, ते मुल्ख बुरे लोकन सेइं भरेलो; ते अवं परदेशी लोकां केरे ज़िरिये मुल्खे; ते ज़ैन किछ तैस मांए, तैन उज़ाड़ेलो; मीं यहोवा एन ज़ोवरूए।"

13 परमेशर यहोवा एन ज़ोते, "अवं नोप नगरे मरां मूरतन नाश केरतां छ़डेलो, ते तैस मां ज़ैना मूरतिन तैन्न राने न देइलो; फिरी कोई प्रधान मिस्र मुल्खे मां खड़ो न भोल्हो; ते अवं मिस्र मुल्खे मां डर पैदा केरेलो। 14 अवं पत्रोस नगरे उज़ाड़ेलो, ते सोअन नगरे मां अग लेइलो, ते नो नगरे सज़ाह देइलो। 15 सीन नगरे ज़ै मिस्रेरो क़िलो, तैस पुड़ अवं अपनि जलजलाहट भड़केइलो, ते नो नगरेरे लोकां केरो अन्त केरेलो। 16 अवं मिस्रे मां अग लेइलो; सीन नगर बड़ू हिलेलू; ते नो नगर बरबाद कियूं गालू, ते नोप नगरेरे दुश्मन भर दुपहरेईं खड़े भोल्हे। 17 ओन ते पीवेसेत नगरेरे जुवान तलवारी सेइं मारे गाले, ते एना नगर गुलैमी मां च़ले गाले। 18 ज़ैखन अवं मिस्रेरू जुऊं तहपन्हेस नगरे मां ट्लोड़ेलो, तैखन तैस मां दीसां आंधरू भोल्हु, ते तैसेरी ताकत ज़ैस पुड़ तै घमण्ड केरते, तै नाश भोइ गाली; ते तैस पुड़ काली बिदलार पेली ते तैसेरी कुइयां गुलैमी मां च़ेलि गाली। 19 एस तरीके अवं मिस्री लोकन सज़ाह देइलो। ते तैन्न पतो लग्गेलो कि अवं परमेशर यहोवा आईं।"

20 फिरी इश्शे गुलैमरे यारोवं सालेरे पेइले महीनेरे सत्तोवं दिहाड़े यहोवाए मीं सेइं ज़ोवं, 21 "ओ नाश भोने बाला मैन्हु, मीं फ़िरौनेरी पाखड़ ट्लोड़तां छ़डोरीए; ते हेर, न तैस पुड़ दूवाई लाई ते न तैस पुड़ पट्टी बन्धी कि तै बेन्धतां तलवार ट्लानेरे काबल भोइसखे। 22 एल्हेरेलेइ प्रभु यहोवा एन ज़ोते, हेर, अवं फ़िरौनेरे खलाफ आईं, ते तैसेरी सझ़र भी ते ट्लुटोरी पाखड़ दूईने ट्लोड़तां छ़डेलो; ते तलवार तैसेरे हथ्थे मरां बिछ़ोड़ेलो। 23 अवं मिस्री लोकन कौमन-कौमन मां तितर-बितर केरतां छ़डेलो, ते मुल्खे-मुल्खे मां छेकतां छ़डेलो। 24 अवं बाबेलेरे राज़ेरी पाखड़न मज़बूत केरतां अपनि तलवार तैसेरे हथ्थे मां देइलो; पन फ़िरौनेरी पैखड़ी ट्लोड़ेलो, ते तै तैसेरे सामने एत्रू कर लाएलो, ज़ेन्च़रे मरने बालो ज़खमी करलाते। 25 अवं बाबेलेरे राज़ेरी पाखड़न सम्भालेलो, ते फ़िरौनेरी पैखड़ी ढिल्‍ली पेई गाली, तैखन तैन्न पतो लग्गेलो कि अवं यहोवा आईं, ज़ैखन अवं बाबेलेरे राज़ेरे हथ्थे मां अपनि तलवार देइलो, तैखन तै तैस मिस्र मुल्खे पुड़ च़लालो। 26 ते अवं मिस्री लोकन कौमन-कौमन मां तितर-बितर केरेलो ते मुल्खे-मुल्खे मां छ़ींकेइतां छ़डेलो, तैखन तैन्न पतो लग्गेलो कि अवं यहोवा आईं।"