1 यहोवा इन ज़ोते, "ओ नाश भोने बाला मैन्हु, तू इस्राएलेरे पहाड़न सेइं नबूवत केरतां ज़ो, हे इस्राएलेरे पहाड़व, यहोवारू वचन शुना। 2 परमेशर यहोवा एन ज़ोते: दुश्मने त तुश्शे बारे मां ज़ोवरूए, ओहो! पुराने ज़मानेरी उच्‍ची ठारां हुनी इश्शे कब्ज़े मां एवरिन। 3 एल्हेरेलेइ नबूवत केरतां ज़ो, परमेशर यहोवा एन ज़ोते: लोकेईं तुस उज़ाड़े ते च़ेवरे पासना एन्च़रे तंग कियोरेथ कि तुसन पुड़ बेच़ोरी कौमां केरो कब्ज़ो भोए, ते बकवासी लोक तुश्शी चर्चा केरतन ते आम लोक तुश्शी निन्दा केरतन; 4 एल्हेरेलेइ, हे इस्राएलेरे पहाड़व, परमेशर यहोवारू वचन शुना, परमेशर यहोवा तुसन सेइं एन ज़ोते, मतलब पहाड़न ते पहैड़न सेइं ते नालन ते वैदन सेइं, ते उज़ड़ोरे खण्डरन सेइं ते बेरान नगरन सेइं ज़ैना तुश्शे आसे-पासे बेच़ोरी कौमां केरे ज़िरिये लुटोरे थिये, ते तैन केरे मज़ाकेरी वजाह बेनि जे। 5 परमेशर यहोवा एन ज़ोते, सच़्च़े मीं एपनी जलनरी अग बेच़ोरी कौमां केरे सारे एदोमेरे खलाफ ज़ोवरूए कि ज़ैनेईं मेरो मुल्ख अपने मनेरे पूरे आनन्दे सेइं ते अभिमाने सेइं अपने कब्ज़े मां कियोरोए, कि तै बखलो भोइतां लुट्टो गाए। 6 एल्हेरेलेइ इस्राएलेरे मुल्खेरे बारे मां नबूवत केरतां पहाड़न, पहैड़न, नालन ते वैदी सेइं ज़ो, परमेशर यहोवा एन ज़ोते, हेरा, तुसेईं कौमां केरि निन्दा बरदाशत कियोरीए एल्हेरेलेइ अवं अपने बड़े क्रोधे सेइं ज़ोताईं। 7 परमेशर यहोवा एन ज़ोते: मीं ई कसम खेवरीए कि सच़्च़े तुश्शे च़ेवरे पासन ज़ैना कौमां आन, तैन्न अपनि निन्दा एप्पु बरदाशत केरनी पेनीए।

8 "पन हे इस्राएलेरे पहाड़व, तुसन पुड़ शाखां निसेली, ते तैन केरे फल मेरे इस्राएली लोकां केरे लेई लग्गेले; किजोकि मेरे इस्राएली लोक जल्दी वापस अपने मुल्खे मां एज्जेले। 9 हेरा, अवं तुश्शे पासे आईं, ते तुसन पुड़ सिद्धी नज़र केरेलो, ते तुसन पुड़ हल च़लाई गाली। 10 ते अवं तुसन पुड़ बड़े मैन्हु मतलब इस्राएलेरे सारे घराने बसेइलो; नगरां फिरी आबाद कियां गालां ते खण्डर फिरी बनाए गालो। 11 अवं तुसन पुड़ मैन्हु ते जानबरां केरि तैधात खूब बधेइलो, ते तैना फलेले ते तैन केरि तैधात खूब भोल्ही; अवं पेइलेरे ज़ेरे तुसन पुड़ लोकन बसेइलो, ते पेइले करां जादे तुश्शी भलियाई केरेलो। तैखन तुसन पतो लग्गेलो कि अवं यहोवा आईं। 12 अवं एरू केरेलो कि मेरे इस्राएली लोक तुसन पुड़ च़लेले फिरेले; ते तैना तुश्शे मालिक भोल्हे, ते तुसां तैन केरो अपनो हिस्सो भोल्हे ते तुश्शे वजाई सेइं तैना फिरी बेऔलाद न भोल्हे। 13 परमेशर यहोवा एन ज़ोते: ज़ैना लोक तुसन सेइं ज़ोइयां केरतन, ‘तू मैन्हु खाने बालोस, ते एप्पु पुड़ बेस्सोरी कौमी बेऔलाद केरि देतस।’ 14 एल्हेरेलेइ तू फिरी मैन्हु न खालो, ते एप्पु पुड़ बेस्सोरी कौमी बेऔलाद न केरेलो, परमेशर यहोवा एन ज़ोते। 15 अवं फिरी कौमां-कौमां केरे लोकन करां तेरी निन्दा शुनेइलो, ते तीं कौमां-कौमां केरे तरफां निन्दा झ़लनी न पेली, ते तीं पुड़ बेस्सोरी कौमी तू फिरी ठोकर न खुवेई बटेलो, परमेशर यहोवा एन ज़ोते।"

