यहेजकेल 24

पैनी सेइं उबलतु भांड

1 इश्शे गुलैमरे नवोवं सालेरे दशोवं महीनेरे दशोवं दिहाड़े, यहोवाए मीं सेइं ज़ोवं, 2 "ओ नाश भोने बाला मैन्हु, अज़्ज़ेरी दिहाड़ी लिख, किजोकि अज़्ज़ेरे दिहाड़े बाबेलेरे राज़े यरूशलेमेरी घेराबन्दी कियोरीए। 3 तैस बगावत केरनेबाले घराने ऐह मसाल शुना, प्रभु यहोवा एन ज़ोते, पतीलो अग्गी पुड़ रखा, अग्गी पुड़ रेखतां तैस मां पानी छ़डा; 4 केन्नी मरां सेभन करां निग्गर जानबर नेइतां तैन कट्टा ते तैस पतीले मां तैसेरे मासेरे टुक्ड़े छ़ेडी देथ, ज़ैना रोड़े टुक्ड़े भोन ज़ेन्च़रे चेवड़ी, मेट्टू एग्री चेवड़ी, ते तैस रोड़े-रोड़े मासे सेइं भेरतां छ़ड्डा। 5 तैन हेड्डन पतीले हैठ ढेर ला; ते तैन रोड़ेच़ारे बना ताके एंत्रीं हेड्डी भी गेली गान।

6 "एल्हेरेलेइ प्रभु यहोवा एन ज़ोते: अफ़सोस, तैस खूनी नगरी पुड़! अफ़सोस तैस पतीले पुड़! ज़ेसेरो मोरच़ो तैस मां बनोरोए ते छुटोरो नईं; तैस मरां टुक्ड़ो-टुक्ड़ो केरतां कढा, तैसेरे लेई चिट्ठी न छ़डी गाए। 7 किजोकि यरूशलेम नेगरी मां बेकसूर लोकां केरो खून कियोरो तैस्से मांए, तैस नेगरां तै खून तल्‍ले मां उलटाव ते तैस पुड़ मित्ती न छ़डी, पन नेग्गी चट्टानी पुड़ छ़डो।✝24:7 प्रका. 18:24. 8 एल्हेरेलेइ मीं भी तैसारो खून नेग्गी चट्टानी पुड़ रखोरोए कि तै ढेक्‍की न सखे ते बदलो नेनेरे लेई जलजलाहट भड़के। 9 प्रभु यहोवा एन ज़ोते: अफ़सोस तैस खूनी नेगरी पुड़! अवं भी बड़ो ढेर लेइलो। 10 ते हछां कैड़ु छ़ेडतां अग खूब भड़काथ, मास रोड़ेच़ारे ड्लकाथ, ते मसालो मिलाथ, ते हेड्डी फुका। 11 फिरी खाली केरतां पतीले मूरन पुड़ रखा ज़ैन पुड़ तै खूब तप्पे ते तैसेरी पितल फुकोए, ते तैसेरो मैल गेली गाए, ते तैसारो मोरच़ो खतम भोइ गाए। 12 अवं तैसेरी वजाई सेइं मेहनत केरते-केरते थेकी जेव, पन तैसारो बड़ो मोरच़ो तैस मरां न छुट्टो, इड़ी तगर कि तैसारो मोरच़ो अग्गी सेइं भी न छुट्टे। 13 हे नगरी तेरी अशुद्धता महा पापेरीए। अवं त तीं शुद्ध केरनो चातो थियो, पन तू शुद्ध न भोइ, एल्हेरेलेइ ज़ांतगर अवं अपनि जलजलाहट तीं पुड़ ठंडी न केरीं; तांतगर तू शुद्ध न की गाली। 14 मीं यहोवाए एन ज़ोवरूए; कि तैन्ने भोल्हु, अवं एन्च़रे केरेलो, कि अवं तीं न बखशेलो, ते न तीं पुड़ तरस खेइलो, ते न पसतेइलो; तेरे चाल चलन ते तेरे कम्मां केरे मुताबिक तेरो न्याय कियो गालो, प्रभु यहोवा एन ज़ोते।"

