यहेजकेल 35

सेईर पहाड़ेरे खलाफ नबूवत

1 फिरी यहोवाए मीं सेइं ज़ोवं: 2 "ओ नाश भोने बाला मैन्हु, अपनु तुत्तर सेईर पहाड़ेरे पासे केरतां तैसेरे खलाफ नबूवत केर, 3 ते तैस सेइं ज़ो, परमेशर यहोवा एन ज़ोते: हे सेईर पहाड़, अवं तेरे खलाफ आईं; ते अवं अपनो हथ तेरे खलाफ खड़ो केरतां तीं उज़ाड़ेलो। 4 अवं तेरे नगरन खण्डर बनेइतां छ़डेलो, ते तू उज़ड़ी गालो; तैखन तीं पतो च़लेलो कि अवं यहोवा आईं। 5 किजोकि तू इस्राएली लोकन सेइं जुगे-जुगेरी दुश्मनी रखतो थियो, ते तैन केरे मुसीबतरे वक्ते ज़ैखन तैन केरे अधर्मेरे सज़ाहरो वक्त पुज़्ज़ो, तैखन तैना तलवारी सेइं मारे गानेरे लेई दित्ते। 6 एल्हेरेलेइ परमेशर यहोवा एन ज़ोते, मीं अपनि कसम, अवं तीं कत्ल भोनेरे लेई तियार केरेलो, ते तैन केरे खून केरनेरो पाप तेरो पीछो केरेलो; किजोकि तू खूने सेइं नफरत न थियो रखतो, एल्हेरेलेइ खून केरनेरो पाप तेरो पीछो केरेलो। 7 एस तरीके अवं सेईर पहाड़े बिलकुल उज़ाड़ेलो, ते ज़ै कोई तैस मां एइतो गातो भोए, अवं तैस नाश केरतां छ़डेलो। 8 अवं तैसेरे पहाड़न लाशन सेइं भरेलो; तेरी पहैड़ी, वैदी ते सब नालन मां तलवारी सेइं मारोरां केरि लाशां भोल्ही! 9 अवं तीं जुगे-जुगेरे लेई उज़ाड़ेलो, ते तेरे नगर फिरी न बस्सेले, तैखन तीं पतो लग्गेलो कि अवं परमेशर यहोवा आईं।

10 "किजोकि तीं ज़ोवरूए, ‘इनां दूईये कौमां ते इनां दूईये मुल्ख मेरे भोल्हे; ते अस तैन केरे मालिक भोइ गाले,’ चाए यहोवा तैड़ी थियो। 11 एल्हेरेलेइ परमेशर यहोवा एन ज़ोते, मीं अपनि कसम, तेरे क्रोधेरे मुताबिक, तेरे कोपेरे मुताबिक, ते ज़ै क्रोध तीं तैन सेइं बैर रखनेरे वजाई सेइं कियोरोए तैसेरे मुताबिक तीं सेइं बर्ताव केरेलो, ते ज़ैखन अवं तेरो न्याय केरेलो, तैखन तुसन मां अपनो आप बांदो केरेलो। 12 तीं पतो लग्गेलो, कि मीं यहोवा तेरी सब निन्दारी गल्‍लां शुनोरिन ज़ैना तीं इस्राएलेरे पहाड़ां केरे बारे मां ज़ोवरिन, ‘तैना त उज़ड़ी जेआं, तैना असने दित्तोरन, कि असां तैन खेइ छ़डम।’ 13 तुसेईं अपने ज़बाना सेइं मेरे खलाफ घमण्डेरी गल्‍लां ज़ोई, ते मेरे खलाफ बेड़ि गल्‍लां ज़ोवरिन; इन मीं शुनोरूए। 14 परमेशर यहोवा एन ज़ोते: ज़ैखन सैरी धेरती पुड़ आनन्द भोल्हो, तैखन अवं तीं उज़ाड़ेलो। 15 तू इस्राएली लोकां केरे अपने हिस्से उज़ड़नेरे वजाई सेइं खुश भोव; एल्हेरेलेइ अवं भी तीं सेइं एरू केरेलो; हे सेईर पहाड़, हे एदोमेरे सारे मुल्ख, तू उज़ड़ी गालो। तैखन तैन्न पतो लग्गेलो कि अवं यहोवा आईं।"