यहेजकेल 21

यहोवारी तलवार, बाबेल

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु, अपनु तुत्तर यरूशलेम नगरेरे पासे केर ते आराधनारे पवित्र ठारां केरे पासे वचन शुना; इस्राएल मुल्खेरे बारे मां नबूवत केर ते तैस सेइं ज़ो, 3 प्रभु यहोवा एन ज़ोते, हेर, अवं तेरे खलाफ आईं, ते अपनि तलवार म्याने मरां खिचतां तीं मरां धर्मी ते अधर्मी दूईने नाश केरेलो। 4 एल्हेरेलेइ कि तीं मरां धर्मी ते अधर्मी दूईने नाश केरनेबालोईं, एल्हेरेलेइ मेरी तलवार म्याने मरां निस्तां दक्षिणे करां उत्तरे तगर सेभी लोकां केरे खलाफ च़लेली; 5 तैखन सब लोकन पतो लग्गेलो कि यहोवाए म्याने मरां अपनि तलवार कढोरीए; ते तै तलवार फिरी म्याने मां न रख्खी गाली। 6 एल्हेरेलेइ ओ नाश भोने बाला मैन्हु, तू ओशा छ़ड, ते बड़ो दुख मना, ते बेबस भोइतां तैन केरे सामने भारी ओशा छ़ड। 7 ज़ैखन तैना तीं पुछ़ेले, कि तू ओशा किजो छ़डतस, त तू ज़ोइयां, बुरी खबरारी वजाई सेइं। किजोकि एरी खबर एजने बालीए कि हर एक्‍की मैन्हेरो मन ट्लूटी गालो ते सेभी केरे हथ ढिल्‍ले भोइ गाले, सेभी केरि आत्मा बेबस भोइ गाली ते सेभी केरां ज़ैंधू कमज़ोर भोइ गालां एरी खबर एजने बालीए ते तै ज़रूर पूरी भोल्ही।" परमेशर यहोवा एन ज़ोते।

8 फिरी यहोवाए मीं सेइं ज़ोवं, 9 "ओ नाश भोने बाला मैन्हु, नबूवत केरतां ज़ो, परमेशर यहोवा एन ज़ोते, हेर, शानी लेवरी तलवार, ते चमकावरी तलवार! 10 तै एल्हेरेलेइ पलेवरीए कि तैस सेइं मैन्हु मारे गान ते एल्हेरेलेइ चमकावरी कि अम्बर झ़पनेरी ज़ेरि चमके! त कुन असां खुश भोम? तै त यहोवारे मट्ठेरी सोटी ते सेभी बुट्टन घटिया समझ़ने बालोए। 11 तै चमकानेरे लेई एल्हेरेलेइ दित्तोरिए कि तै हथ्थे मां ट्लाई गाए, तै एल्हेरेलेइ शानी लेवरी ते चमकावरीए कि मारनेरे लेई हथ्थे मां दित्ती गाए। 12 ओ नाश भोने बाला मैन्हु चिन्डां मार ते अफ़सोस-अफ़सोस केर! किजोकि तै मेरे लोकन पुड़ च़लने बालीए, तै इस्राएलेरे सेभी प्रधान्न पुड़ च़लने बालीए; मेरे लोकन सेइं साथी तैना भी तलवारी सेइं मारे जे। एल्हेरेलेइ हुनी तू अपनि छाती पिट। 13 किजोकि सच़्च़े अपने लोकन परखेलो, ते अगर तैस घटिया समझ़ने बालू राज़दण्ड भी न राए, त कुन? परमेशर यहोवा एन ज़ोते।

14 "एल्हेरेलेइ ओ नाश भोने बाला मैन्हु, नबूवत केर, ते हथ्थे पुड़ हथ मार, ते ट्लाई बार तलवारी ताकत दुगनी की गाली; तै त मारनेरे लेई तलवार बल्के बड्डे करां बड्डे मारनेरी तलवारे; ज़ैस सेइं कोई कमरन मां भी बेंच़ी न बटेलो। 15 मीं मारने बाली तलवार तैन केरे नगरेरे सेभी फाटकां केरे खलाफ एल्हेरेलेइ च़लेवरीए कि लोकां केरे मन ट्लूटी गान, ते तैन्न बड़ी ठोकर लग्गे। अफ़सोस, अफ़सोस! तै त अम्बरेरे झ़पनेरी ज़ेरि बनेवरीए, ते मारनेरे लेई शानी लेवरीए। 16 हे तलवार देइने पासे च़ल, फिरी तियार भोइतां बांए पासे च़ल, ज़ेरां भी तेरू तुत्तर भोए। 17 अवं भी च़ैड़ी देइलो ते अपनि जलजलाहट ठंडी केरेलो मीं यहोवाए एन ज़ोवरूए।"

