1 "गोट्लां केरे हिस्से इना भोन: उत्तरी सरहद्दी करां लगोरे हेतलोन नगरेरे बत्ती करां हमात नगरेरे वैदी तगर, ते दमिश्केरी सरहद्दी करां हसरेनाने करां उत्तरी पासेरे हमात नगरे तगर अक हिस्सो दान गोट्लेरो भोए; ते तैसेरे पूर्वी ते पश्चिमी हद्दां भी भोन। 2 दानेरी सरहद्दी करां लेइतां पूर्वे करां पश्चिमे तगर आशेर गोट्लेरो अक हिस्सो भोए। 3 आशेरे सरहद्दी करां लेइतां पूर्वे करां पश्चिमे तगर नप्ताली गोट्लेरो अक हिस्सो भोए। 4 नप्ताली एरी सरहद्दी करां लेइतां पूर्वे करां पश्चिमे तगर मनश्शे गोट्लेरो अक हिस्सो भोए। 5 मनश्शेरी सरहद्दी करां लेइतां पूर्वे करां पश्चिमे तगर एप्रैम गोट्लेरो अक हिस्सो भोए। 6 एप्रैमेरी सरहद्दी करां लेइतां पूर्वे करां पश्चिमे तगर रूबेन गोट्लेरो अक हिस्सो भोए। 7 ते रूबेनेरे सरहद्दी करां लेइतां पूर्वे करां पश्चिमे तगर यहूदा गोट्लेरो अक हिस्सो भोए।

8 "यहूदा गोट्लेरे सरहद्दी करां लेइतां पूर्वे करां पश्चिमे तगर तै अर्पण कियोरो हिस्सो भोए, ज़ै तुसेईं अर्पण केरनो भोल्हो, तै 25000 बाँस चौड़ो ते पूर्वे करां पश्चिमे तगर कोन्ची एक्‍की गोट्लेरे हिस्सेरे बराबर भोए, ते तैसेरे मझ़ाटे पवित्र ठार भोए। 9 ज़ै हिस्सो तुसेईं यहोवा जो अर्पण केरनो भोल्हो, तैसेरी लम्बाई 25000 बाँस ते चौड़ाई 10000 बाँस भोए। 10 ऐह अर्पण कियोरो पवित्र हिस्सो याजकन मैल्हे; तै उत्तरी पासे 25000 बाँस लम्मो ते पश्चिमेरे पासे 10000 बाँस चौड़ो, ते पूर्वेरे पासे 10000 बाँस चौड़ो ते दक्षिणेरे पासे 25000 बाँस लम्मो; ते तैसेरे मझ़ाटे यहोवारी पवित्र ठार भोए 11 ऐह खास पवित्र हिस्सो सादोकेरे खानदानेरे तैन याजकां केरो भोए ज़ैना मेरे हुक्म मन्ते राए, ते इस्राएली लोकां केरे भटके गांनेरे मौके लेवी लोकां केरे ज़ेरे न थिये भटकोरे। 12 एल्हेरेलेइ मुल्खेरे अर्पण कियोरे हिस्से मरां ऐह तैन केरे लेई अर्पण कियोरो हिस्सो, मतलब परमपवित्र मुल्ख भोए, ते लेवी केरि सरहद्दी सेइं लगोरो राए। 13 याजकां केरि सरहद्दी करां लेइतां लेवी लोकां केरो हिस्सो भोए, तै 25000 बाँस लम्मो; ते 10000 बाँस चौड़ो भोए, सारी लम्बाई 25000 बाँस ते चौड़ाई 10000 बाँस भोए। 14 तैना तैस मरां न किछ बेच़न ते न कोन्ची सेइं ज़मीनरो तबादलो केरन। ते न ज़मीनरी फसलरी पेइली पैदावार कोन्ची दित्ती गाए। किजोकि तै यहोवारे लेई पवित्रे।

