यहेजकेल 15

यरूशलेम दाछ़रू ज़ेरू

1 फिरी यहोवाए मीं सेइं ज़ोवं, 2 "ओ नाश भोने बाला मैन्हु, सब बुट्टन मां दाछ़री कुन खासयते? दाछ़री डालड़ी ज़ै जंगलेरे बुट्टन मां लगतीए, तैस मां कुन गुण भोते? 3 कुन कोई चीज़ बनानेरे लेई लकड़ी तैस मरां नेही गातीए, या कोई भांडां टंगनेरे लेई तैसेरो खीलो बेनि सकते? 4 तैसारां त कैड़ु बनेइतां अग्गी मां फुकतन, तैसेरे दूईये पासे अग्गी सेइं फुकोई गातन, ते तैसेरो मझ़ाटो फुकोइतां भस्म भोइ गाते कुन तै कोन्ची कम्मेरीए? 5 हेर, ज़ैखन तै अग्गी मां न थी छ़डोरीए, तैखन भी तै कोन्ची कम्मेरी न थी, फिरी ज़ैखन तै अग्गी मां छ़ेडतां भस्म भोइ जेई, त तैखन तै कोस कम्मेरी भोइ सकतीए? 6 एल्हेरेलेइ प्रभु यहोवा एन ज़ोते, ज़ेन्च़रे जंगलेरे बुट्टन मरां अवं दाछ़री बेल अग्गरां कैड़ु बनाताई, तेन्च़रे अवं यरूशलेमेरे लोकन नाश केरेलो। 7 अवं तैन केरे खलाफ भोल्हो, ते तैना एक्‍की अग्गी मरां निस्तां होरि अग्गरां कैड़ु बनेलां; ते ज़ैखन अवं तैन करां दूर भोल्हो, तैखन तुसन पतो च़लेलो कि अवं यहोवा आईं। 8 अवं तैन केरो मुल्ख उज़ाड़ेलो, किजोकि तैनेईं मीं सेइं धोखो कियोरोए, प्रभु यहोवा एन ज़ोते।"