यहेजकेलेरी कौन्शरी मौत।

15 फिरी एक्सां यहोवाए मीं सेइं ज़ोवं, 16 "ओ नाश भोने बाला मैन्हु, हेर, अवं तेरी एछ़्छ़ी केरि ट्लारी मैरतां तीं करां नेने बालोईं पन तू न मातम केरां ते न ऐंखरू बिछ़ोड़ां। 17 ओशा त छ़ेड्डां, पन तैना शुनोरां न लोड़न; मरोरे लोकां केरे लेई भी मातम न केरां। दोग्गे पुड़ साफो ते पव्वन जुट्टी लगोरी रेखां; ते न अपनु आशी छ़ुपेइयां ते न मातमेरि रोट्टी खेइयां।" 18 ते मीं झ़ेझ़ां लोकन सेइं ज़ोवं, ते ड्लवझ़ी मेरी कौन्श मेरि जेई। तैखन मीं झ़ेझ़ां हुक्मेरे मुताबिक कियूं।

19 तैखन लोक मीं सेइं ज़ोने लगे, "कुन तू असन सेइं न ज़ोलो कि तू कुन लगोरोस केरने, एसेरो इश्शे लोकां केरे लेई कुन मतलबे?" 20 मीं तैन जुवाब दित्तो, "यहोवाए मीं सेइं ज़ोवं, 21 ‘तू इस्राएली लोकन सेइं ज़ो, प्रभु यहोवा एन ज़ोते: हेर, अवं अपने पवित्र ठैरी ज़ेसेरे क़िले भोने पुड़ तुसां घमण्ड केरतथ, ते ज़ै तुश्शी एछ़्छ़न मां बस्सोरोए, ते ज़ैस तुश्शो मन चाते, तैस अवं अपवित्र केरने पुड़ आईं; ते अपने ज़ैन मट्ठन-कुइयन तुसां तैड़ी छ़ेडतां एवरेथ, तैना तलवारी सेइं मारे गाले। 22 ज़ैखन इन भोल्हु तैखन ज़ेन्च़रे मीं कियोरूए तेन्च़रे तुस भी केरेले, मतलब तुसां भी अपना तुत्तरां न छ़ुपाले, ते न मातमेरि रोट्टी खाएले। 23 तुसां दोग्गे पुड़ साफो बेन्धतां ते पव्वन जुट्टी लेइतां रखेले, न तुसां लेरां देले ते न छाती पिटेले, बल्के अपने अधर्मेरे कम्मन मां फेसतां गलते गाले ते एक्‍की होरेरे पासे तेकतां चिन्डां मारते राले। 24 एस तरीके सेइं यहेजकेल तुश्शे लेई अक निशान भोल्हो; ज़ेरू तैनी कियूं तेरहु तुसां भी केरेले। ते ज़ैखन एन भोइ गालू, तैखन तुसन पतो लग्गेलो कि अवं परमेशर यहोवा आईं।’"

25 तैखन परमेशरे ज़ोवं, "ओ नाश भोने बाला मैन्हु, कुन एन सच़ नईं, कि ज़ेइस अवं तैन केरो मज़बूत क़िलो, तैन केरि शोभा ते खुशरी वजाह, ते तैन केरे मट्ठां-कुइयां ज़ैना तैन केरि शोभा आन, तैन केरि एछ़्छ़ी केरो आनन्द, मनेरी इच्छा आन, तैन अवं तैन करां नेलो, 26 तैस दिहाड़े ज़ै यरूशलेम नगरे मरां नेशतां बच़ेलो, तै तीं कां एइतां तीं खबर शुनालो। 27 तैस दिहाड़े तेरू आशी खुलेलू, ते फिरी तू च़ुप न रालो, एस तरीके सेइं तू एन लोकां केरे लेई निशान ठहरेलो, ते एन पतो लग्गेलो कि अवं यहोवा आईं।"