16 फिरी यहोवाए मीं सेइं ज़ोवं: 17 "ओ नाश भोने बाला मैन्हु, ज़ैखन इस्राएली लोक अपने मुल्खे मां रहते थिये, तैखन अपने चाल चलनेरे ते कम्मां केरे ज़िरिये तैना तैस अशुद्ध केरते थिये; तैन केरो चाल चलन मीं कौन्शरे महाभेरारी ज़ेरि अशुद्ध लगती थी। 18 एल्हेरेलेइ ज़ै खून तैनेईं मुल्खे मां कियो, ते मुल्ख मूरती पूज़ा केरतां अशुद्ध कियो, एल्हेरेलेइ मीं तैन पुड़ अपनो क्रोध भड़कव। 19 मीं तैना कौमी-कौमी मां तितर-बितर किये, ते तैना मुल्खे-मुल्खे मां छ़ींकोए; तैन केरे चाल चलन ते कम्मां केरे मुताबिक मीं तैन सज़ाह दित्ती। 20 पन ज़ैखन तैना तैन कौमन मां पुज़्ज़े ज़ैन मां तैना पुज़ोरे थिये, तैखन तैनेईं मेरू पवित्र नवं अपवित्र ठहरावं, किजोकि लोक तैन केरे बारे मां एन ज़ोने लगे, ‘एना यहोवारे लोकन, पन तैसेरे मुल्खे मरां कढोरेन।’✝ 21 पन मीं अपने पवित्र नंव्वे पुड़ ध्यान दित्तू, ज़ैन इस्राएली लोकन तैन कौमन मरां अपवित्र मन्नोरू थियूं, ज़ैड़ी तैना जेवरे थिये।