15 "चौड़ेयरे 25000 बाँसेरे सामने ज़ै ठार 5000 बाँस बच़ोरी राली, तै नगर ते बसती ते चरागारे लेई आम हिस्सो भोए; ते नगर तैसेरे मझ़ाटे भोए। 16 नगरेरी ऐह नाप भोए, मतलब उत्तर, दक्षिण, पूर्व ते पश्चिमेरे पासे 4500-4500 हथ। 17 नगरे कां उत्तर, दक्षिण, पूर्व, पश्चिम चरागां भोन। ज़ैना 250-250 बाँस बिल्‍ली भोन। 18 अर्पण कियोरे पवित्र हिस्से कां लम्बेई मरां ज़ैन किछ बच़े, मतलब पूर्व ते पश्चिम दूईये पासन 10-10 बाँस अर्पण कियोरे हिस्से कां भोए, तैसेरी पैदावार नगरे मां मेहनत केरनेबालां केरे लेई खानेरे लेई भोए। 19 इस्राएलेरे सारे गोट्लन मरां ज़ैना नगरे मां मेहनत केरन, तैना तैसेरी ज़मीनदारी केरन। 20 सारो अर्पण कियोरो हिस्सो 25000 बाँस लम्मो ते 25000 हज़ार बाँस चौड़ो भोए; तुसेईं चौवरस पवित्र हिस्सो अर्पण केरनो भोल्हो ज़ैस मां नगरेरी खास ज़मीन भोए।

21 "ज़ै हिस्सो रेई गाए, तै प्रधाने मैल्हे। पवित्र अर्पण कियोरे हिस्सेरी, नगरेरी खास ज़मीनरे दूईने पासन मतलब तैन केरि पूर्वेरे ते पश्चिमेरे पासे 25000-25000 बाँसेरी चौड़ाई कां, ज़ै होरि गोट्लां केरे हिस्से कां भोए, तै प्रधाने मैल्हे। ते अर्पण कियोरो पवित्र हिस्सो ते भवनेरो पवित्र हिस्सो तैसेरे मझ़ाटे भोए। 22 ज़ै प्रधानेरो हिस्सो भोल्हो, तै लेवी केरे मझ़ाटे ते नगरेरी खास ज़मीन भोए। प्रधानेरो हिस्सो यहूदा ते बिन्यामीनेरी हदरे मझ़ाटे भोए।

23 "बाकी गोट्लां केरो हिस्सो एस तरीके भोए; पूर्वे करां पश्चिमे तगर बिन्यामीन गोट्लेरो अक हिस्सो भोए। 24 बिन्यामीनेरी सरहद्दी करां लेइतां पूर्वे ते पश्चिमे तगर शिमोन गोट्लेरो अक हिस्सो भोए। 25 शिमोनेरे सरहद्दी करां लेइतां पूर्वे ते पश्चिमे तगर इस्साकार गोट्लेरो अक हिस्सो। 26 इस्साकारेरे सरहद्दी करां लेइतां पूर्वे ते पश्चिमे तगर जबूलून गोट्लेरो अक हिस्सो भोए। 27 जबूलूनेरे सरहद्दी लेइतां पूर्वे ते पश्चिमे तगर गाद गोट्लेरो अक हिस्सो भोए। 28 गादेरे सरहद्दी करां दक्षिणेरे नेड़ेरे तामारे करां लेइतां मरीबा-कादेश नंव्वेरे पैनेरे नागे तगर, ते मिस्रेरे नाले ते भूमध्य-सागरे तगर पुज़्ज़े। 29 ज़ै मुल्ख तुसेईं इस्राएलेरे गोट्लन बंटनो पेलो तै ईहीए, ते तैन केरे हिस्से भी एना आन, परमेशर यहोवा एन ज़ोते।

30 "नगरेरे बेइर निसनेरी बत्तां इना भोन, मतलब उत्तरेरे पासे ज़ेसेरी लम्बाई 4500 बाँस भोए। 31 तैस मां ट्लाई फाटक भोन, मतलब अक रूबेन, अक यहूदा ते अक लेवरो फाटक भोए; किजोकि नगरेरे फाटकेरां नंव्वां इस्राएलेरे गोट्लां केरे नंव्वे पुड़ रखां गान। 32 पूर्वी पासेरी हद 4500 बाँस लम्मी भोए, ते तैस मां ट्लाई फाटक भोल्हे; मतलब अक यूसुफ, अक बिन्यामीन, ते अक दान गोट्लेरो फाटक भोए। 33 दक्षिणेरे पासेरी हद 4500 बाँस लम्मी भोए, ते तैस मां ट्लाई फाटक भोन; मतलब अक शिमोनेरो फाटक, अक इस्साकारेरो फाटक, ते अक जबूलूनेरो फाटक भोए। 34 ते पश्चिमेरे पासेरी हद 4500 बाँस लम्मी भोए, ते तैस मां ट्लाई फाटक भोन; मतलब अक गाद, अक आशेर, ते अक नप्ताली गोट्लेरो फाटक भोए। 35 नगरेरे च़ेवरे पासां केरो घेरो 18000 बाँस भोए, ते तैस दिहाड़ेरां बाद नगरेरू नवं ‘यहोवा शाम्मा’ भोल्हु।"