बाबेलेरे राज़ेरी तलवार

18 फिरी यहोवाए मीं सेइं ज़ोवं, 19 "ओ नाश भोने बाला मैन्हु, दूई बत्तां च़ुन कि बाबेलेरे राज़ेरी तलवार एज्जे; दूईये बत्तां एक्‍की मुल्खे मरां निस्सन! फिरी अक निशान रख, मतलब नगरेरे बत्तरे च़ोटी पुड़ अक निशान रख; 20 अक बत च़ुन कि तलवार अम्मोनी लोकां केरे रब्बाह नगरे पुड़ च़ले, ते यहूदा प्रदेशेरे क़िले बाले नगर यरूशलेमे पुड़ च़ले। 21 किजोकि बाबेलेरो राज़ो बत्तरे चौके पुड़ मतलब दूईये बत्तां केरे निसनेरे ठारी पुड़ एजने बाले वक्तेरे बारे मां ज़ान्नेरे लेई खड़ो भोवरोए, तैनी तीर हिलाए, ते कुल देबतन पुछ़ू ते जानबरां केरे बलिदान कियोरे कलैज़े भी हेरे। 22 तैसेरे देइने हथ्थे मां यरूशलेमेरू नवं आहे कि तै तैसेरे पासे जंग केरे, ते बड़े ज़ोरे सेइं मारनेरो हुक्म दे ते बड़े उच्‍ची आवाज़ी सेइं ललकारे, फाटकां केरे पासे जंग केरे, ते मोरच़ो बन्धे ते घेराबन्दी केरे। 23 पन लोक त तैस एजने बाले वक्तेरे बारे मां ज़ोने जो झूठ समझ़ेले; तैनेईं ज़ै तैन केरि कसम खेवरीए; एल्हेरेलेइ तैन केरो अधर्म याद करेइतां तैन्न ट्लुवालो।

24 "एल्हेरेलेइ प्रभु यहोवा यरूशलेम नगरेरे लोकन सेइं एन ज़ोते: एल्हेरेलेइ तुश्शो ज़ै अधर्म याद कियो जेवरोए, ते तुश्शे ज़ैना पाप खुल्‍ली जेवरेन, किजोकि तुश्शे कम्मन मां पापे-पाप लेइहोतन, ते तुस याद एवरेथ, एल्हेरेलेइ तुसां तैना केरे ज़िरिये ट्लेइयोनेथ। 25 हे इस्राएलेरे दुष्ट प्रधाना, तेरी दिहाड़ी एवरीए; अधर्मेरो आखरी मौको पुज़्ज़ी जेवरोए। 26 तेरे बारे मां परमेशर यहोवा एन ज़ोते: साफो खोल्‍ल, ते ताज भी खोल्‍ल; तै ज़ेरो थियो तेरहो न रेई सके; ज़ै उन्ढोए तै उच्‍चो केर ते ज़ै उच्‍चोए तै उन्ढो केर।✝21:26 भज. 75:7. 27 अवं तैस नगरे उलटे केरेलो ते तैस उलट-पुलट केरि देइलो, हाँ उलट केरेलो ज़ांतगर तैसेरो अधिकारी न एज्जे तांतगर तै उलटो रालो; फिरी अवं तैस अधिकार देइलो।"

अम्मोनी केरे बेइज़्ज़तरो बदलो

28 यहोवा फिरी मीं सेइं ज़ोवं, "ओ नाश भोने बाला मैन्हु, नबूवत केरतां ज़ो कि प्रभु यहोवा अम्मोनी लोकन ते तैन केरे ज़िरिये कियोरी बेइज़्ज़तरे बारे मां यहोवा एन ज़ोते; तू ज़ो, खिचोरी तलवारे, ते तै तलवार मारनेरे लेई चमकावरीए कि नाश केरे ते अम्बरेरे झ़पनेरी ज़ेरि भोए। 29 ज़ांतगर तैना तेरे बारे मां झूठां दर्शनां हेरतन, ते नबूवत तीं सेइं ज़ोतन कि हे तलवार तू तैन दुष्ट ज़ेखमी केरे मट्ठन पुड़ पेस ज़ैन केरि दिहाड़ी एवरीए, ते ज़ैन केरे अधर्मेरो आखरी सज़ाहरो वक्त पुज़ोरोए। 30 तैस तलवारी फिरी म्याने मां रख। ज़ैस ठारी तू बनाई जेई, ते ज़ैस मुल्खे मां तू ज़र्मी, तैस्से मां अवं तेरो न्याय केरेलो। 31 अवं तीं पुड़ अपनो क्रोध भड़केइलो ते तीं पुड़ अपने क्रोधेरी अग भड़केइलो; ते अवं तीं जानबरेरो ज़ेरो लोकां केरे हवाले केरेलो ज़ैना नाश केरने मां माहिर आन। 32 तू अग्गरे लेई कैड़ु केरि ज़ेरि बनेली, तेरो खून मुल्खे मां बनोरो रालो; ते तीं फिरी कधे कोई याद न केरेलो; किजोकि मीं यहोवाए एन ज़ोवरूए।"