22 "एल्हेरेलेइ तू इस्राएली लोकन सेइं ज़ो, परमेशर यहोवा एन ज़ोते: हे इस्राएली लोकव, अवं एन सब तुश्शे लेई नईं बल्के अपने पवित्र नंव्वेरे लेई केरि राहोरोईं, ज़ैन तुसेईं तैन कौमन मां अपवित्र ठहरावं ज़ैड़ी-ज़ैड़ी तुसां जेवरे थिये। 23 अवं अपने महान नंव्वे पवित्र ठहरेइलो, ज़ैन कौमन मां अपवित्र कियो जेव, ज़ैन तुसेईं तैन मां अपवित्र कियूं, ज़ैखन अवं एन केरि नज़री मां तुश्शे सामने पवित्र भोल्हो, तैखन कौमन पतो लग्गेलो कि अवं यहोवा आईं, परमेशर यहोवा एन ज़ोते। 24 अवं तुसन अलग-अलग कौमन मरां केढतां आनेलो, ते मुल्खन मरां अकोट्ठे केरेलो; ते तुसन अपने मुल्खे मां पुज़ेइलो। 25 अवं तुसन पुड़ शुद्ध पानी झ़िड़केलो, ते तुसां शुद्ध भोल्हे; ते अवं तुसन तुश्शी सैरी अशुद्धताई ते मूरतन करां शुद्ध केरेलो।✝ 26 अवं तुसन नंव्वो मन देइलो, ते तुश्शे अन्तर अक नव्वीं आत्मा पैदा केरेलो; ते तुसन मरां घोड़ेरो दिल केढतां मासेरो दिल देइलो।✝ 27 अवं अपनि आत्मा तुसन मां छ़डेलो कि तुसां मेरे विधन पुड़ च़लेले ते मेरे नियम मेनतां तैन केरे मुताबिक केरेले। 28 तुसां तैस मुल्खे मां बस्सेले ज़ै मीं तुश्शे दादे-पड़दादन दित्तोरो थियो; ते तुसां मेरे लोक भोल्हे, ते अवं तुश्शो परमेशर भोल्हो। 29 अवं तुसन तुश्शी सैरी अशुद्धताई करां छुटेइलो, ते अन्न लगनेरो हुक्म देइतां, तैस फसली बधेइलो ते तुश्शे लेई काल न छ़डेलो। 30 अवं बुट्टां केरो फल ते ऊडारां केरि फसल बधेइलो, कि कौमन मां कालेरे वजाई सेइं फिरी तुश्शी निन्दा न भोल्ही। 31 तैखन तुसां अपने बुरे चाल चलन ते तैना कम्मां ज़ैना रोड़ां न थियां, याद केरतां अपने अधर्मेरां कम्मां केरि वजाई सेइं तुसां अपने-आपे सेइं नफरत केरेले। 32 परमेशर यहोवा एन ज़ोते, तुसन पतो लग्गेलो कि अवं एन तुश्शे लेई न केरीं। हे इस्राएली लोकव अपने चाल चलनेरे बारे मां शरमिन्दे भोथ ते तुसां शरमिन्दा भोल्हे।

33 "परमेशर यहोवा एन ज़ोते, ज़ैखन अवं तुसन तुश्शे सैरी अधर्मेरे कम्मन करां शुद्ध केरेलो, तैखन तुश्शे नगरन आबाद केरेलो; ते तुश्शे खण्डर फिरी बनाए गाले। 34 तुश्शो मुल्ख ज़ै सेभी एजने गाने बालां केरे सामने उज़ड़ोरोए ते बेरान पेवरोए, तैस मां फिरी ज़मीनदारी की गाली। 35 ते लोक ज़ोइयां केरेले, ‘ऐह मुल्ख ज़ै उज़ड़ोरो थियो, तै अदन बागरो ज़ेरो भोवरोए, ते ज़ैना नगर खण्डर ते उज़ैड़तां बेरान भोवरे थिये, तैना क़िले बाले भोइ जे, ते लोक तैन मां बेस्सी जेवरेन।’ 36 तैखन ज़ैना कौमां तुश्शे आसे-पासे बेच़ोरी राहेली, तैन्न पतो लग्गेलो कि मीं यहोवाए एन डोलेरूए फिरी बनेवरूए, ते उज़ड़ोरे मां बुट लगोरेन, मीं यहोवाए एन ज़ोवरूए, ते अवं एन्ने केरेलो।

37 "परमेशर यहोवा एन ज़ोते, इस्राएलेरे घराने मां फिरी मीं कां बिनती केरेले, कि अवं तैन केरे लेई एन केरि; मतलब अवं तैन मां मैन्हु केरि गिनती भैड्डां-छ़ेल्‍ली केरि ज़ेरि बधेइलो। 38 ज़ेन्च़रे पवित्र वक्तां केरि भैड्डां-छ़ेल्‍ली, यानी ठहरावरे तिहारां केरे मौके यरूशलेमे मां भैड्डां-छ़ेल्‍ली केरि गिनती बेशुमार भोतीए, तेन्च़रे ज़ैना नगर हुन्ना खण्डर भेवरेन बेशुमार मैन्हेइं सेइं भेरतां भोइ गालो। तैखन लोकन पतो लग्गेलो कि अवं यहोवा आईं।"