1 फिरी यहोवारी आत्मा अवं छ़ुइतां भवनेरे पूर्वेरे फाटके कां पुज़व ज़ेसेरू तुत्तर पूर्वेरे पासे थियूं। ते तैड़ी मीं कुन लावं, कि फाटके मां 25 मड़द आन। ते मीं तैन केरे मझ़ाटे अज्जूरेरू मट्ठू याजन्याह ते बनायाहेरू मट्ठू पलत्याह लाए, इना दूई इस्राएली लोकां केरे प्रधान थिये। 2 तैखन तैने मीं सेइं ज़ोवं, "ओ नाश भोने बाला मैन्हु, ज़ैना मैन्हु इस यरूशलेम नगरे मां बुरू सोचतन ते बुरी योजना बनातन तैना इनां आन। 3 इना ज़ोतन, अस सुरक्षित अहम! घर बनानेरो मौको हेजू नईं एवरो, इन नगर पतीलेरू ज़ेरू ते असां तैस मां मासेरे ज़ेरे अहम। 4 एल्हेरेलेइ ओ नाश भोने बाला मैन्हु, इन केरे खलाफ नबूवत केर, नबूवत केर।"

5 तैखन यहोवारी आत्मा मीं पुड़ अई, ते मीं सेइं ज़ोवं, "एन्च़रे ज़ो, यहोवा इन ज़ोते: हे इस्राएली लोकव तुसेईं एन ज़ोवरूए; कि ज़ैन किछ तुश्शे मने मां एइते, तैस अवं ज़ानताईं। 6 तुसेईं त इस नगरे मां बड़े लोक मारोरेन बल्के इसेरी सड़कां लाशन सेइं भेरि छ़ेडोरिन। 7 एल्हेरेलेइ प्रभु यहोवा इन ज़ोते: ज़ैना मैन्हु तुसेईं इस नगरे मां मारोरेन, तैन केरि लाशां इस नगरे मां ज़ैन पतीलेरू ज़ेरूए तैस मां मासे; ते तुस तैस मरां कढे गाले। 8 तुस तलवारी करां डरतथ, ते अवं तुसन पुड़ तलवार च़लेइलो, प्रभु यहोवा एन ज़ोते। 9 अवं तुसन इस नगरे मरां केढतां परदेशी केरे हथ्थे मां केरेलो, ते तुसन सज़ाह दुवेइलो। 10 तुस तलवारी सेइं मरेले, ते अवं तुसन इस्राएलेरे मुल्खेरी सरहद्दी पुड़ सज़ाह देइलो। तैखन तुसन पतो लग्गेलो कि अवं यहोवा आईं। 11 एन नगर तुश्शे पूरे तरीके सेइं सुरक्षारे लेई पतीलो न बनेलू, ते न तुस इस मां मास भोल्हे। अवं तुसन इस्राएलेरे मुल्खेरे सरहद्दी पुड़ सज़ाह देइलो। 12 तैखन तुसन पतो लग्गेलो कि अवं यहोवा आईं; तुसां त मेरी विधन पुड़ न च़ले, ते मेरे नियम तुसेईं न मन्ने; पन ज़ैना गैर कौमां तुश्शे च़ेवरे पासन रैती थी तैन केरे रीती रुवाज़ेरे मुताबिक च़लतथ।"

13 अवं हेजू नबूवत केरि राहोरो थियो, कि बनायाहेरू मट्ठू पलत्याह मेरि जेवं। तैखन अवं तुत्तरेरे भारे तल्‍ले मां झुकतां उच्‍चे आवाज़ी सेइं चिन्डां मारने लगो, ते मीं ज़ोवं, "ओ प्रभु यहोवा, कुन तू इस्राएलेरे बच़ोरे लोकन सत्यानाश केरेलो?"

14 तैखन यहोवाए मीं सेइं ज़ोवं, 15 "ओ नाश भोने बाला मैन्हु, यरूशलेम नगरेरे रानेबालेईं तेरे नेड़े रानेबाले भियालन सेइं बल्के इस्राएलेरे सारे लोकन सेइं भी ज़ोवरूए कि ‘तुस यहोवा करां दूर भोइ गाथ। ई मुल्ख इश्शे अधिकारे मां दित्तो जेवरोए।’ 16 पन तू तैन सेइं ज़ो, ‘प्रभु यहोवा इन ज़ोते कि मीं तुस दूर-दूर रानेबैली कौमन मां बसाए ते मुल्खे-मुल्खे मां तितर-बितर कियोरे त आथ, फिरी भी ज़ैन मुल्खन मां तुस एवरेथ, तैन मां एप्पु तुश्शे लेई थोड़े दिहाड़न तगर पवित्र ठार ठहरेलो।’ 17 एल्हेरेलेइ तैन सेइं ज़ो, ‘प्रभु यहोवा इन ज़ोते, कि अवं तुसन कौमां-कौमां केरे लोकन मरां अकोट्ठे केरेलो, ते ज़ैन कौमन मां तुस तितर-बितर कियोरेथ तैन मरां अकोट्ठे केरेलो, ते तुसन इस्राएलेरी ज़मीन देइलो।’ 18 ते तैना तैड़ी पुज़तां तैस मुल्खेरी सब भिट्टी मूरती ते सब भिट्टां कम्मां भी तैस मरां दूर केरेले। 19 ते अवं तैन केरो मन अक केरेलो, ते तैन मां नव्वीं आत्मा पैदा केरेलो, ते तैन केरि जानी मरां घोड़ेरो दिल केढतां तैन मासेरो दिल देइलो, 20 ज़ैस सेइं तैना मेरी विधन पुड़ सदा च़लते रान ते मेरे नियमन मन्ते रान। ते तैना मेरे लोक भोल्हे, ते अवं तैन केरो परमेशर भोइलो। 21 पन तैना लोक ज़ैना एपनी भिट्टी मूरती ते भिट्टे कम्मन मां मन लेइतां च़लते रहतन, तैन अवं एरू केरेलो कि तैन्न अवं तैन केरे पापां केरो बदलो देइलो, प्रभु यहोवा एन ज़ोते।"

22 फिरी करूबेईं अपना फंघां खड़ां कियां, ते पेइहे तैन सेइं साथी-साथी च़ले। ते इस्राएलेरे परमेशरेरी महिमा तैन पुड़ थी। 23 तैखन यहोवारी महिमा यरूशलेम नगरे मरां उठतां तैस पहाड़े पुड़ रुकी, ज़ैन नगरेरे पूर्वेरे पासे थियूं। 24 फिरी दर्शने मां यहोवारी आत्मा अवं खड़ो कियो, ते अवं कसदी लोकां केरे मुल्खे* मां कैदी केरे मझ़ाटे पुज़व। ते ज़ैन दर्शन मीं मैल्होरू थियूं तैन गाईब भोइ जेवं। 25 तैखन ज़ेत्री गल्‍लां यहोवाए मीं सेइं ज़ोवरी थी, तैना सब मीं कैद भोवरे लोकन सेइं ज़ोई।