1 "परमेशर यहोवा एन ज़ोते: एंत्रीं अंगनेरे पूर्वी पासेरो फाटक कम केरनेरे लेई हफतेरे शा दिहाड़े बन्द राए, पन आरामेरे दिहाड़े खुल्‍लो राए। ते नंव्वे चाँदेरे दिहाड़े भी खुल्‍लो राए। 2 इस्राएलेरो प्रधान बेइरीं फाटकेरे ओसारेरी बत्तां एइतां फाटकेरे एक्‍की खम्भे कां खड़ो भोइ गाए, ते याजक तैसेरी आनोरी होमबलि ते मेलबलि तियार केरन। ते तै फाटकेरी डेवढी कां आराधना केरे; तैखन प्रधान बेइर गाए, ते फाटक ड्लवझ़ी करां पेइले बन्द न कियो गाए। 3 इस्राएलेरे लोक आरामेरे ते नंव्वे चाँदेरे दिहाड़े फाटकेरे दारे मां यहोवारे सामने आराधना केरन। 4 आरामेरे दिहाड़े ज़ै होमबलि प्रधान यहोवारे लेई च़ाढ़े, तै भैड्डरे शा बगैर नुक्से गबड़ां ते एक्‍की बगैर नुक्से हुड़ेरी भोए। 5 अन्नबलि ई भोए: मतलब हुड़े सेइं साथी एपा भेरतां अन्न ते भैड्डरे गबड़न सेइं ज़ेत्रू तै देइ सकते तैस सेइं साथी एपा भेरतां अक हीन ज़ैतूनेरो तेल दे। 6 नंव्वे चाँदेरे दिहाड़े तै अक बगैर नुक्से बछ़ड़ू ते बगैर नुक्से शा गबड़ां ते अक बगैर नुक्से हुड़ च़ाढ़े। एना सब बगैर नुक्से भोन। 7 बछ़ड़ां ते हुड़े सेइं साथी तै अक-अक एपा अन्नबलि तियार केरे, ते गबड़न सेइं साथी एपा भेरतां अक बेन रोगन समेत तेल दे। 8 ज़ैखन प्रधान अन्तर गाए तैखन तै फाटकेरे ओसारे मांमेइं गाए, ते तैस्से बत्तां वापस एज्जे।

9 "ज़ैखन आम लोक ठहरावरे वक्ते पुड़ यहोवारे सामने आराधना केरने गान, तैखन ज़ै उत्तरी फाटके मांमेइं भोइतां अन्तर आराधना केरने गाए, तै दक्षिणी फाटके मांमेइं भोइतां वापस निस्से, ते ज़ै दक्षिणी फाटके मांमेइं भोइतां अन्तर गाए, तै उत्तरी फाटके मांमेइं निस्तां बेइर निस्से, मतलब ज़ैस फाटके मांमेइं जेवरो भोए तैस फाटके मांमेइं वापस न एज्जे, सामने फाटकेरी बत्तां बेइर निस्से। 10 ज़ैखन तैना अन्तर गान तैखन प्रधान भी तैन सेइं साथी अन्तर गाए, ते ज़ैखन तै बेइर निस्से तैखन तैना भी तैस सेइं साथी बेइर निस्सन।

11 "तिहारां ते बाकी ठहरावरे मोकां केरि अन्नबलि बछ़ड़े सेइं साथी एपा भेरतां, ते हुड़े सेइं साथी भी एपा भेरतां भोए; ते गबड़न सेइं साथी एपा भेरतां अक हीन ज़ैतूनेरो तेल च़ाढ़े। 12 फिरी ज़ैखन प्रधान होमबलि या मेलबलि अपने मेर्ज़री बलि बनेइतां यहोवारे लेई तियार केरे, तैखन पूर्वी पासेरो फाटक तैन केरे लेई खोल्‍लो गाए, ते तै अपनि होमबलि ते मेलबलि तेन्च़रे तियार केरे ज़ेन्च़रे तै आरामेरे दिहाड़े तियार केरते; तैखन तै निस्से ते तैसेरे निसनेरां बाद फाटक बन्द कियो गाए।"

13 "रोज़ तू एक्‍की सालेरू बगैर नुक्से गबड़ू यहोवारी होमबलि देनेरे लेई तियार केरां, एन रोज़ झ़ेझ़ां तियार कियूं गाए। 14 रोज़ झ़ेझ़ां तैस सेइं साथी अक अन्नबलि तियार केरां, मतलब एपारो शेइयोवं अंश ते मैदे मां मिलानेरे लेई अक हिनेरो ट्लेइयोवं हिस्सो, यहोवारे लेई सदारी अन्नबलि ठीक विधरे मुताबिक च़ाढ़ी गाए। 15 गबड़ू, अन्नबलि ते तेल रोज़ झ़ेझ़ां ते हमेशा होमबलि केरतां च़ाढ़ी गाए।"

16 "परमेशर यहोवा एन ज़ोते: अगर प्रधान अपने कोन्ची मट्ठे किछ दे, त तै तैसेरो हिस्सो भोइतां तैसेरे पोट्लड़न भी मैल्हे। हिस्सेरे नियमेरे मुताबिक तैन भी तैन केरू अपनु धन ठहरे। 17 पन अगर तै अपने हिस्से मरां अपने कोन्ची नौकरे किछ दे, त आज़ाद भोनेरे साले तगर तैन तैसेरू भोल्हु, पन तैसेरे बाद प्रधाने वापस दित्तू गाए; ते तैसेरो अपनो हिस्सो तैसेरे मट्ठन मैल्हेलो। 18 लोकां केरो एरहो कोई हिस्सो प्रधान न ने, ज़ै ज़ुलम केरतां तैन केरि एपनी ज़मीनी मरां थिसोड़ोरो भोए; अपने मट्ठन तै अपने हिस्से मरां हिस्सो दे; कोन्च एरू न भोए कि मेरे लोक अपने-अपने ज़मीनी मरां तितर-बितर भोइ गान।"

19 फिरी तैनी अवं फाटकेरे एक्‍की पासेरे दारे मांमेइं नेइतां याजकां केरे उत्तरी पासेरे पवित्र कमरन मां नेव; तैड़ी पश्चिमेरे पासेरे कूने मां अक ठार थी। 20 तैखन तैनी मैन्हे मीं सेइं ज़ोवं, "ऐह तै ठारे ज़ैस मां याजक दोषबलि ते पापबलि केरतां मास बनान ते अन्नबलि बनान, कोन्च एरू न भोए कि बेइरीं अंगने मां नेने सेइं आम लोक भी पवित्र ठहरन।"

21 तैखन तैनी अवं बेइरीं अंगने मरां नेइतां तैस अंगनेरे च़ेवरे कानून मां फिराव, ते अंगनेरे हर एक्‍की कूने मां अक-अक ओट बेनेरो थियो, 22 मतलब अंगनेरे च़ेवरे कानून मां 40 हथ लम्मे ते 30 हथ चौड़े ओट थिये; च़ेवरे कूनां केरे ओटां केरि अक्‍के नाप थी। 23 अन्तर च़ेवरे पासन दिवार थी, ते दिवारां केरे बुन पकानेरे चूल्हे बनोरे थिये। 24 तैखन तैनी मैन्हे मीं सेइं ज़ोवं, "पकानेरां घरां, ज़ैड़ी भवनेरे सेवा केरनेबाले लोक बलिदान पकातन, तैना इन्ने आन।"