1 एक्सां इस्राएलेरे किछ बुज़ुर्ग मीं कां एइतां मेरे सामने बिश्शे। 2 तैखन यहोवाए मीं सेइं ज़ोवं, 3 "ओ नाश भोने बाला मैन्हु, एन मैन्हेइं त मूरती अपने मने मां बसेइतां रेखोरिन, ते अपने अधर्मेरी ठोकर लोकां केरे सामने रख्खोरीए; फिरी कुन तैना मीं करां किछ पुछ़ी बटेले? 4 एल्हेरेलेइ तू तैन सेइं ज़ो, प्रभु यहोवा एन ज़ोते; इस्राएली लोकन मरां ज़ै कोई एपनी मूरती अपने मने मां बसेइतां रखेलो, ते अपने अधर्मेरी ठोकर लोकां केरे सामने रेखतां नेबन कां एज्जे, तैस अवं यहोवा, तैसेरी बड़े मूरती केरे मुताबिक जुवाब देइलो, 5 ज़ैस सेइं इस्राएली लोक, ज़ैना एपनी मूरती केरे ज़िरिये मीं शैरतां मीं करां दूर भेवरेन, तैन अवं तैन्ना केरे मनेरे ज़िरिये फसेइलो।

6 "एल्हेरेलेइ इस्राएली लोकन सेइं ज़ो, प्रभु यहोवा एन ज़ोते; बेदलोथ ते मूरती पूज़ा केरनी शारा; ते अपने सब बुरे कम्मन करां मन फिराथ। 7 किजोकि इस्राएली लोकन मरां ते तैन मां रानेबाले परदेशी लोकन मरां भी कोई कि न भोए, ज़ै मीं पत्ती च़लनू शैरतां मूरती अपने मने मां बसेइतां रखेलो, ते अपने अधर्मेरी ठोकर अपने सामने रखेलो, ते तैखन मीं करां अपनि कोई गल पुछ़नेरे लेई कोन्ची नेबी कां एज्जेले, त तैस अवं यहोवा एप्पु जुवाब देइलो। 8 अवं तैस मैन्हेरे खलाफ भोइतां तैस हैरान केरेलो, ते तैस अक निशान ठहरेइलो; ते तैसेरी कहावत बनेली ते अपने लोकन मरां नाश केरेलो; तैखन तुसन लोकन पतो लग्गेलो कि अवं यहोवा आईं। 9 अगर कोन्ची नेबे धोखो खेइतां कोई वचन ज़ोवरू भोए, त समझ़ा कि मीं यहोवाए तैस नेबी धोखो दित्तोरोए; ते अवं अपनो हथ खड़ो केरतां तैस अपने इस्राएली लोकन मरां नाश केरेलो। 10 तैना सब लोक अपने-अपने अधर्मेरो बोझ छ़ूले, मतलब नबी भी एस्से तरीके पापी ठहरेलो ज़ेन्च़रे तैस करां पुछ़ने बालो पापी ठहरेलो। 11 तैखन इस्राएली लोक अग्रोवं जो फिरी मीं पत्ती च़लने करां न भटकेले, ते न अपने किसमां-किसमां केरे पापां केरे ज़िरिये अग्रोवं जो अशुद्ध भोन; बल्के तैना मेरे लोक बन्न ते अवं तैन केरो परमेशर भोल्हो, प्रभु यहोवा एन ज़ोते।"

12 तैखन यहोवाए मीं सेइं ज़ोवं, 13 "ओ नाश भोने बाला मैन्हु; ज़ैखन कोन्ची मुल्खेरे लोक मीं सेइं धोखो केरतां पापी भोइ गान, ते अवं अपनो हथ तैस मुल्खेरे खलाफ खड़ो केरतां तैस मुल्खेरो अन्नेरो ज़िरियो बन्द केरेलो, ते तैस मां काल छ़ेडतां मैन्हु ते जानबर दूईये नाश केरेलो, 14 तैखन अगर तैस मां नूह, दानिय्येल ते अय्यूब एना ट्लाईए धर्मी मैन्हु कि न भोन, फिरी भी तैना एपनी धार्मिकतारे मुताबिक सिर्फ अपने प्राण बच़ेइ सकेले; प्रभु यहोवा एन ज़ोते। 15 ते अगर अवं कोन्ची मुल्खे मां जंगली जानबर भेज़ी ज़ैना तैस गैर आबाद केरन, ते जानबरां केरे वजाई सेइं कोई तैस मांमेइं गेइ न बटे, 16 त चाहे तैस मुल्खे मां तैना ट्लाई मड़द भी कि न भोन, फिरी भी प्रभु यहोवा एन ज़ोते, मीं अपनि कसम, न तैना मट्ठन ते न तैना कुइयन बच़ेइ बटेले; तैन्ना सिर्फ तैन्ना बच़ेले; पन मुल्ख बेरान भोइ गालो। 17 ते अगर अवं तैस मुल्खे पुड़ तलवार खिचतां ज़ोईं, हे तलवार उस मुल्खे पुड़ च़ल; त एस्से तरीके अवं तैस मरां मैन्हु ते जानबर नाश केरतां छ़डेलो, 18 त चाहे तैस मुल्खे मां तैना ट्लाई मड़द भी कि न भोन, फिरी भी प्रभु यहोवा एन ज़ोते, मीं अपनि कसम, न तैना मट्ठन ते न तैना कुइयन बच़ेइ बटेले; सिर्फ तैन्ना बच़ेले। 19 ते अगर अवं तैस मुल्खे मां महामारी फैलेईं ते तैस पुड़ अपनो क्रोध भड़केइतां तैसेरो खून एन्च़रे बगेइं कि तैट्ठेरे मैन्हु ते जानबर दूईये नाश भोन, 20 त चाहे नूह, दानिय्येल ते अय्यूब भी तैस मां भोन, फिरी भी, प्रभु यहोवा एन ज़ोते, मीं अपनि कसम, न तैना मट्ठन ते न तैना कुइयन बच़ेइ बटेले; तैना अपने धार्मिकतारे ज़िरिये सिर्फ अपनो आप बच़ेइ सकेले।

21 "किजोकि प्रभु यहोवा एन ज़ोते; अवं यरूशलेमे पुड़ एपनी च़ेवरे सज़ाह छ़डेलो, मतलब तलवार, काल, जंगली जानबर, ते महामारी ज़ैन सेइं मैन्हु ते जानबर सब तैस मरां नाश भोन।✝ 22 फिरी भी तैस मरां थोड़ां ज़ेरां मट्ठां ते थोड़ी ज़ेरि कुइयां बच़ेलां, ज़ैना तैट्ठां निस्सतां तुसन कां पुज़ेई गैली; ते ज़ैखन तू तैन केरो चाल चलन ते कम्मां केरे बारे मां तैस आफतरे बारे मां ज़ै अवं यरूशलेमे पुड़ छ़डेलो, बल्के ज़ेत्री आफतां अवं तैस पुड़ छ़डेलो, तैन सेभी केरे बारे मां शान्ति मैल्हेली। 23 ज़ैखन तुस तैन केरो चाल चलन ते कम्मां हेरथ तैखन तैना तुश्शे शैन्तरी वजाह भोल्हे; ते तुसन पतो लग्गेलो कि मीं यरूशलेमे मां ज़ैन किछ कियोरूए, तैन बगैर वजाह सेइं नईं कियोरू, प्रभु यहोवा एन ज़ोते।"